ಅಹಮದಾಬಾದ್: ರಾಷ್ಟ್ರೀಯ ಏಕದಿನ ಟೂರ್ನಿಯಾದ ವಿಜಯ್ ಹಜಾರೆ ಟ್ರೋಫಿ ಫೈನಲ್ ಹಣಾಹಣಿಯಲ್ಲಿ ಇಂದು ಸೌರಾಷ್ಟ್ರ ಮತ್ತು ಮಹಾರಾಷ್ಟ್ರ ತಂಡಗಳು ಸೆಣಸಲಿವೆ. ಉನಾದ್ಕತ್ ನಾಯಕತ್ವದ ಸೌರಾಷ್ಟ್ರದ ಬಲಿಷ್ಠ ಬೌಲಿಂಗ್ ಪಡೆಯನ್ನು 'ಮಹಾ' ಬ್ಯಾಟರ್ಗಳು ಎದುರಿಸಬೇಕಿದೆ.
ಮೊದಲ ಬಾರಿಗೆ ಚೊಚ್ಚಲ ಪ್ರಶಸ್ತಿ ಮುಡಿಗೇರಿಸಿಕೊಳ್ಳಲು ಮಹಾರಾಷ್ಟ್ರ ಕಾತುರವಾಗಿದ್ದರೆ, ಮೂರನೇ ಬಾರಿ ಫೈನಲ್ ಎದುರಿಸುತ್ತಿರುವ ಸೌರಾಷ್ಟ್ರ ಕೂಡಾ ಮೊದಲ ಕಪ್ ಗೆಲ್ಲಲು ತವಕಿಸುತ್ತಿದೆ. ಒಂದೂ ಪಂದ್ಯದಲ್ಲೂ ಸೋಲು ಕಾಣದೇ ಫೈನಲ್‌ಗೇರಿರುವ ಮಹಾರಾಷ್ಟ್ರ ಕಪ್ ಗೆಲ್ಲುವ ಫೇವರಿಟ್‌ ತಂಡ ಎನಿಸಿಕೊಂಡಿದೆ. ಟೂರ್ನಿಯುದ್ದಕ್ಕೂ ಎರಡೇ ಸೋಲು ಕಂಡಿರುವ ಸೌರಾಷ್ಟ್ರ ತನ್ನ ಬೌಲಿಂಗ್ ಬಲವನ್ನು ನೆಚ್ಚಿಕೊಂಡಿದೆ.
ಮಹಾರಾಷ್ಟ್ರ ತಂಡದ ಬಲಾಢ್ಯ ಬ್ಯಾಟರ್, ಏಳು ಸಿಕ್ಸರ್‌ಗಳಿಸಿದ ಋತುರಾಜ್ ಗಾಯಕ್ವಾಡ್ 4 ಪಂದ್ಯದಲ್ಲಿ 552 ರನ್ ಕಲೆ ಹಾಕಿ ಅದ್ಭುತ ಫಾರ್ಮ್‌ನಲ್ಲಿದ್ದಾರೆ. ಹಾಗೆಯೇ ಅಂಕಿತ್ ಬಾವ್ನೆ ಕೂಡ ಮಹಾ ತಂಡದ ಬೆನ್ನೆಲುಬು. ಇವರು ಕಳೆದ ಎಂಟು ಪಂದ್ಯಗಳಲ್ಲಿ 571 ರನ್ ಪೇರಿಸಿದ್ದಾರೆ. ಸೌರಾಷ್ಟ್ರ ನಾಯಕ ಉನಾದ್ಕತ್ 18 ವಿಕೆಟ್ ಪಡೆದಿದ್ದಾರೆ. ಅಲ್ಲದೇ ತಂಡದಲ್ಲಿರುವ ಪ್ರೇರಕ್ ಮಂಕಡ್, ಧಮೇಂದ್ರ ಜಡೇಜಾ ಮಹಾರಾಷ್ಟ್ರ ಬ್ಯಾಟರ್ಗಳನ್ನು ಕಾಡಲು ಸಿದ್ಧರಾಗಿದ್ದಾರೆ.
ಪಂದ್ಯ ಎಲ್ಲಿ, ನೋಡುವುದು ಹೇಗೆ?: ಪಂದ್ಯ ಬೆಳಗ್ಗೆ 9 ಕ್ಕೆ ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಸ್ಟಾರ್ ಸ್ಪೋರ್ಟ್ಸ್1 ರಲ್ಲಿ ನೇರಪ್ರಸಾರ ವೀಕ್ಷಿಸಬಹುದು.
ಇದನ್ನೂ ಓದಿ: ಒಂದೇ ದಿನದಲ್ಲಿ 500 ರನ್.. ಟೆಸ್ಟ್ನಲ್ಲಿ 112 ವರ್ಷಗಳ ದಾಖಲೆ ಮುರಿದ ಇಂಗ್ಲೆಂಡ್
