ಬಾಗಲಕೋಟೆ: ಈ ಹಿಂದೆ ಅಪ್ಪಾಜಿ ಕೈಯಿಂದ ಕೆಲಸ ಮಾಡಿಸುತ್ತಿದ್ದ ವಿಜಯೇಂದ್ರ, ಈಗ ಅಂಕಲ್ ಕಡೆಯಿಂದ ಕೆಲಸ ಮಾಡಿಸುತ್ತಿದ್ದಾನೆ ಎಂದು ಮಾಜಿ ಸಚಿವ, ಕಾಂಗ್ರೆಸ್ ಪಕ್ಷದ ಮುಖಂಡರಾದ ಎಚ್. ಎಮ್. ರೇವಣ್ಣ ವ್ಯಂಗ್ಯವಾಡಿದರು.
ನಗರದಲ್ಲಿ ಮಾತನಾಡಿದ ಅವರು, ಈ ಹಿಂದೆ ವಿಜಯೇಂದ್ರ ಅವರ ತಂದೆ ಸಿಎಂ ಅಗಿದ್ದಾಗ ಬೇಕಾದ ಕೆಲಸ ಮಾಡಿಸಿಕೊಳ್ಳುತ್ತಿದ್ದರು. ಸದ್ಯ ಅವರ ಅಂಕಲ್ ಬಸವರಾಜ ಬೊಮ್ಮಾಯಿ ಸಿಎಂ ಆಗಿದ್ದು, ಯಾವುದೇ ತೊಂದರೆ ಇಲ್ಲ ಎಂದು ರೇವಣ್ಣ ಅವರು ಹಾಸ್ಯ ಮಾಡಿದರು.
ಹಳೆ ಮದ್ಯ ಹೊಸ ಬಾಟಲ್, ಐದಾರು ಕ್ಯಾಪ್ಗಳು
ಯಡಿಯೂರಪ್ಪನ ಭ್ರಷ್ಟಾಚಾರ, ಸ್ವಜನಪಕ್ಷಪಾತ ಖಂಡಿಸಿ ಬಿಜೆಪಿ ಹೈಕಮಾಂಡ್ ಬದಲಾವಣೆ ಮಾಡಿತು. ಆದರೆ, ಅದು ಬೊಮ್ಮಾಯಿ ಸರ್ಕಾರದಲ್ಲಿ ಮುಂದುವರೆದಿದೆ. ಬೊಮ್ಮಾಯಿ ಸಂಪುಟದಲ್ಲಿ ಹಳೆ ಮಧ್ಯ ಹೊಸ ಬಾಟಲ್, ಐದಾರು ಜನ ಕ್ಯಾಪ್ಗಳು ಇಷ್ಟೆ, ಅದು ಬಿಟ್ಟು ಏನೂ ಬದಲಾವಣೆಯಾಗಿಲ್ಲ ಎಂದು ನೂತನ ಸರ್ಕಾರವನ್ನು ಟೀಕಿಸಿದರು.
ಕಮಲಪಾಳಯದಲ್ಲಿ ಮೂರು ಬಾಗಿಲು
ಬಿಜೆಪಿ ಒಂದು ಮನೆ ಮೂರು ಬಾಗಿಲು ಎಂಬಾಂತಾಗಿದೆ. ಮೂಲ ಬಿಜೆಪಿಗರು ಒಂದು ಗುಂಪು, ಜೆಡಿಎಸ್ನಿಂದ ಬಂದವರದ್ದು ಎರಡನೇ ಗುಂಪು, ಬಾಂಬೆ ಬಾಯ್ಸ್ಗಳದ್ದು 3ನೇ ಗುಂಪು. ಈ ಮೂರು ಗುಂಪುಗಳ ಹೊಂದಾಣಿಕೆ ಅಸಾಧ್ಯ ಎಂದು ಕುಟುಕಿದರು.
ಇದಕ್ಕೂ ಮುಂದೆ ಮುಧೋಳ, ಲೋಕಾಪುರ, ಬೀಳಗಿ ಸೇರಿದಂತೆ ವಿವಿಧ ಪ್ರದೇಶಳಿಗೆ ಭೇಟಿ ನೀಡಿ ಕೋವಿಡ್ ನಿಂದ ಮೃತ ಪಟ್ಟ ಕುಟುಂಬಸ್ಥರಿಗೆ ಸಾಂತ್ವನ ಹೇಳಿದರು. ಲಾಕ್ಡೌನ್ನಿಂದ ಉಂಟಾಗಿದ್ದ ಸಮಸ್ಯೆಗಳನ್ನು ಆಲಿಸಿದರು.
