ಕೋಯಿಕ್ಕೋಡ್ (ಕೇರಳ): ಕೋಯಿಕ್ಕೋಡ್ನ ಗುಡ್ಡಕಾಡು ಹಳ್ಳಿಯ ಯುವತಿಯೊಬ್ಬಳು ಫಾರ್ಮುಲಾ ಒನ್ ಕಾರ್ ರೇಸಿಂಗ್ನಲ್ಲಿ ಅಂತಾರಾಷ್ಟ್ರೀಯ ಚಾಂಪಿಯನ್ ಆಗಲು ತಯಾರಾಗಿದ್ದಾಳೆ. ಚಕ್ಕಿತ್ತಪರದ ಚೆಂಬ್ರಾ ಮೂಲದ ಸಾಲ್ವ ಮರ್ಜನ್, ಬಹುತೇಕ ಪುರುಷ ಕ್ರೀಡಾಪಟುಗಳ ಪ್ರಾಬಲ್ಯವಿರುವ ಮೋಟಾರು ಕ್ರೀಡೆಗಳಲ್ಲಿ ಸಾಧನೆಯ ಪತಾಕೆಯನ್ನು ಹಾರಿಸಲು ಸಜ್ಜಾಗಿದ್ದಾರೆ.
ನವೆಂಬರ್ 4 ಹಾಗೂ 5 ರಂದು ಚೆನ್ನೈನಲ್ಲಿ ನಡೆಯಲಿರುವ ಎಫ್4 ಕಾರ್ ರೇಸಿಂಗ್ ಚಾಂಪಿಯನ್ಶಿಪ್ನಲ್ಲಿ ಸರ್ಧಿಸಲು ಕಠಿಣ ಅಭ್ಯಾಸ ನಡೆಸುತ್ತಿದ್ದಾರೆ. 23ರ ಹರೆಯದ ಯುವತಿ ಸಾಲ್ವ ಮರ್ಜನ್ ಅತ್ಯಾಧುನಿಕ ಹ್ಯಾಲೊ ಸುರಕ್ಷತಾ ವ್ಯವಸ್ಥೆಗಳೊಂದಿಗೆ ಚಾಂಪಿಯನ್ಶಿಪ್ಗೆ ಸಜ್ಜಾಗಿದ್ದಾರೆ. ಎಫ್ ಫಾರ್ ಯುಎಇ ಹಾಗೂ ಎಫ್ ಫಾರ್ ಬ್ರಿಟನ್ ಚಾಂಪಿಯನ್ಶಿಪ್ಗಾಗಿ ದುಬೈನಲ್ಲಿ ತರಬೇತಿ ಪಡೆದು ಚೆನ್ನೈಗೆ ಬಂದಿರುವ ಸಾಲ್ವಾ ಭಾರತದ ಮೊದಲ ಅಂತಾರಾಷ್ಟ್ರೀಯ ರೇಸರ್ ಆಗಲು ಕಠಿಣ ಪರಿಶ್ರಮ ಪಡುತ್ತಿದ್ದಾರೆ.
ಚೆಂಬ್ರಾ ಪಣಜಿಂಗಲ್ ಕುಂಜಾಮು ಹಾಗೂ ಸುಬೈದಾ ದಂಪತಿಯ ಪುತ್ರಿಯಾದ ಸಾಲ್ವ ಸಣ್ಣ ವಯಸ್ಸಿನಲ್ಲೇ ವಾಹನ ಚಾಲನೆಯಲ್ಲಿ ಆಸಕ್ತಿ ಹೊಂದಿದ್ದರು. ಅದೇ ಆಸಕ್ತಿಯನ್ನು ಕ್ರೀಡಾ ಕ್ಷೇತ್ರದಲ್ಲಿಯೂ ಮುಂದುವರಿಸಿದ್ದು, ಕಳೆದ 8 ವರ್ಷಗಳಿಂದ ರೇಸಿಂಗ್ ಟ್ರ್ಯಾಕ್ನಲ್ಲಿ ಚಾಂಪಿಯನ್ ಆಗಲು ಶ್ರಮಿಸುತ್ತಿದ್ದಾರೆ. 8 ವರ್ಷಗಳ ಕನಸನ್ನು ನನಸು ಮಾಡಿಕೊಳ್ಲಲು ಇದೀಗ ಅವಕಾಶ ಒದಗಿ ಬಂದಿದ್ದು, ಈ ಪ್ರತಿಭೆಗೆ ಕುಟುಂಬದ ಪ್ರೋತ್ಸಾಹವೇ ಶಕ್ತಿಯಾಗಿದೆ.
