ಬೆಂಗಳೂರು: ಪ್ರೋ ಕಬಡ್ಡಿ ಲೀಗ್‌ನ ಎರಡನೇ ದಿನದ ಮೊದಲ ರೋಚಕ ಪಂದ್ಯದಲ್ಲಿ ಪಾಟ್ನಾ ಪೈರೇಟ್ಸ್‌ ಹಾಗೂ ಪುಣೇರಿ ಪಲ್ಟನ್‌ ತಂಡಗಳು 35-35 ಅಂಕಗಳಿಂದ ಸಮಬಲ ಸಾಧಿಸಿದವು. ಇದು ಈ ಋತುವಿನ ಮೊದಲ ಸಮಬಲ ಸಾಧಿಸಿದ ಪಂದ್ಯವಾಗಿದೆ. ಪ್ರಥಮಾರ್ಧದಲ್ಲಿ 23-16 ರಿಂದ ಮುನ್ನಡೆ ಕಂಡಿದ್ದ ಪುಣೇರಿ ಪಲ್ಟನ್‌ ದ್ವಿತೀಯಾರ್ಧದಲ್ಲಿ ಆ ಮುನ್ನಡೆಯನ್ನು ಕಾಯ್ದುಕೊಳ್ಳುವಲ್ಲಿ ವಿಫಲವಾಯಿತು. ನಡುವೆ ಆಲೌಟ್‌ ಆದದ್ದು ತಂಡದ ಮನೋಬಲ ಕುಸಿಯಲು ಕಾರಣವಾಯಿತು. ಪಾಟ್ನಾ ಪೈರೇಟ್ಸ್‌ ಎದುರಾಳಿಗೆ ಏಳು ಬೋನಸ್‌ ಅಂಕಗಳನ್ನು ನೀಡಿದ್ದು ಜಯದಿಂದ ವಂಚಿತವಾಗಲು ಪ್ರಮುಖ ಕಾರಣವಾಯಿತು.
ಪಾಟ್ನಾ ಪೈರೇಟ್ಸ್‌ ಪರ ಸಚಿನ್‌ ರೈಡಿಂಗ್‌ನಲ್ಲಿ 7 ಅಂಕಗಳನ್ನು ಗಳಿಸಿದರೆ, ರೋಹಿತ್‌ ಗೂಲಿಯಾ 6 ಅಂಕಗಳನ್ನು ಗಳಿಸಿ ಉತ್ತಮ ಪ್ರದರ್ಶನ ನೀಡಿದರು. ತ್ಯಾಗರಾಜನ್‌ ಹಾಗೂ ಸುನೀಲ್‌ ಸೇರಿ ಟ್ಯಾಕಲ್‌ನಲ್ಲಿ 6 ಅಂಕಗಳನ್ನು ಗಳಿಸಿದರು.
ಪುಣೇರಿ ಪಲ್ಟನ್‌ ಪರ ಅಸ್ಲಾಮ್‌ ಇನಾಮ್ದಾರ್‌ 7, ಮೋಹಿತ್‌ ಗೊಯತ್‌ 8 ಹಾಗೂ ಆಕಾಶ್‌ ಶಿಂಧೆ 6 ರೈಡಿಂಗ್‌ ಅಂಕಗಳನ್ನು ಗಳಿಸಿ ತಂಡಕ್ಕೆ ನೆರವಾದರು. ಬಾದಲ್‌ ಸಿಂಗ್‌ ಮತ್ತು ಅಲಂಕಾರ್‌ ಪಾಟೀಲ್‌ ಟ್ಯಾಕಲ್‌ನಲ್ಲಿ ಒಟ್ಟು 5 ಅಂಕಗಳನ್ನು ಗಳಿಸಿದರು. ದ್ವಿತೀಯಾರ್ಧದ ಆರಂಭದಿಂದಲೇ ಪಾಟ್ನಾ ಪೈರೇಟ್ಸ್‌ ಆಕ್ರಮಣಕಾರಿ ಆಟ ಆರಂಭಿಸಿತು. ರೈಡಿಂಗ್‌ನಲ್ಲಿ ಸಚಿನ್‌ ಹಾಗೂ ವಿಶ್ವಾಸ ನಿರಂತರ ಯಶಸ್ಸು ಕಂಡರು. ಪರಿಣಾಮ ಪುಣೇರಿ ಪಲ್ಟನ್‌ ಆಲೌಟ್‌ ಆಯಿತು.
ಈ ಹಂತದಲ್ಲಿ ಪಾಟ್ನಾ ಪೈರೇಟ್ಸ್‌ 26-24 ಅಂತರದಲ್ಲಿ ಮುನ್ನಡೆ ಕಂಡಿತು. ಸಚಿನ್‌ ಹಾಗೂ ರೋಹಿರ್‌ ಗೂಲಿಯಾ ತಂಡದ ಮುನ್ನಡೆಗೆ ನೆರವಾದರು. ಆದರೆ, ಈ ಮುನ್ನಡೆ ಹೆಚ್ಚು ಕಾಲ ಉಳಿಯಲಿಲ್ಲ, ಉತ್ತಮ ರೈಡಿಂಗ್‌ ಮೂಲಕ ತಿರುಗೇಟು ನೀಡಿದ ಪುಣೇರಿ ಪಲ್ಟನ್‌ 30-30 ರಲ್ಲಿ ಸಮಬಲ ಸಾಧಿಸಿತು. ನಿರಂತರ ಬೋನಸ್‌ ಅಂಕಗಳನ್ನು ಗಳಿಸಿದ ಪುಣೇರಿ ಪಲ್ಟನ್‌ ಒಂದು ಪಂದ್ಯ ಮುಗಿಯಲು ನಾಲ್ಕು ನಿಮಿಷ ಬಾಕಿ ಇರುವಂತೆ 32-31 ರಲ್ಲಿ ಮೇಲುಗೈ ಸಾಧಿಸಿತು.
