ಲಂಡನ್: ಭಾರತದ ಟೆನಿಸ್ ತಾರೆ ಸಾನಿಯಾ ಮಿರ್ಜಾ ತಮ್ಮ ವೃತ್ತಿ ಜೀವನದ ಕೊನೆಯ ಟೆನಿಸ್ ಟೂರ್ನಿಯ ಅಂತಿಮ ಪಂದ್ಯದಲ್ಲಿ ನಿರಾಶೆ ಅನುಭವಿಸಿದರು. ವಿಂಬಲ್ಡನ್ ಪಂದ್ಯಾವಳಿಯಲ್ಲಿ ಅದ್ಭುತ ಪ್ರದರ್ಶನ ನೀಡಿ ಮಿಶ್ರ ಡಬಲ್ಸ್ನಲ್ಲಿ ಸೆಮಿಫೈನಲ್ ತಲುಪಿದ್ದ ಆಟಗಾರ್ತಿ ಸೋಲುವ ಮೂಲಕ ಪ್ರಶಸ್ತಿ ರೇಸ್ನಿಂದ ಹೊರಬಿದ್ದರು. ಕ್ರೊಯೇಷಿಯಾದ ಮೇಟ್ ಪಾವಿಕ್ ಜೊತೆಗೂಡಿ ಆಡಿದ ಸಾನಿಯಾ, ಸೆಮಿಫೈನಲ್‌ನಲ್ಲಿ ಎಡವಿ ವಿಂಬಲ್ಡನ್ ಚೊಚ್ಚಲ ಗ್ರ್ಯಾಂಡ್ ಸ್ಲಾಮ್ ಗೆಲ್ಲುವ ಕನಸು ಕೈಬಿಟ್ಟರು.
ಸಾನಿಯಾ ಮತ್ತು ಪಾವಿಕ್ ಕಠಿಣ ಹೋರಾಟದ ನಡುವೆಯೂ ಹಾಲಿ ಚಾಂಪಿಯನ್ ನೀಲ್ ಸ್ಕುಪ್ಸ್ಕಿ ಮತ್ತು ದೇಸಿರೆ ಕ್ರೌಜಿಕ್ ವಿರುದ್ಧ 6-4, 5-7, 4-6 ಸೆಟ್ಗಳ ಅಂತರದ ಪರಾಜಯ ಹೊಂದಿದರು. ಫೈನಲ್ಗೇರುವ ಭರವಸೆಯೊಂದಿಗೆ ಆಟ ಆರಂಭಿಸಿದ ಸಾನಿಯಾ-ಮೇವಿಟ್ ಜೋಡಿ ಮೊದಲ ಸೆಟ್ ಅನ್ನು 6-4ರಲ್ಲಿ ಗೆದ್ದು ಮುನ್ನಡೆ ಪಡೆಯಿತು. ಬಳಿಕ ತಿರುಗೇಟು ನೀಡಿದ ನೀಲ್ ಸ್ಕುಪ್ಸ್ಕಿ- ದೇಸಿರೆ ಕ್ರೌಜಿಕ್ 2ನೇ ಸೆಟ್ ಅನ್ನು 7-5 ರಲ್ಲಿ ಜಯಿಸಿತು.
ನಿರ್ಣಾಯಕ ಸೆಟ್ನಲ್ಲಿ ಸಾನಿಯಾ ಜೋಡಿ ಆಟದ ಮೇಲೆ ಹಿಡಿತ ಸಾಧಿಸದೇ 5-4 ರಲ್ಲಿ ಹಿನ್ನಡೆ ಸಾಧಿಸುವ ಮೂಲಕ ಹಾಲಿ ಚಾಂಪಿಯನ್ನರಿಗೆ ಶರಣಾದರು. ಸಾನಿಯಾ ಮಿರ್ಜಾ ಈ ವರ್ಷಾರಂಭದಲ್ಲಿ ವೃತ್ತಿಪರ ಟೆನಿಸ್‌ನಿಂದ ನಿವೃತ್ತಿಯಾಗುವುದಾಗಿ ಘೋಷಿಸಿದ್ದರು. ಕೊನೆಯ ಟೂರ್ನಿಯಾದ ವಿಂಬಲ್ಡನ್‌ನಲ್ಲಿ ಪ್ರಶಸ್ತಿ ಸಾಧನೆ ಮಾಡಿ ನಿವೃತ್ತಿ ಹೇಳುವ ಆಸೆಯಲ್ಲಿದ್ದ ಅವರಿಗೆ ಹಾಲಿ ಚಾಂಪಿಯನ್ನರು ಆಘಾತ ನೀಡಿದರು.
2009 ಮತ್ತು 2012 ರಲ್ಲಿ ಮಹೇಶ್ ಭೂಪತಿ ಅವರೊಂದಿಗೆ ಆಸ್ಟ್ರೇಲಿಯನ್ ಓಪನ್ ಮತ್ತು ಫ್ರೆಂಚ್ ಓಪನ್ ಮಿಶ್ರ ಡಬಲ್ಸ್ ಪ್ರಶಸ್ತಿಗಳನ್ನು ಗೆದ್ದಿರುವ ಸಾನಿಯಾ, ಒಟ್ಟು 6 ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿಗಳನ್ನು ಜಯಿಸಿದ್ದಾರೆ. ಮಹಿಳೆಯರ ಡಬಲ್ಸ್ ಸ್ಪರ್ಧೆಯ ಮೊದಲ ಸುತ್ತಿನಲ್ಲೇ ಲೂಸಿ ಹ್ರಾಡೆಕಾ ಅವರೊಂದಿಗೆ ಆಡಿದ್ದ ಭಾರತೀಯ ಆಟಗಾರ್ತಿ ಸೋತಿದ್ದರು.
ಇದನ್ನೂ ಓದಿ: ಮಲೇಷ್ಯಾ ಮಾಸ್ಟರ್ಸ್: ಎರಡನೇ ಸುತ್ತಿಗೆ ಸಿಂಧು, ಪ್ರಣೀತ್, ಕಶ್ಯಪ್
