ಹೊಸಕೋಟೆ : ಕೊರೊನಾ ಎರಡನೇ ಅಲೆ ಸಂಕಷ್ಟಕ್ಕೆ ಸಿಲುಕಿದ್ದ ಹೊಸಕೋಟೆ ಜನಕ್ಕೆ ಸಚಿವ ಎಂಟಿಬಿ ನಾಗರಾಜ್ ಇಂದು ಸಾವಿರಾರು ರೇಷನ್ ಕಿಟ್ಗಳನ್ನು ವಿತರಿಸಿದ್ರು.
ಹೊಸಕೋಟೆಯ ಅಯ್ಯಪ್ಪ ಸ್ವಾಮಿ ಟೆಂಪಲ್ ಬಳಿ ನೂರಾರು ಬೀದಿ ವ್ಯಾಪಾರಿಗಳಿಗೆ ರೇಷನ್ ಕಿಟ್ಗಳನ್ನು ಹಂಚಿದರು. ಸಚಿವರು ಬರುವವರೆಗೂ ಸಾಮಾಜಿಕ ಅಂತರವನ್ನು ಕಾಯ್ದುಕೊಂಡು ಸಾಲಿನಲ್ಲಿ ನಿಂತುಕೊಂಡಿದ್ದ ಜನ, ರೇಷನ್ ಕಿಟ್ ಕೊಡಲಾರಂಭಿಸಿದಾಗ ಗುಂಪು ಗುಂಪಾಗಿ ದಿನಸಿ ಪದಾರ್ಥವನ್ನು ಪಡೆಯಲು ಅಂತರ ಮರೆತು ಮುಗಿಬಿದ್ದರು.
ಪೊಲೀಸರು ದೂರ - ದೂರ ನಿಂತು ಸಾಲಿನಲ್ಲಿ ಬಂದು ರೇಷನ್ ಪಡೆದುಕೊಳ್ಳುವಂತೆ ಬೀದಿ ವ್ಯಾಪಾರಿಗಳಿಗೆ ಅದೆಷ್ಟೇ ಹೇಳಿದ್ರೂ ಯಾರೊಬ್ಬರೂ ಕೇರ್ ಮಾಡಲಿಲ್ಲ, ಎಲ್ಲಿ ರೇಷನ್ ಕಿಟ್ಗಳು ಖಾಲಿಯಾಗುತ್ತಿವೆ ಎಂಬ ಆತಂಕದಲ್ಲಿ ಗುಂಪು ಗುಂಪಾಗಿ ಮುಗಿಬಿದ್ದರು.
ಸಾಮಾಜಿಕ ಅಂತರವನ್ನು ಕಾಪಾಡಲು ಬಾಕ್ಸ್ಗಳನ್ನು ಹಾಕಲಾಗಿತ್ತು. ಆದರೆ, ಇದ್ಯಾವುದಕ್ಕೂ ಕ್ಯಾರೇ ಅನ್ನದ ಜನ ದಿನಸಿಗಾಗಿ ಮುಗಿಬಿದ್ದರು. ದಿನಸಿಗಾಗಿ ಕೆಲವು ಜನ ಟೋಕನ್ಗಳನ್ನು ಹಿಡಿದುಕೊಂಡು ಬಂದರೆ ಇನ್ನು ಕೆಲವು ಜನ ಟೋಕನ್ಗಳಿಲ್ಲದೆ ನಮಗೂ ಕೊಡಿ ನಮಗೂ ಕೊಡಿ ಎಂದು ದುಂಬಾಲು ಬಿದ್ದರು.
ಸಚಿವರ ಮುಂದೆ ಸಾಮಾಜಿಕ ಅಂತರ ಮಾಯವಾಗಿತ್ತು. ಪೊಲೀಸರು ಏನೂ ಮಾಡಲಾಗದೇ ಅಸಹಾಯಕರಾಗಿ ಮೂಕಪ್ರೇಕ್ಷಕರಂತೆ ನಿಲ್ಲುವಂತಾಯ್ತು.
