ದೋಹಾ(ಕತಾರ್): ಫ್ರಾನ್ಸ್ ತನ್ನ ಮೊದಲ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡವನ್ನು 4-1 ಗೋಲುಗಳ ಅಂತರದಿಂದ ಗೆದ್ದು ಬೀಗಿದ ಬಳಿಕ ತನ್ನ ಓಟ ಮುಂದುವರೆಸಿದೆ. ನಿನ್ನೆ ಡೆನ್ಮಾರ್ಕ್ ವಿರುದ್ಧದ ಪಂದ್ಯವನ್ನು 2-1 ರಿಂದ ಕೈವಶ ಮಾಡಿಕೊಂಡು ಇದೀಗ ಫಿಫಾ ವಿಶ್ವಕಪ್ನ ನಾಕೌಟ್ ಹಂತಕ್ಕೆ ಲಗ್ಗೆ ಇಟ್ಟಿತು. ಗೆಲುವಿಗಾಗಿ ಜಿದ್ದಾಜಿದ್ದಿನಲ್ಲಿ ಎರಡೂ ತಂಡಗಳು ಹೋರಾಡಿದವು. ಆದರೆ ಅಂತಿಮವಾಗಿ ಫ್ರಾನ್ಸ್ ಗೆಲುವಿನ ಕೇಕೆ ಹಾಕಿತು.
ಕರೀಮ್ ಬೆಂಜೆಮಾ ಕಾಲಿನ ಗಾಯದಿಂದಾಗಿ ಪಂದ್ಯದಿಂದ ಹೊರಗುಳಿದ ಕಾರಣ ಕೈಲಿಯನ್ ಎಂಬಪ್ಪೆ ಫ್ರಾನ್ಸ್ ತಂಡವನ್ನು ಮುನ್ನಡಿಸಿದರು. ಮೊದಲಾರ್ಧದಲ್ಲಿ ಎರಡೂ ತಂಡಗಳು ಗೋಲು ಗಳಿಸಲಿಲ್ಲ. ನಂತರ ರಣೋತ್ಸಾಹದಿಂದ ಮುನ್ನುಗ್ಗಿದ ಕೈಲಿಯನ್ ಎಂಬಪ್ಪೆ 61 ನೇ ನಿಮಿಷದಲ್ಲಿ ಮೊದಲ ಗೋಲು ಬಾರಿಸಿ ಮುನ್ನಡೆ ತಂದುಕೊಟ್ಟರು. ಆಟ ಸಾಗುತ್ತಿದಂತೆ ಡೆನ್ಮಾರ್ಕ್ ಡಿಫೆಂಡರ್ ಆಂಡ್ರಿಯಾಸ್ ಕ್ರಿಸ್ಟೇನ್ಸನ್ 68ನೇ ನಿಮಿಷದಲ್ಲಿ ಹೆಡರ್ ಮೂಲಕ ಗೋಲು ಗಳಿಸಿ ತಂಡಕ್ಕೆ 1-1 ರಿಂದ ಸಮಬಲ ಸಾಧಿಸಿದರು.
