ಚೆನ್ನೈ : ಕರ್ನಾಟಕ ಮತ್ತು ರೈಲ್ವೇಸ್ ನಡುವಿನ ರಣಜಿ ಪಂದ್ಯ ಡ್ರಾನಲ್ಲಿ ಅಂತ್ಯಗೊಂಡಿದೆ. ಮೊದಲ ಇನ್ನಿಂಗ್ಸ್ ಮುನ್ನಡೆಯ ಆಧಾರದ ಮೇಲೆ ಮನೀಶ್ ಪಾಂಡೆ ಪಡೆ 3 ಅಂಕ ಪಡೆದರೆ, ರೈಲ್ವೇಸ್ ಒಂದು ಅಂಕಕ್ಕೆ ತೃಪ್ತಿಪಟ್ಟುಕೊಂಡಿದೆ.
ಕರ್ನಾಟಕ ಮೊದಲ ಇನ್ನಿಂಗ್ಸ್ನಲ್ಲಿ ಸಿದ್ಧಾರ್ಥ್ ಕೆವಿ(146) ಮತ್ತು ಮನೀಶ್ ಪಾಂಡೆ(156) ಅವರ ಶತಕದ ನೆರವಿನಿಂದ 481 ರನ್ಗಳಿಸಿದರೆ, ನಂತರ ಕರ್ನಾಟಕ ತಂಡದ ಬೌಲರ್ಗಳು ರೈಲ್ವೇಸ್ ತಂಡವನ್ನು 426ರನ್ಗಳಿಗೆ ಆಲೌಟ್ ಮಾಡುವ ಮೂಲಕ 55 ರನ್ಗಳ ಮೊದಲ ಇನ್ನಿಂಗ್ಸ್ ಮುನ್ನಡೆ ತಂದುಕೊಟ್ಟಿದ್ದರು. ಕೃಷ್ಣಪ್ಪ ಗೌತಮ್ 127ಕ್ಕೆ 4, ರೋನಿತ್ ಮೋರೆ 67ಕ್ಕೆ 3, ವಿದ್ಯಾಧರ್ ಪಾಟಿಲ್ 77ಕ್ಕೆ2 ವಿಕೆಟ್ ಪಡೆದಿದ್ದರು.
2ನೇ ಇನ್ನಿಂಗ್ಸ್ನಲ್ಲಿ ಬ್ಯಾಟಿಂಗ್ ಮಾಡಿದ ಕರ್ನಾಟಕ ತಂಡ 63.7 ಓವರ್ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 223 ರನ್ಗಳಿಸಿ ಡಿಕ್ಲೇರ್ ಘೋಷಿಸಿಕೊಂಡಿತು. ಮಯಾಂಕ್ ಅಗರ್ವಾಲ್ 56, ರವಿಕುಮಾರ್ ಸಮರ್ಥ್ 83, ಸಿದ್ಧಾರ್ಥ್ 39, ಮನೀಶ್ ಅಜೇಯ 24 ರನ್ಗಳಿಸಿದ್ದರು. ಉಳಿದ ಬ್ಯಾಟರ್ಗಳು ಒಂದಂಕಿ ಮೊತ್ತಕ್ಕೆ ವಿಕೆಟ್ ಒಪ್ಪಿಸಿದರು.
ರೈಲ್ವೇಸ್ 69ರನ್ಗಳಿಗೆ 4 ವಿಕೆಟ್ ಕಳೆದುಕೊಂಡಿದ್ದ ವೇಳೆ ಪಂದ್ಯವನ್ನು ಡ್ರಾ ಎಂದು ಘೋಷಿಸಲಾಯಿತು. ವೈಶಾಕ್ ವಿಜಯ್ಕುಮಾರ್ 16ಕ್ಕೆ2, ಕೆ.ಗೌತಮ್ 23ಕ್ಕೆ 1, ಸಮರ್ಥ್ ಸೊನ್ನೆಗೆ 1 ವಿಕೆಟ್ ಪಡೆದರು. ಕರ್ನಾಟಕ ತಂಡ ತನ್ನ ಮುಂದಿನ ಪಂದ್ಯದಲ್ಲಿ ಜಮ್ಮು ಮತ್ತು ಕಾಶ್ಮೀರ ವಿರುದ್ಧ ಫೆಬ್ರವರಿ 24ರಿಂದ ಆಡಲಿದೆ.
ಇದನ್ನೂ ಓದಿ:ರಣಜಿ ಟ್ರೋಫಿ : ಪದಾರ್ಪಣೆ ಪಂದ್ಯದಲ್ಲೇ 2 ಶತಕ ಸಿಡಿಸಿ ದಾಖಲೆ ಬರೆದ ಯಶ್ ಧುಲ್
