ಅಸುನ್ಸಿಯಾನ್: ಪರಾಗ್ವೆಯ ತನಿಖಾಧಿಕಾರಿಗಳೊಂದಿಗೆ ಒಪ್ಪಂದ ಮಾಡಿಕೊಂಡ ನಂತರ ಬ್ರೆಜಿಲ್ ದೇಶದ ಮಾಜಿ ಫುಟ್ಬಾಲ್ ಆಟಗಾರ ರೊನಾಲ್ಡಿನೋ ಮತ್ತು ಅವರ ಸಹೋದರ ರಾಬರ್ಟೊ ಅಸಿಸ್ ಕೆಲವೇ ದಿನಗಳಲ್ಲಿ ಬಂಧಮುಕ್ತರಾಗಲಿದ್ದಾರೆ ಎಂದು ತಿಳಿದು ಬಂದಿದೆ.
ರೊನಾಲ್ಡಿನೋ ವಕೀಲ ಸೆರ್ಗಿಯೋ ಕ್ವರೋಜ್ ಪ್ರಕಾರ, ತಮ್ಮ ಕಕ್ಷಿದಾರರ ವಿರುದ್ಧ ನ್ಯಾಯಾಲಯದಲ್ಲಿರುವ ವಿಚಾರಣೆಯನ್ನು ಅಮಾನತುಗೊಳಿಸುವಂತೆ ಪರಾಗ್ವೆಯ ಸಾರ್ವಜನಿಕ ಪ್ರಾಸಿಕ್ಯೂಟರ್ ಕಚೇರಿಯಲ್ಲಿ ಶುಕ್ರವಾರ ಕೇಳಿಕೊಳ್ಳಲಾಗಿದೆ ಎಂದು ತಿಳಿದುಬಂದಿದೆ.
ನಕಲಿ ಪಾಸ್ಪೋರ್ಟ್ ಜತೆ ದ.ಅಮೆರಿಕದ ದೇಶ ಪ್ರವೇಶಿಸಿದ ಆರೋಪದ ಮೇಲೆ ರೊನಾಲ್ಡಿನೋ ಮತ್ತು ಅವರ ಸಹೋದರ ಅಸಿಸ್ ಅವರನ್ನು ಮಾರ್ಚ್ನಲ್ಲಿ ಬಂಧಿಸಲಾಗಿತ್ತು. ಏಪ್ರಿಲ್ನಲ್ಲಿ 1.6 ಮಿಲಿಯನ್ ಅಮೆರಿಕನ್ ಡಾಲರ್ ಮೊತ್ತವನ್ನು ಜಾಮೀನಾಗಿ ನೀಡಲು ಒಪ್ಪಿಕೊಂಡ ನಂತರ ಅವರಿಬ್ಬರನ್ನು ರಾಜಧಾನಿ ಅಸುನ್ಸಿಯನ್ನ ತಾರಾ ಹೋಟೆಲ್ಗೆ ಸ್ಥಳಾಂತರಿಸಲಾಗಿತ್ತು.
ರೊನಾಲ್ಡಿನೋ ತಮ್ಮ ತಪ್ಪಿಗೆ 90,000 ಡಾಲರ್ ದಂಡ ಕಟ್ಟಲು ಒಪ್ಪಿಕೊಂಡಿದ್ದಾರೆ. ಜತೆಗೆ 3 ತಿಂಗಳಿಗೊಮ್ಮೆ ಎರಡು ವರ್ಷಗಳವರೆಗೆ ಬ್ರೆಜಿಲ್ನ ಫೆಡರಲ್ ನ್ಯಾಯಾಧೀಶರಿಗೆ ವರದಿ ನೀಡಲು ರೊನಾಲ್ಡಿನೊ ಒಪ್ಪಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ.
ರೊನಾಲ್ಡಿನೋ ಅವರ ಸಹೋದರ ಆಸೀಸ್ಗೆ 1,10,000 ಡಾಲರ್ ದಂಡ ಕಟ್ಟಲು ಸೂಚಿಸಲಾಗಿದೆ. ಅವರು 2 ವರ್ಷ ಬ್ರೆಜಿಲ್ನಿಂದ ಹೊರ ಹೋಗುವುದನ್ನು ನಿಷೇಧಿಸಲಾಗಿದೆ.
