ಹೈದರಾಬಾದ್​ನಲ್ಲಿಂದು ಕಾರು​ಗಳ ರೊಯ್​ ರೊಯ್​ ಸದ್ದು, ಫಾರ್ಮುಲಾ-ಇ ಚಾಂಪಿಯನ್​ಶಿಪ್​ ಸ್ಪರ್ಧೆ

ಫಾರ್ಮುಲಾ ಇ ರೇಸಿಂಗ್​ ವಿಶ್ವ ಚಾಂಪಿಯನ್​- ಹೈದಾರಾಬಾದ್​ನ ಎನ್​ಟಿಆರ್​ ರಸ್ತೆಯಲ್ಲಿ ರೇಸ್​- ಇ ಕಾರ್ ರೇಸ್‌- ದೇಶದ ಮೊದಲ ಫಾರ್ಮುಲಾ ಒನ್ ರೇಸ್- ಗ್ಯಾಲರಿಗಳಿಗೆ ಅನುಮತಿಸುವ ಮೊದಲು ಬಿಗಿ ತಪಾಸಣೆ

ಹೈದರಾಬಾದ್​: ಅತ್ಯಂತ ಜನಪ್ರಿಯವಾದ ರೇಸಿಂಗ್ ಕ್ರೀಡೆ ಫಾರ್ಮುಲಾ-ಇ ವಿಶ್ವ ಚಾಂಪಿಯನ್‌ಶಿಪ್ ಇಂದು ನಡೆಯಲಿದೆ. ಹುಸೇನ್​ಸಾಗರದ ಎನ್‌ಟಿಆರ್‌ ರಸ್ತೆ ಮಾರ್ಗದಲ್ಲಿ ಇ-ಕಾರ್ ರೇಸ್‌ ನಡೆಯಲಿದೆ. ವಿಶೇಷ ಅಂದ್ರೆ ಭಾರತದಲ್ಲಿ ನಡೆಯುತ್ತಿರುವ ಮೊದಲ ಫಾರ್ಮುಲಾ ಒನ್ ರೇಸ್ ಇದಾಗಿದೆ. ಫಾರ್ಮುಲಾ-ಇ ಚಾಂಪಿಯನ್‌ಶಿಪ್ ಹಿನ್ನೆಲೆಯಲ್ಲಿ 5 ದಿನಗಳಿಂದ ಈ ಮಾರ್ಗದಲ್ಲಿ ಸಂಚಾರ ನಿರ್ಬಂಧಿಸಲಾಗಿದೆ.

ನಿನ್ನೆ ಮಧ್ಯಾಹ್ನದಿಂದ ಸಂಜೆಯವರೆಗೆ ಚಾಲಕರು ಕಾರ್ ರೇಸ್ ಅಭ್ಯಾಸ ನಡೆಸಿದರು. ಇಂದಿನ ಸ್ಪರ್ಧೆಯನ್ನು ವೀಕ್ಷಿಸಲು ಕ್ರಿಕೆಟ್, ಸಿನಿಮಾ ತಾರೆಯರು ಹಾಗೂ ದೇಶ, ವಿದೇಶಗಳ ಗಣ್ಯರು ಪಾಲ್ಗೊಳ್ಳಲಿದ್ದಾರೆ. ಸ್ಪರ್ಧೆಯ ಪ್ರದೇಶವನ್ನು ಪ್ರವೇಶಿಸಲು ಪಾಸ್ ಅಥವಾ ಟಿಕೆಟ್ ಕಡ್ಡಾಯವಾಗಿದೆ. ಅಂತಾರಾಷ್ಟ್ರೀಯ ಸ್ಪರ್ಧೆಯಾದ ಕಾರಣ ಪೊಲೀಸರು ಬಿಗಿ ಭದ್ರತೆ ಒದಗಿಸಿದ್ದು, ಪ್ರೇಕ್ಷಕರನ್ನು ಗ್ಯಾಲರಿಗಳಿಗೆ ಅನುಮತಿಸುವ ಮೊದಲು ಬಿಗಿ ತಪಾಸಣೆ ನಡೆಸಲಾಗುತ್ತದೆ.

ಪ್ರೇಕ್ಷಕರಿಗೆ ಮೊಬೈಲ್​ ನಿಷೇಧ: ರೇಸ್​ಗೆ ವೀಕ್ಷಿಸಲು ಆಗಮಿಸುವ ವೀಕ್ಷಕರು ಮೊಬೈಲ್‌ ತರುವಂತಿಲ್ಲ. ಶನಿವಾರ ಬೆಳಗ್ಗೆ 8 ಗಂಟೆಗೆ ಪೂರ್ವ ಅಭ್ಯಾಸ ನಡೆಸಲಿದ್ದಾರೆ. ನಂತರ ಚಾಲಕರು ಮುಖ್ಯ ರೇಸ್‌ಗಾಗಿ ಅಖಾಡ ಪ್ರವೇಶಿಸಲಿದ್ದಾರೆ. ಈ ರೇಸ್ ಒಂದೂವರೆ ಗಂಟೆಗಳ ಕಾಲ ನಡೆಯಲಿದೆ. ಈ ರೇಸ್​ ಮೂಲಕ ಹೈದರಾಬಾದ್‌ನಲ್ಲಿ ಭಾರತೀಯ ಮೋಟಾರ್ ಕ್ರೀಡೆಯಲ್ಲಿ ಹೊಸ ಅಧ್ಯಾಯವೊಂದು ಆರಂಭವಾಗಲಿದೆ. ಫಾರ್ಮುಲಾ ಒನ್ ನಂತರ ಹೈದರಾಬಾದ್ ಅತ್ಯಂತ ಜನಪ್ರಿಯ ಫಾರ್ಮುಲಾ-ಇ ವಿಶ್ವ ಚಾಂಪಿಯನ್‌ಶಿಪ್ ಅನ್ನು ಆಯೋಜಿಸುತ್ತಿದೆ. ದೇಶದಲ್ಲಿಯೇ ಮೊದಲ ಫಾರ್ಮುಲಾ ಒನ್ ರೇಸ್ ಇದಾಗಿದೆ.