ಫಾರ್ಮುಲಾ ಎಲ್ಜಿಬಿ, ಸಿಂಗಲ್ ಸೀಟರ್, ಡಿಟಿಎಸ್ ರೇಸಿಂಗ್ನಲ್ಲಿ ಓಪನ್ ವ್ಹೀಲ್ ಕ್ಲಾಸ್ ರೇಸ್ ಕಾರ್ಗಳೊಂದಿಗೆ ತನ್ನ ರೇಸಿಂಗ್ ಪ್ರಯಾಣ ಪ್ರಾರಂಭಿಸಿದ ಸಾಲ್ವಾ ಅವರ ಉತ್ಸಾಹ ಹಾಗೂ ಪ್ರತಿಭೆ ಈ ಕ್ಷೇತ್ರದಲ್ಲಿ ಅವರು ಮಿಂಚುವಂತೆ ಮಾಡಿದೆ. ಅಂತಾರಾಷ್ಟ್ರೀಯ ಚಾಂಪಿಯನ್ಶಿಪ್ ಅನ್ನು ತಮ್ಮ ಮುಡಿಗೇರಿಸಿಕೊಳ್ಳುವ ಗುರಿ ಹೊಂದಿರುವ ಸಾಲ್ವಾ, ಭಾರತದ ಹೆಸರನ್ನು ಆಕಾಶದೆತ್ತರಕ್ಕೆ ಕೊಂಡೊಯ್ಯುವ ಕನಸು ಹೊಂದಿದ್ದಾರೆ. ಫಾರ್ಮುಲಾ ರೇಸಿಂಗ್ನಲ್ಲಿ ಭಾರತವನ್ನು ಪ್ರತಿನಿಧಿಸುವ ತಮ್ಮ ಅಂತಿಮ ಗುರಿಯತ್ತ ಸಾಗಲು ಸತತ ಪ್ರಯತ್ನದಲ್ಲಿದ್ದಾರೆ ಸಾಲ್ವಾ. ಚೆನ್ನೈ ಎಫ್4 ರೇಸಿಂಗ್ ಚಾಂಪಿಯನ್ಶಿಪ್ನಲ್ಲಿ ಮೊದಲು ಅರ್ಹತಾ ವಿಭಾಗದಲ್ಲಿ ಭಾಗವಹಿಸಲಿದ್ದಾರೆ.
ಈ ಫಾರ್ಮುಲಾ 4 ರೇಸ್ನಲ್ಲಿ ಮೂರು ರೇಸ್ಗಳಿರುತ್ತವೆ. ಎಲ್ಲ ಮೂರು ವಿಭಾಗಗಳು ಒಂದೇ ದೂರವನ್ನು ಹೊಂದಿರುತ್ತವೆ. ಫಾರ್ಮುಲಾ 3 ಹಾಗೂ ಫಾರ್ಮುಲಾ 2 ನಲ್ಲಿ ಇದು ಬದಲಾಗುತ್ತದೆ. ಎಫ್4 ನಂತರ ಸಾಲ್ವ ಎಫ್3 ಯಿಂದ ಎಫ್2 ಹಾಗೂ ಅಂತಿಮವಾಗಿ ಎಫ್1ಗೆ ಅತ್ಯುನ್ನತ ಮಟ್ಟದಲ್ಲಿ ಸ್ಪರ್ಧಿಸಲು ತಯಾರಿ ನಡೆಸುತ್ತಾರೆ. ಅದರಲ್ಲಿ ಸ್ಪರ್ಧಿಸಲು ಸಾಲ್ವಾ ಅವರು ಈ ರೇಸ್ ಗೆಲ್ಲಬೇಕಾಗಿದೆ. ನಂತರ ಅವರು ಎಫ್3, ಎಫ್2 ನಂತರ ಎಫ್1 ನಂತಹ ಉನ್ನತ ಹಂತಗಳಲ್ಲಿ ಭಾರತವನ್ನು ಪ್ರತಿನಿಧಿಸಲಿದ್ದಾರೆ.
ಒಟ್ಟಿನಲ್ಲಿ ಪುರುಷರೇ ಮೇಲುಗೈ ಸಾಧಿಸಿರುವ ಈ ಕಾರ್ ರೇಸ್ ಕ್ರೀಡಾ ಕ್ಷೇತ್ರದಲ್ಲಿ ಅಂತಾರಾಷ್ಟ್ರೀಯ ಚಾಂಪಿಯನ್ ಆಗುವ ಕನಸಿನೊಂದಿಗೆ ರೇಸಿಂಗ್ ಟ್ರ್ಯಾಕ್ಗೆ ಇಳಿದಿರುವ ಸಾಲ್ವ ಮರ್ಜನ್ ಅವರ ಯಶಸ್ಸಿಗೆ ಇಡೀ ಭಾರತವೇ ಹಾರೈಸುತ್ತಿದೆ.
ಇದನ್ನೂ ಓದಿ : ಇತಿಹಾಸ ನಿರ್ಮಿಸಿದ ವಂದನಾ ಕಟಾರಿಯಾ; 300 ಹಾಕಿ ಪಂದ್ಯ ಆಡಿದ ಮೊದಲ ಭಾರತೀಯ ಆಟಗಾರ್ತಿ
