ಪ್ಯಾರಿಸ್: ಮಣ್ಣಿನಂಕಣದ ದೊರೆ ಸ್ಪೇನ್ನ ರಾಫೆಲ್ ನಡಾಲ್ ಬುಧವಾರ ಅರ್ಜೆಂಟೀನಾದ ಡೀಗೋ ಸ್ವಾರ್ಟ್ಜ್ಮನ್ ಅವರನ್ನು ಮಣಿಸಿ 14ನೇ ಬಾರಿ ಫ್ರೆಂಚ್ ಓಪನ್ ಸೆಮಿಫೈನಲ್ ಪ್ರವೇಶಿಸಿದ್ದಾರೆ. ಬುಧವಾರ ನಡೆದ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ವಿಶ್ವದ 3ನೇ ಶ್ರೇಯಾಂಕಿತ ನಡಾಲ್ ಸ್ವಾರ್ಟ್ಜ್ಮನ್ ವಿರುದ್ಧ 6-3, 4-6, 6-4 6-0ಯಲ್ಲಿ ಮಣಿಸಿ ನಾಲ್ಕರ ಘಟ್ಟ ಪ್ರವೇಶಿಸಿದರು.
21ನೇ ವಿಶ್ವದಾಖಲೆಯ ಗ್ರ್ಯಾಂಡ್ಸ್ಲಾಮ್ ಮೇಲೆ ಕಣ್ಣಿಟ್ಟಿರುವ ನಡಾಲ್ 14ನೇ ರೋಲ್ಯಾಂಡ್ ಗ್ಯಾರೋಸ್ ಗೆದ್ದು ತಮ್ಮ ಹೆಸರಿನಲ್ಲಿರುವ ಒಂದು ಪ್ರಮುಖ ಟೂರ್ನಿಯನ್ನು ಹೆಚ್ಚು ಬಾರಿ ಗೆದ್ದಿರುವ ದಾಖಲೆಯನ್ನು ಉತ್ತಮ ಪಡಿಸಿಕೊಳ್ಳಲಿದ್ದಾರೆ.
ಸತತ 36 ಸೆಟ್ಗಳನ್ನು ಗೆದ್ದು ಮುನ್ನುಗ್ಗುತ್ತಿದ್ದ ನಡಾಲ್ ಈ ಪಂದ್ಯದಲ್ಲಿ 2ನೇ ಸೆಟ್ನಲ್ಲಿ ಸ್ವಾರ್ಟ್ಜ್ಮನ್ ಎದುರು 4-6ರಲ್ಲಿ ಸೋಲು ಕಂಡರು. ಆದರೂ ಪಂದ್ಯವನ್ನು ಮಾತ್ರ ನಿರಾಯಾಸವಾಗಿ ಗೆದ್ದರು. ವಿಶೇಷವೆಂದರೆ ಈ ಇಬ್ಬರು ಕ್ವಾರ್ಟರ್ ಫೈನಲ್ವರೆಗೂ ಒಂದೇ ಒಂದು ಸೆಟ್ ಕಳೆದುಕೊಂಡಿರಲಿಲ್ಲ. ಆದರೆ, ಈ ಪಂದ್ಯದಲ್ಲಿ ಇಬ್ಬರ ದಾಖಲೆಯ ಓಟಕ್ಕೆ ಬ್ರೇಕ್ ಬಿದ್ದಿತು.
ವಿಶ್ವದ 3ನೇ ಶ್ರೇಯಾಂಕದ ರಾಫೆಲ್ ನಡಾಲ್ ಸೆಮಿಫೈನಲ್ ಪಂದ್ಯದಲ್ಲಿ ವಿಶ್ವದ ನಂಬರ್ 1 ನೊವಾಕ್ ಜೋಕೊವಿಕ್ ಅಥವಾ ಮ್ಯಾಟಿಯೊ ಬೆರೆಟ್ಟಿನಿ ಸವಾಲನ್ನು ಎದುರಿಸಲಿದ್ದಾರೆ.
ಇದನ್ನು ಓದಿ: ಫ್ರೆಂಚ್ ಓಪನ್: 2ನೇ ಶ್ರೇಯಾಂಕದ ಮೆಡ್ವೆಡೆವ್ಗೆ ಶಾಕ್ ನೀಡಿ ಸೆಮಿಫೈನಲ್ ಪ್ರವೇಶಿಸಿದ ಸಿಟ್ಸಿಪಾಸ್