ಇದನ್ನೂ ಓದಿ: Pro Kabaddi: ಗುಜರಾತ್ ಜೈಂಟ್ಸ್‌ ಹಾಗೂ ತಮಿಳು ತಲೈವಾಸ್ ರೋಚಕ ಕಾದಾಟ... ಕೊನೆಗೆ ಟೈ
ಪ್ರಥಮಾರ್ಧದಲ್ಲಿ ಪುಣೇರಿ ಪಲ್ಟನ್‌ ಮುನ್ನಡೆ: ಪಾಟ್ನಾ ಪೈರೇಟ್ಸ್‌ ಆರಂಭದಲ್ಲಿ ಉತ್ತಮ ರೀತಿಯಲ್ಲೇ ಮುನ್ನಡೆ ಕಂಡಿತ್ತು. ಪಂದ್ಯದ 10ನೇ ನಿಮಿಷದಲ್ಲಿ ಪುಣೇರಿ ಪಲ್ಟನ್‌ ಆಲೌಟ್‌ ಆಗುವ ಮೂಲಕ ಪಾಟ್ನಾ ಪೈರೇಟ್ಸ್‌ 12-9 ರ ಅಂತರದಲ್ಲಿ ಮುನ್ನಡೆ ಕಂಡಿತ್ತು. ಆದರೆ, ಆ ನಂತರ ಪಾಟ್ನಾ ಪೈರೇಟ್ಸ್‌ ಪಂದ್ಯದ ಮೇಲೆ ಹಿಡಿತ ಕಳೆದುಕೊಂಡಿತು. ನಿರಂತರವಾಗಿ ಎದುರಾಳಿ ತಂಡಕ್ಕೆ ಅಂಕಗಳನ್ನು ನೀಡುತ್ತಾ ಆ ಮೂಲಕ ಪಾಟ್ನಾ ಪೈರೇಟ್ಸ್‌ ಕೂಡ ಆಲೌಟ್‌ ಆಗಿ ಪ್ರಥಮಾರ್ಧದಲ್ಲಿ 16-23 ಪುಣೇರಿ ಪಲ್ಟನ್‌ ಮೇಲುಗೈ ಸಾಧಿಸಿತು. ಪುಣೇರಿ ಪಲ್ಟನ್‌ ರೈಡಿಂಗ್‌ನಲ್ಲಿ 14 ಅಂಕಗಳನ್ನು ಗಳಿಸಿತು.
ಮೋಹಿತ್‌ ಗೋಯತ್‌ ಪ್ರಮುಖ ಪಾತ್ರ: ಮೋಹಿತ್‌ ಗೋಯತ್‌ ರೈಡಿಂಗ್‌ನಲ್ಲಿ 8 ಅಂಕಗಳನ್ನು ಗಳಿಸಿ ಪುಣೇರಿ ಪಲ್ಟನ್‌ ತಂಡದ ಮುನ್ನಡೆಯಲ್ಲಿ ಪ್ರಮುಖ ಪಾತ್ರವಹಿಸಿದರು. ಆಕಾಶ್‌ ಶಿಂಧೆ 4 ಅಂಕಗಳನ್ನು ಗಳಿಸಿ ಮುನ್ನಡೆಗೆ ನೆರವಾದರು. ಪಾಟ್ನಾ ಪೈರೇಟ್ಸ್‌ ಪರ ಸಚಿನ್‌ 3 ಅಂಕಗಳನ್ನು ಗಳಿಸಿದೆ, ಕನ್ನಡಿಗ ವಿಶ್ವಾಸ್‌ ಎರಡು ಅಂಕಗಳನ್ನು ಗಳಿಸಿದರು. ಹೆಚ್ಚಾಗಿ ಯುವ ಆಟಗಾರರಿಂದ ಕೂಡಿರುವ ಪಾಟ್ನಾ ಪೈರೇಟ್ಸ್‌ ರೈಡಿಂಗ್‌ನಲ್ಲಿ ಹಿನ್ನಡೆ ಕಂಡಿರುವುದು ಸ್ಪಷ್ಟವಾಗಿತ್ತು.
ಕನ್ನಡಿಗರ ಮುಖಾಮುಖಿ: ಪಾಟ್ನಾ ಪೈರೇಟ್ಸ್‌ ಹಾಗೂ ಪುಣೇರಿ ಪಲ್ಟನ್‌ ತಂಡಗಳನ್ನು ಗಮನಿಸಿದಾಗ ಅದು ಕನ್ನಡಿಗರ ಮುಖಾಮುಖಿ ಎಂಬುದು ಸ್ಪಷ್ಟವಾಗುತ್ತದೆ. ಪುಣೇರಿ ಪಲ್ಟನ್‌ ತಂಡದ ಕೋಚ್‌ ಬಿ ಸಿ ರಮೇಶ್‌ ಹಾಗೂ ಪಾಟ್ನಾ ಪೈರೇಟ್ಸ್‌ ತಂಡದ ಕೋಚ್‌ ಆಗಿ ರವಿ ಶೆಟ್ಟಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಪಾಟ್ನಾ ಪೈರೇಟ್ಸ್‌ ತಂಡದಲ್ಲಿ ಮಂಡ್ಯದ ವಿಶ್ವಾಸ್‌ ಹಾಗೂ ಭಟ್ಕಳದ ರಂಜಿತ್‌ ನಾಯ್ಕ್‌ ಆಟಗಾರರಾಗಿದ್ದಾರೆ.
