ಮುಂಬೈ: ಮಂಗಳವಾರ ಆರ್ಸಿಬಿ ತಂಡ ಅಗ್ರಸ್ಥಾನಿ ರಾಜಸ್ಥಾನ್ ರಾಯಲ್ಸ್ ತಂಡವನ್ನು ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ಎದುರಿಸಲಿದೆ. ಈ ಪಂದ್ಯದಲ್ಲಿ ಆರ್ಸಿಬಿಯಲ್ಲಿ ಕಳೆದ ಕೆಲವು ವರ್ಷಗಳಿಂದ ಆಡಿದ್ದ ಕೆಲವು ಆಟಗಾರರು ಇದೀಗ ತಾವೂ ಐಪಿಎಲ್ನಲ್ಲಿ ಗುರುತಿಸಿಕೊಂಡಿದ್ದ ತಂಡದ ವಿರುದ್ಧವೇ ಕಣಕ್ಕಿಳಿಯಲಿದ್ದಾರೆ.
ಎರಡೂ ತಂಡಗಳು 15ನೇ ಆವೃತ್ತಿಯಲ್ಲಿ ತಲಾ 2 ಪಂದ್ಯಗಳನ್ನಾಡಿದ್ದು, ಆರ್ ಆರ್ 2 ಪಂದ್ಯಗಳನ್ನು ಜಯಿಸಿದ್ದರೆ, ಆರ್ಸಿಬಿ ತಲಾ ಒಂದು ಜಯ ಮತ್ತು ಸೋಲು ಕಂಡಿದೆ. ಇಂದು 2 ತಂಡಗಳಿಗೂ 3ನೇ ಪಂದ್ಯವಾಗಲಿದೆ. ಈ ಪಂದ್ಯದ ವಿಶೇಷ ಎಂದರೆ ಕಳೆದ ಆವೃತ್ತಿಗಳಲ್ಲಿ ಆಡಿದ್ದ ಕೆಲವು ಆಟಗಾರರು ಈ ಬಾರಿ ಎದುರಾಳಿಗಳಾಗಿ ಕಣಕ್ಕಿಳಿಯಲಿದ್ದಾರೆ.
ಅನುಭವಿ ಸ್ಪಿನ್ನರ್ ಯುಜ್ವೇಂದ್ರ ಚಹಲ್ 2014 ರಿಂದ, ದೇವದತ್ ಪಡಿಕ್ಕಲ್ 2019ರಿಂದ ಮತ್ತು ನವದೀಪ್ ಸೈನಿ 2018ರಿಂದ ಐಪಿಎಲ್ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ ಆಡಿದ್ದರು. ಈ ಮೂವರು ಆಟಗಾರರು ಶ್ರೀಮಂತ ಕ್ರಿಕೆಟ್ ಲೀಗ್ನಲ್ಲಿ ನೆಲೆ ಕಂಡುಕೊಂಡಿದ್ದರು, ಇದೀಗ ಮೂವರು ಇದೇ ಮೊದಲ ಬಾರಿಗೆ ಆರ್ಸಿಬಿ ವಿರುದ್ಧವೇ ಕಣಕ್ಕಿಳಿಯಲಿದ್ದಾರೆ.
ಸೈನಿಯನ್ನು 2.6 ಕೋಟಿ ರೂಗಳಿಗೆ, ದೇವದತ್ ಪಡಿಕ್ಕಲ್ಗೆ 7.75 ಕೋಟಿ ಮತ್ತು ಚಹಲ್ರನ್ನು 6.5 ಕೋಟಿ ರೂಗಳಿಗೆ ರಾಜಸ್ಥಾನ್ ರಾಯಲ್ಸ್ ಖರೀದಿಸಿದೆ. ಈ ಮೂವರು ಆಟಗಾರರು ಅತ್ಯುತ್ತುಮ ಫಾರ್ಮ್ನಲ್ಲಿದ್ದು, ಇಂದಿನ ಪಂದ್ಯದಲ್ಲಿ ತಮ್ಮ ಮಾಜಿ ತಂಡ ಮಣಿಸುವುದಕ್ಕಾಗಿ ಆಡಲಿದ್ದಾರೆ. ಇವರಷ್ಟೇ ಅಲ್ಲದೆ ನೇಥನ್ ಕೌಲ್ಟರ್ ನೈಲ್, ಶಿಮ್ರಾನ್ ಹೆಟ್ಮಾಯರ್ ಕೂಡ ಆರ್ಸಿಬಿಯಲ್ಲಿ ಆಡಿದವರೇ.
ವಿಶೇಷವೆಂದರೆ ಕಳೆದ ಆವೃತ್ತಿಯಲ್ಲಿ ರಾಜಸ್ಥಾನ್ ರಾಯಲ್ಸ್ನಲ್ಲಿ ಆಡಿದ್ದ ಅನುಜ್ ರಾವತ್ ಮತ್ತು ಮಹಿಪಾಲ್ ಲಾಮ್ರೋರ್ ಈ ಬಾರಿ ಆರ್ಸಿಬಿ ಸೇರಿಕೊಂಡಿದ್ದಾರೆ. ಆದರೆ ಅನುಜ್ ಮಾತ್ರ ಆರ್ಸಿಬಿ ಪರ ಡೆಬ್ಯೂಟ್ ಮಾಡಿದ್ದಾರೆ.
ಸನ್ರೈಸರ್ಸ್ ಗೆಲುವಿಗೆ ಮುಳುವಾಗಿದ್ದ ಮಾಜಿ ಆಟಗಾರರು: ಸೋಮವಾರ ನಡೆದ ಪಂದ್ಯದಲ್ಲಿ ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧ ಲಖನೌ ಸೂಪರ್ ಜೈಂಟ್ಸ್ ತಂಡ 12 ರನ್ಗಳ ಜಯ ಸಾಧಿಸಿತ್ತು. ಈ ಪಂದ್ಯದಲ್ಲಿ ಹೈದರಾಬಾದ್ ಮಾಜಿ ಆಟಗಾರರಾದ ಕೆಎಲ್ ರಾಹುಲ್, ದೀಪಕ್ ಹೂಡ, ಮನೀಶ್ ಪಾಂಡೆ, ಜೇಸನ್ ಹೋಲ್ಡರ್ ಕಣಕ್ಕಿಳಿದು ತಮ್ಮ ಮಾಜಿ ತಂಡವನ್ನು ಸೋಲಿಸಿದ್ದರು. ಇದೀಗ ಆರ್ಸಿಬಿಗೂ ಅದೇ ಗತಿ ಆಗಬಹುದೇ ಎಂದು ಸಾಮಾಜಿಕ ಜಾಲಾತಾಣದಲ್ಲಿ ಚರ್ಚೆ ನಡೆಯುತ್ತಿದೆ.
ಇದನ್ನೂ ಓದಿ:ಕ್ವಾರಂಟೈನ್ ಮುಗಿಸಿದ್ದರೂ ಇಂದಿನ ಪಂದ್ಯದಲ್ಲಿ ಮ್ಯಾಕ್ಸ್ವೆಲ್ ಆಡುವುದಕ್ಕೆ ಅವಕಾಶವಿಲ್ಲ: ಕಾರಣ ಇಲ್ಲಿದೆ
