ಕರಾಚಿ: ಪಾಕಿಸ್ತಾನ ತಂಡದಲ್ಲಿ ಮಿಂಚು ಹರಿಸಿರುವ 21ವರ್ಷದ ವೇಗಿ ನಸೀಮ್ ಶಾಗೆ ವೈರಲ್ ಸೋಂಕು ಕಾಣಿಸಿಕೊಂಡಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ. ಹೀಗಾಗಿ ಶಾ ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ ಟಿ20 ಸರಣಿಯಿಂದ ಹೊರಬೀಳುವ ಸಾಧ್ಯತೆ ಇದೆ.
7 ಪಂದ್ಯಗಳ ಟಿ20 ಸರಣಿಯಲ್ಲಿ ಸಮಬಲದ ಪೈಪೋಟಿ ನೀಡಿರುವ ಇಂಗ್ಲೆಂಡ್- ಪಾಕಿಸ್ತಾನ ತಂಡಗಳು ಸರಣಿಯನ್ನು 2-2 ರಲ್ಲಿ ಸಮಬಲ ಸಾಧಿಸಿವೆ. ಇಂದು ರಾತ್ರಿ 5ನೇ ಪಂದ್ಯ ನಡೆಯಲಿದ್ದು, ಇದಕ್ಕೂ ಮೊದಲು ಪಾಕಿಸ್ತಾನ ತಂಡಕ್ಕೆ ಶಾಕ್ ಉಂಟಾಗಿದೆ. ವೈರಲ್ ಫೀವರ್ಗೆ ತುತ್ತಾದ ನಸೀಮ್ ಶಾ ಇಂದಿನ ಪಂದ್ಯವನ್ನು ತಪ್ಪಿಸಿಕೊಳ್ಳಲಿದ್ದಾರೆ.
ವೈರಲ್ ಸೋಂಕಿಗೀಡಾಗಿರುವ ಯುವ ವೇಗಿ ನಸೀಮ್ನನ್ನು ಆಸ್ಪತ್ರೆಗೆ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಅವರು ಚೇತರಿಸಿಕೊಳ್ಳುತ್ತಿದ್ದಾರೆ. ಉಳಿದ ಪಂದ್ಯಗಳಲ್ಲಿ ನಸೀಮ್ ಭಾಗವಹಿಸುವ ಸಾಧ್ಯತೆ ಕಡಿಮೆ ಇದೆ ಎಂದು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಹೇಳಿದೆ.
ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆದಿರುವ ನಸೀಮ್ ಶಾ ವಿಶ್ರಾಂತಿ ಪಡೆಯುವ ಸಾಧ್ಯತೆ ಇದೆ. ಮೊಣಕಾಲಿನ ಗಾಯದಿಂದಾಗಿ ಏಷ್ಯಾಕಪ್ನಿಂದ ದೂರ ಉಳಿದಿದ್ದ ಪಾಕ್ ಪ್ರಮುಖ ವೇಗಿ ಶಾಹೀನ್ ಅಫ್ರಿದಿ ಅನುಪಸ್ಥಿತಿಯಲ್ಲಿ 21 ವರ್ಷದ ನಸೀಮ್ ತಂಡದ ಪ್ರಮುಖ ಬೌಲರ್ ಆಗಿ ಗುರುತಿಸಿಕೊಂಡರು. ಪಾಕಿಸ್ತಾನದ ಟಿ-20 ವಿಶ್ವಕಪ್ ತಂಡದಲ್ಲಿರುವ ಶಾಹೀನ್ ಮತ್ತು ನಸೀಮ್ ಕಮಾಲ್ ಮಾಡಲಿದ್ದಾರಾ ಎಂಬುದು ಅಭಿಮಾನಿಗಳ ನಿರೀಕ್ಷೆಯಾಗಿದೆ.
ಪಾಕಿಸ್ತಾನದಲ್ಲಿ ಭಾರೀ ಪ್ರವಾಹ ಉಂಟಾದ ಬಳಿಕ ಸೊಳ್ಳೆಗಳ ತೀವ್ರತೆ ವ್ಯಾಪಕವಾಗಿದೆ. ಪ್ರತಿದಿನ ಸಾವಿರಾರು ಡೆಂಘೀ ಸೋಂಕು ಪ್ರಕರಣಗಳು ವರದಿಯಾಗುತ್ತಿವೆ.
ಓದಿ: ಐಸಿಸಿ ಬ್ಯಾಟಿಂಗ್ ಶ್ರೇಯಾಂಕ: 2ನೇ ಸ್ಥಾನಕ್ಕೇರಿ ಸೂರ್ಯಕುಮಾರ್ ಯಾದವ್ ಜೀವನಶ್ರೇಷ್ಠ ಸಾಧನೆ