22 ರೇಸರ್​ಗಳು ಭಾಗಿ: 11 ಪ್ರಮುಖ ಆಟೋಮೊಬೈಲ್ ಕಂಪನಿಗಳ ಎಲೆಕ್ಟ್ರಿಕ್ ಕಾರುಗಳು ಸ್ಪರ್ಧೆಯಲ್ಲಿ ಭಾಗವಹಿಸಲಿವೆ. 22 ರೇಸರ್‌ಗಳು ಸ್ಪರ್ಧಿಸಲಿದ್ದಾರೆ. ಭದ್ರತೆಗಾಗಿ ಎನ್​ಟಿಆರ್​ ರಸ್ತೆ ಸರ್ಕ್ಯೂಟ್‌ನ ಎರಡೂ ಬದಿಗಳಲ್ಲಿ ದೊಡ್ಡ ಪ್ರಮಾಣದ ಬ್ಯಾರಿಕೇಡ್‌ಗಳು ಮತ್ತು ಪ್ರೇಕ್ಷಕರ ಗ್ಯಾಲರಿಗಳನ್ನು ಸ್ಥಾಪಿಸಲಾಗಿದೆ.

ಓದಿ: ನಡೆದಾಡಲು ಶುರು ಮಾಡಿದ ರಿಷಬ್​ ಪಂತ್; ಫೋಟೋ ಹಂಚಿಕೊಂಡ ಕ್ರಿಕೆಟಿಗ

ಅಂತಾರಾಷ್ಟ್ರೀಯ ಕ್ರೀಡಾಕೂಟದಲ್ಲಿ ಸ್ವಯಂಸೇವಕರಾಗಿ ಆಯ್ಕೆಯಾಗಿರುವುದು ತುಂಬಾ ಥ್ರಿಲ್ಲಿಂಗ್ ಆಗಿದೆ. ನಾವು 40 ಸ್ನೇಹಿತರು ಇಲ್ಲಿ ಸೇವೆ ಸಲ್ಲಿಸಲು ಬಂದಿದ್ದೇವೆ. ಪೀಪಲ್ಸ್ ಪ್ಲಾಜಾದಲ್ಲಿ ಸ್ಥಾಪಿಸಲಾದ ಪ್ರೇಕ್ಷಕರ ಗ್ಯಾಲರಿಯಲ್ಲಿ ಕರ್ತವ್ಯ ನಿರ್ವಹಿಸಲಿದ್ದೇನೆ ಎಂದು ಸ್ವಯಂಸೇವಕಿ ಬಿ.ನಿಹಾರಿಕಾ ಹೇಳಿದರು.

ರಸ್ತೆ ಮೇಲೆ ಬಂದ ವಾಹನಗಳು: ರೇಸ್​ ನಡೆಯಬೇಕಿರುವ ಒಂದು ದಿನ ಮುಂಚೆ ಅಂದರೆ ನಿನ್ನೆ ಎನ್​ಟಿಆರ್​ ರಸ್ತೆಯ ಮೇಲೆ ವಾಹನಗಳು ಏಕಾಏಕಿ ದಾಂಗುಡಿ ಇಟ್ಟವು. ರೇಸ್​ ಹಿನ್ನೆಲೆಯಲ್ಲಿ ಈ ರಸ್ತೆಯನ್ನು ಸಂಚಾರಕ್ಕಾಗಿ ಬಂದ್​ ಮಾಡಲಾಗಿತ್ತು. ಬ್ಯಾರಿಕೇಡ್​ಗಳನ್ನು ಅಳವಡಿಸಲಾಗಿದ್ದನ್ನು ವಾಹನ ಸವಾರರು ಬದಿಗೆ ಸರಿಸಿ ರಸ್ತೆ ಮೇಲೆ ಏಕಾಏಕಿ ಬಂದಿದ್ದರು. ಇದರಿಂದ ಕೆಲಕಾಲ ಆತಂಕ ಉಂಟಾಗಿತ್ತು. ಬಳಿಕ ಪೊಲೀಸರು ಎಲ್ಲರನ್ನೂ ತಡೆದು ಮತ್ತೆ ರಸ್ತೆ ಬಂದ್​ ಮಾಡಿದರು. ಇದರಿಂದಾಗಿ ಶುಕ್ರವಾರ ಸಂಜೆ 4.30ಕ್ಕೆ ಆರಂಭವಾಗಬೇಕಿದ್ದ ಅಭ್ಯಾಸ 5.15ಕ್ಕೆ ಆರಂಭವಾಯಿತು.

ಓದಿ: ಜಮ್ಮು ಕಾಶ್ಮೀರದಲ್ಲಿ ಖೇಲೋ ಇಂಡಿಯಾ ಆಯೋಜನೆ.. ಪ್ರವಾಸೋದ್ಯಮಕ್ಕೂ ಕ್ರೀಡೆ ಪುಷ್ಠಿ