ನವದೆಹಲಿ: ಕಾಮನ್ವೆಲ್ತ್ ಗೇಮ್ಸ್ಗಾಗಿ ನಡೆಸಲಾದ ಆಯ್ಕೆ ಟ್ರಯಲ್ಸ್ನಲ್ಲಿ ಟೋಕಿಯೊ ಒಲಿಂಪಿಕ್ಸ್ ಕಂಚಿನ ಪದಕ ವಿಜೇತೆ ಲವ್ಲಿನಾ ಬೊರ್ಗೊಹೇನ್ ಮತ್ತು ಹಾಲಿ ವಿಶ್ವ ಚಾಂಪಿಯನ್ ನಿಖತ್ ಜರೀನ್ ಅವರು ನಿರೀಕ್ಷೆಯಂತೆ ಆಯ್ಕೆಯಾಗಿದ್ದಾರೆ. ಶನಿವಾರ ನಡೆದ ಟ್ರಯಲ್ಸ್ನ ಫೈನಲ್ ಪಂದ್ಯದಲ್ಲಿ ಈ ಇಬ್ಬರು ಮೇರು ಆಟಗಾರ್ತಿಯರು ಎದುರಾಳಿಗಳನ್ನು ಮಣಿಸಿ ತಾವು ಕಾಮನ್ವೆಲ್ತ್ ಗೇಮ್ಸ್ಗೆ ಸಿದ್ಧ ಎಂದು ತೋರಿಸಿಕೊಟ್ಟಿದ್ದಾರೆ.
ಇಲ್ಲಿನ ಇಂದಿರಾಗಾಂಧಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಮೂರು 3 ದಿನಗಳ ಟ್ರಯಲ್ಸ್ನಲ್ಲಿ ಸ್ಟಾರ್ ಬಾಕ್ಸರ್ ಲವ್ಲಿನಾ, ನಿಖತ್ ಜರೀನ್ ಸೇರಿದಂತೆ ನಿತು (48ಕೆಜಿ) ಮತ್ತು ಜೈಸ್ಮಿನ್ (60ಕೆಜಿ) ವಿಭಾಗದಲ್ಲಿ ಸ್ಥಾನ ಪಡೆದಿದ್ದಾರೆ. ಟ್ರಯಲ್ಸ್ನ ಫೈನಲ್ ಪಂದ್ಯದಲ್ಲಿ ಲವ್ಲಿನಾ 70 ಕೆಜಿ ವಿಭಾಗದಲ್ಲಿ ಪೂಜಾ ಅವರನ್ನು ಸೋಲಿಸಿದರೆ, ನಿಖತ್ 50 ಕೆಜಿ ವಿಭಾಗದಲ್ಲಿ ಮೀನಾಕ್ಷಿ ಅವರನ್ನು ಮಣಿಸಿದರು. ಇವರು ಕ್ರಮವಾಗಿ 7-0 ಅಂತರದಲ್ಲಿ ಎದುರಾಳಿ ವಿರುದ್ಧ ಜಯ ಗಳಿಸಿದರು.
ಮಂಜು ರಾಣಿ ವಿರುದ್ಧ ನಿತು ಪರಾಕ್ರಮ: ದಿನದ ರೋಚಕ ಪಂದ್ಯದಲ್ಲಿ ಬಾಕ್ಸರ್ ನಿತು, 2019 ರ ವಿಶ್ವ ಚಾಂಪಿಯನ್‌ಶಿಪ್‌ನ ಬೆಳ್ಳಿ ಪದಕ ವಿಜೇತೆ ಮಂಜು ರಾಣಿ ವಿರುದ್ಧ 5-2 ರಿಂದ ಗೆಲುವು ಸಾಧಿಸಿದರು. ಮೊದಲ ಸುತ್ತಿನಲ್ಲಿ ನಿತು ಸೋತರೂ, ನಂತರದ ಸುತ್ತುಗಳಲ್ಲಿ ಕಠಿಣ ಸ್ಪರ್ಧಿ ಮಂಜು ರಾಣಿಯನ್ನು ಸದೆಬಡಿದು, ಆಯ್ಕೆಗೆ ಅರ್ಹತೆ ಪಡೆದರು.
ಇನ್ನೊಂದು ಪಂದ್ಯದಲ್ಲಿ ಜೈಸ್ಮಿನ್ ಅವರು ಕೂಡ 2022 ರ ವಿಶ್ವ ಚಾಂಪಿಯನ್‌ಶಿಪ್‌ನ ಕಂಚಿನ ಪದಕ ವಿಜೇತೆ ಪರ್ವೀನ್ ಅವರ ಎದುರು ಫೈನಲ್‌ನಲ್ಲಿ ಕಠಿಣ ಸವಾಲನ್ನು ಎದುರಿಸಿದರು. ಅಂತಿಮವಾಗಿ 6-1 ಅಂತರದಿಂದ ಗೆಲ್ಲುವಲ್ಲಿ ಯಶಸ್ವಿಯಾಗಿ ಕಾಮನ್ವೆಲ್ತ್ ಗೇಮ್ಸ್ಗೆ ಅರ್ಹತೆ ಪಡೆದುಕೊಂಡರು.
ಬಾಕ್ಸಿಂಗ್ ಫೆಡರೇಶನ್ ಆಫ್ ಇಂಡಿಯಾ ಜುಲೈ 28 ರಿಂದ ಆಗಸ್ಟ್ 8 ರವರೆಗೆ ನಡೆಯುವ ಗೇಮ್ಸ್ಗಾಗಿ 8 ಪುರುಷ ಬಾಕ್ಸರ್‌ಗಳು ಮತ್ತು 4 ಮಹಿಳಾ ಬಾಕ್ಸರ್ಗಳನ್ನು ಒಳಗೊಂಡ ಭಾರತೀಯ ಬಾಕ್ಸಿಂಗ್ ತಂಡವನ್ನು ಪ್ರಕಟಿಸಿದೆ.
ಪುರುಷರ ತಂಡ ಇಂತಿದೆ: ಶಿವ ಥಾಪಾ (63.5 ಕೆಜಿ), ಅಮಿತ್ ಪಂಗಲ್ (51 ಕೆಜಿ), ಮೊಹಮ್ಮದ್ ಹುಸಾಮುದ್ದೀನ್ (57 ಕೆಜಿ), ರೋಹಿತ್ ಟೋಕಾಸ್ (67 ಕೆಜಿ), ಸುಮಿತ್ (75 ಕೆಜಿ), ಆಶಿಶ್ ಕುಮಾರ್ (80 ಕೆಜಿ), ಸಂಜೀತ್ (92 ಕೆಜಿ) ಮತ್ತು ಸಾಗರ್ (+92 ಕೆಜಿ) ಸ್ಥಾನ ಪಡೆದಿದ್ದಾರೆ.
ಓದಿ: IPL ಟೂರ್ನಿ ಪ್ರಸಾರದ ಹಕ್ಕು ಮಾರಾಟ: ರೇಸ್ನಿಂದ ಅಮೆಜಾನ್ ಔಟ್.. ಸ್ಪರ್ಧೆಯಲ್ಲಿ ಸೋನಿ, ಸ್ಟಾರ್
