ಬೆಂಗಳೂರು : ಐಎಂಎ ಬಹುಕೋಟಿ ವಂಚನೆ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಮತ್ತೊಬ್ಬ ಆರೋಪಿಯನ್ನು ಬಂಧಿಸುವಲ್ಲಿ ಎಸ್ಐಟಿ ಅಧಿಕಾರಿಗಳು ಯಶಸ್ವಿಯಾಗಿದ್ದಾರೆ.
ಆರೋಪಿ ಮನ್ಸೂರ್ ಖಾನ್ ಜೊತೆ ಸೇರಿ ಹೂಡಿಕೆದಾರರ ಹಣದಿಂದ ಮಾಲೂರಿನಲ್ಲಿ ಆಸ್ತಿ ಖರೀದಿ ಮಾಡಿದ್ದ ನಗರದ ಫ್ರೇಜರ್ ಟೌನ್ ನಿವಾಸಿ ಖುಮರುಲ್ಲಾ ಜಮಾಲ್ ಬಿನ್ ರಹಮತುಲ್ಲಾ (40) ನನ್ನು ಎಸ್ಐಟಿ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.
ಖುಮರುಲ್ಲಾ ಜಮಾಲ್ ಒಬ್ಬ ಮಾಟ ಮಂತ್ರ ಮತ್ತು ನಾಟಿ ವೈದ್ಯನಾಗಿದ್ದು, ಪ್ರಕರಣದ ಪ್ರಮುಖ ಆರೋಪಿ ಮನ್ಸೂರ್ ಖಾನ್ಗೆ ತುಂಬಾ ಹತ್ತಿರದ ಸ್ನೇಹಿತನಾಗಿದ್ದ. ಮನ್ಸೂರ್ ಖಾನ್ನಿಂದ ಹೂಡಿಕೆದಾರರ ಹಣ ಪಡೆದು, ಕೋಲಾರ ಜಿಲ್ಲೆಯ ಮಾಲೂರಿನಲ್ಲಿ 5 ಎಕರೆ ಜಮೀನನ್ನು ಖರೀದಿ ಮಾಡಿ ಸಿಮೆಂಟ್ ಬ್ಲಾಕ್ಗಳನ್ನು ತಯಾರಿಸುವ ಕಾರ್ಖಾನೆ ನಡೆಸುತ್ತಿದ್ದನು. ಅಲ್ಲದೇ ಮನ್ಸೂರ್ ಖಾನ್ ನಿಂದ ಪಡೆದ ಹಣವನ್ನು ಬಂಕರುಗಳಲ್ಲಿ ಮುಚ್ಚಿಡುತ್ತಿದ್ದನು. ಈ ಬಂಕರ್ಗಳನ್ನು ಕಾಯಲೆಂದೇ ಗನ್ಮ್ಯಾನ್ಗಳನ್ನು ಸಹ ನೇಮಕ ಮಾಡಿದ್ದರು.
ಸದ್ಯ ಈತನನ್ನು ವಶಕ್ಕೆ ಪಡೆದಿರುವ ಎಸ್ಟಿ ತಂಡ ತೀವ್ರ ವಿಚಾರಣೆಗೆ ಒಳಪಡಿಸಲಿದೆ ಎಂದು ತಿಳಿದುಬಂದಿದೆ.
