ದುಬೈ: ಕೆಎಲ್ ರಾಹುಲ್ ನೇತೃತ್ವದ ಪಂಜಾಬ್ ಕಿಂಗ್ಸ್ ತಂಡ ನೇರವಾಗಿ ಪ್ಲೇ ಆಫ್ ದಾರಿ ಬಹುತೇಕ ಮುಚ್ಚಿದೆ. ಆದರೆ, ಅಕ್ಟೋಬರ್ 7 ರಂದು ನಡೆಯಲಿರುವ ಸಿಎಸ್ಕೆ ವಿರುದ್ಧದ ಪಂದ್ಯದಲ್ಲಿ ಬೃಹತ್ ಅಂತರದಿಂದ ಗೆದ್ದು, ಇತರ ಕೆಲವು ಪಂದ್ಯಗಳ ಫಲಿತಾಂಶಗಳು ಅವರ ಪರವಾಗಿ ಬಂದರೆ 4ನೇ ತಂಡವಾಗಿ ಪ್ಲೇ ಆಪ್ ಪ್ರವೇಶಿಸುವ ಅವಕಾಶ ಸಿಗಲಿದೆ.
ಭಾನುವಾರ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ವಿರುದ್ಧ ಪಂದ್ಯವನ್ನು ಸೋಲುವ ಮೂಲಕ ಪ್ಲೇ ಆಫ್ ಪ್ರವೇಶಿಸಲು ತನ್ನ ಕೈಯಲ್ಲಿದ್ದ ಅವಕಾಶ ಕಳೆದುಕೊಂಡಿದ್ದರು. ಒಂದು ವೇಳೆ ಆ ಪಂದ್ಯವನ್ನು ಗೆದ್ದಿದ್ದರೆ, ಚೆನ್ನೈ ವಿರುದ್ಧ ಸಾಧಾರಣ ಗೆಲುವು ಸಾಧಿಸಿ 2 ಅಂಕ ಪಡೆದಿದ್ದರೆ ಪ್ಲೇ ಆಫ್ ಪ್ರವೇಶಿಸಬಹುದಿತ್ತು. ಆದರೆ, ದುರಾದೃಷ್ಟವಶಾತ್ ಕೇವಲ 6 ರನ್ಗಳಿಂದ ಕಿಂಗ್ಸ್ ಸೋಲು ಕಂಡಿತು.
ಇದೀಗ ಕೊನೆಯ ಲೀಗ್ ಪಂದ್ಯವನ್ನು ಗೆದ್ದರೂ ಪಂಜಾಬ್ 12 ಅಂಕಗಳನ್ನು ಗಳಿಸಿಕೊಳ್ಳಬಹುದು. ಆದರೆ, ಇದು ಪ್ಲೇ ಆಫ್ ಪ್ರವೇಶಿಸಲು ಸಾಧ್ಯವಾಗದು. ಋಣಾತ್ಮಕ ರನ್ರೇಟ್ ಹೊಂದಿರವ ರಾಹುಲ್ ಪಡೆ ಬೃಹತ್ ಅಂತರದಿಂದ ಸಿಎಸ್ಕೆ ವಿರುದ್ಧ ಗೆಲುವು ಸಾಧಿಸಬೇಕು. ಅಲ್ಲದೇ ಕೆಕೆಆರ್, ಮುಂಬೈ ಮತ್ತು ರಾಜಸ್ಥಾನ್ ತಂಡಗಳು ಕೂಡ 12 ಅಂಕಗಳೊಂದಿಗೆ ಲೀಗ್ನಲ್ಲಿ ಅಂತ್ಯವಾಗಬೇಕು.
ಹೇಗಾದರೆ ಪಂಜಾಬ್ ದಾರಿ ಸುಗಮ
ಮುಂಬೈ ಮತ್ತು ರಾಜಸ್ಥಾನ್ ತಂಡಗಳು ಉಳಿದಿರುವ ತಮ್ಮ 2 ಪಂದ್ಯಗಳಲ್ಲಿ ಕೇವಲ ಒಂದರಲ್ಲಿ ಮಾತ್ರ ಗೆಲ್ಲಬೇಕು. ತಮ್ಮ ಕೊನೆಯ ಪಂದ್ಯವನ್ನು ಸೋಲು ಕಾಣಬೇಕು. ಮಂಗಳವಾರ ನಡೆಯುವ ಪಂದ್ಯದಲ್ಲಿ ಮುಂಬೈ ರಾಜಸ್ಥಾನ್ ವಿರುದ್ಧ ಗೆದ್ದು ತಮ್ಮ ಕೊನೆಯ ಪಂದ್ಯವನ್ನು ಹೈದರಾಬಾದ್ ವಿರುದ್ಧ ಸೋಲಬೇಕು.
ರಾಜಸ್ಥಾನ್ ತಂಡ ಈ ಪಂದ್ಯವನ್ನು ಸೋತ ನಂತರ ತನ್ನ ಕೊನೆಯ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಉತ್ತಮ ರನ್ರೇಟ್ನಿಂದ ಗೆಲ್ಲಬೇಕು. ಆಗ ನಾಲ್ಕು ತಂಡಗಳ ಅಂಕ 12ಕ್ಕೆ ಬಂದು ನಿಲ್ಲಲಿದೆ. ಯಾವ ತಂಡ ಉತ್ತಮ ರನ್ರೇಟ್ ಹೊಂದಿರುತ್ತದೋ ಆ ತಂಡ 4ನೇ ತಂಡವಾಗಿ ಪ್ಲೇ ಆಫ್ ಪ್ರವೇಶಿಸಲಿದೆ.
ಪ್ರಸ್ತುತ ಪಂಜಾಬ್ ರನ್ರೇಟ್ ಮುಂಬೈ ಮತ್ತು ರಾಜಸ್ಥಾನ್ ತಂಡಕ್ಕಿಂತ ಮುಂದಿದೆ. ಮತ್ತು ಕೋಲ್ಕತ್ತಾಕ್ಕಿಂತ ಕಡಿಮೆಯಿದೆ. ಪಂಜಾಬ್ ಸಿಎಸ್ಕೆ ವಿರುದ್ಧ ಬೃಹತ್ ಅಂತರದಿಂದ ಗೆಲ್ಲುವುದರ ಜೊತೆಗೆ ಕೋಲ್ಕತ್ತಾ ತಂಡ ರಾಯಲ್ಸ್ ವಿರುದ್ಧ ಹೀನಾಯ ಸೋಲಿಗಾಗಿ ಪ್ರಾರ್ಥಿಸಬೇಕಿದೆ.
ಇದನ್ನು ಓದಿ:ಮುಂಬೈ vs ರಾಜಸ್ಥಾನ್ ಮುಖಾಮುಖಿ: ಗೆದ್ದವರಿಗೆ ಪ್ಲೇ ಆಫ್ ದಾರಿ ಸುಗಮ
