ರಾಂಚಿ: ಭಾರತದ ಖ್ಯಾತ ಅಥ್ಲೀಟ್ ದ್ಯುತಿ ಚಾಂದ್ 100 ಮೀಟರ್ ಓಟದಲ್ಲಿ ಈಗಾಗಲೇ ಅನೇಕ ದಾಖಲೆ ಮುರಿದಿದ್ದು ಸದ್ಯ ರಾಂಚಿಯಲ್ಲಿ ನಡೆದ ರಾಷ್ಟ್ರೀಯ ಓಪನ್ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್ನಲ್ಲಿ ಮತ್ತೊಂದು ಮೈಲಿಗಲ್ಲು ಸಾಧಿಸಿದ್ದಾರೆ.
100 ಮೀಟರ್ ಓಟದ ಸೆಮಿಫೈನಲ್ ವೇಳೆ ಕೇವಲ 11.22 ಸೆಕೆಂಡ್ನಲ್ಲಿ ಗುರಿ ಮುಟ್ಟುವ ಮೂಲಕ ಫೈನಲ್ಗೆ ಲಗ್ಗೆ ಹಾಕಿದ್ದಾರೆ. ಈ ಹಿಂದೆ ಅವರೇ 100 ಮೀಟರ್ ಓಟವನ್ನು 11.26 ಸೆಕೆಂಡ್ನಲ್ಲಿ ಮುಟ್ಟಿದ್ದರು.
ಈ ಮೂಲಕ 2020ರಲ್ಲಿ ಜಪಾನ್‌ನಲ್ಲಿ ಟೋಕಿಯೋದಲ್ಲಿ ನಡೆಯಲಿರುವ ಒಲಿಂಪಿಕ್ಸ್‌ಗೆ ಅರ್ಹತೆ ಗಿಟ್ಟಿಸಿಕೊಳ್ಳಲು ಕೇವಲ ಒಂದೇ ಒಂದು ಮೆಟ್ಟಿಲು ಬಾಕಿ ಉಳಿದಿದೆ. ಒಲಂಪಿಕ್ಸ್ನಲ್ಲಿ ದ್ಯುತಿ ಚಾಂದ್ ಅವಕಾಶ ಪಡೆದುಕೊಳ್ಳಬೇಕಾದರೆ 11.07 ಸೆಕೆಂಡ್ನಲ್ಲಿ ಗುರಿ ತಲುಪಬೇಕಾಗಿದೆ.
ಈ ಹಿಂದೆ ಇಟಲಿಯ ನೇಪಲ್ಸ್ನಲ್ಲಿ ನಡೆದ 30ನೇ ವಿಶ್ವ ಯೂನಿವರ್ಸಿಟಿ ಗೇಮ್ಸ್ನ ಫೈನಲ್ನಲ್ಲಿ ಚಾಂದ್ 11.32 ಸೆಕೆಂಡ್ಗಳಲ್ಲಿ 100 ಮೀಟರ್ ಪೂರ್ಣಗೊಳಿಸುವ ಮೂಲಕ ಚಿನ್ನದ ಪದಕಕ್ಕೆ ಕೊರಳೊಡ್ಡಿದ್ದರು. ಜತೆಗೆ ಈ ಸಾಧನೆ ಮಾಡಿದ ಭಾರತದ ಮೊದಲ ಮಹಿಳಾ ಓಟಗಾರ್ತಿ ಎಂಬ ಶ್ರೇಯಕ್ಕೆ ಪಾತ್ರರಾಗಿದ್ದರು.
