ನವದೆಹಲಿ: ಪಾಕಿಸ್ತಾನ ತಂಡ 2023ರ ಏಷ್ಯಾಕಪ್ ಮತ್ತು ವಿಶ್ವಕಪ್ನಲ್ಲಿ ಕಳಪೆ ಪ್ರದರ್ಶನ ನೀಡಿದ ನಂತರ ನಾಯಕತ್ವ, ಕೋಚ್ ಮತ್ತು ನಿರ್ದೇಶಕ ಹುದ್ದೆಗಳಲ್ಲಿ ಕೆಲ ಬದಲಾವಣೆಗಳು ಆಗಿದೆ. ಬೌಲಿಂಗ್ ಕೋಚ್ ಮೊರ್ನೆ ಮೊರ್ಕೆಲ್ ಹಾಗೇ ತಂಡದ ನಾಯಕ ಬಾಬರ್ ಅಜಮ್ ತಮ್ಮ ಹುದ್ದೆಗೆ ರಾಜಿನಾಮೆ ನೀಡಿದರೆ, ಪ್ರಮುಖ ಕೋಚ್, ನಿರ್ದೇಶಕ ಮಿಕ್ಕಿ ಆರ್ಥರ್ ಜಾಗಕ್ಕೆ ಮೊಹಮ್ಮದ್ ಹಫೀಜ್ ಅವರನ್ನು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (ಪಿಸಿಬಿ) ನೇಮಿಸಿದೆ. ಮಿಕ್ಕಿ ಆರ್ಥರ್ ಹುದ್ದೆ ಏನಾಗಿರಲಿದೆ ಎಂಬುದನ್ನು ಪಿಸಿಬಿ ತಿಳಿಸಿಲ್ಲ.
ಪಾಕಿಸ್ತಾನ ತಂಡ ಮುಂಬರುವ ಆಸ್ಟ್ರೇಲಿಯಾ ಮತ್ತು ನ್ಯೂಜಿಲೆಂಡ್ ಪ್ರವಾಸಕ್ಕೆ ಮಾಜಿ ಕ್ರಿಕೆಟಿಗ ಮೊಹಮ್ಮದ್ ಹಫೀಜ್ ಪಾಕಿಸ್ತಾನದ ಮುಖ್ಯ ಕೋಚ್ ಆಗಿ ಕಾರ್ಯನಿರ್ವಹಿಸಲಿದ್ದಾರೆ ಎಂದು ವರದಿ ಆಗಿದೆ. ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ತಂಡದ ನಿರ್ದೇಶಕ ಮತ್ತು ಮುಖ್ಯ ಕೋಚ್ ಹುದ್ದೆಯನ್ನು ವಿಲೀನಗೊಳಿಸಲಿದೆ ಎಂದು ಹೇಳಲಾಗಿದೆ. ಹಫೀಜ್ ಆಸ್ಟ್ರೇಲಿಯಾದಲ್ಲಿ ಮುಂಬರುವ ಮೂರು ಟೆಸ್ಟ್ ಪಂದ್ಯಗಳು ಮತ್ತು ನ್ಯೂಜಿಲೆಂಡ್‌ನಲ್ಲಿ ಕ್ರಮವಾಗಿ ಡಿಸೆಂಬರ್ ಮತ್ತು ಜನವರಿಯಲ್ಲಿ ನಡೆಯಲಿರುವ ಐದು ಟಿ -20ಗಳಲ್ಲಿ ಎರಡೂ ಹುದ್ದೆಗಳಲ್ಲಿ ಕಾರ್ಯ ನಿರ್ವಹಿಸಲಿದ್ದಾರೆ.
ಹಫೀಜ್ ಇತ್ತೀಚೆಗೆ ಪಿಸಿಬಿ ಕ್ರಿಕೆಟ್ ತಾಂತ್ರಿಕ ಸಮಿತಿಯ ಭಾಗವಾಗಿದ್ದರು. ಮಾಜಿ ಆಲ್‌ರೌಂಡರ್ 2017 ರಲ್ಲಿ ಇಂಗ್ಲೆಂಡ್‌ನಲ್ಲಿ ನಡೆದ ಐಸಿಸಿ ಚಾಂಪಿಯನ್ಸ್ ಟ್ರೋಫಿಯನ್ನು ಗೆದ್ದ ಪಾಕಿಸ್ತಾನ ಪುರುಷರ ತಂಡದ ಸದಸ್ಯರಾಗಿದ್ದರು. ಪಿಸಿಬಿ ಪಾಕಿಸ್ತಾನದ ಕೋಚಿಂಗ್ ಸಿಬ್ಬಂದಿಯ ಕೆಲ ನಿಯಮಾವಳಿಗಳಲ್ಲಿ ಬದಲಾವಣೆ ಮಾಡಿದೆ. ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯಲ್ಲಿ ಕೆಲಸ ಮಾಡುತ್ತಿರುವ ಎಲ್ಲ ತರಬೇತುದಾರರನ್ನು ಪಿಸಿಬಿ ಮುಂದುವರೆಸಿದೆ, ಆದರೆ, ಆಸ್ಟ್ರೇಲಿಯಾ ಮತ್ತು ನ್ಯೂಜಿಲೆಂಡ್‌ನಲ್ಲಿ ನಡೆಯಲಿರುವ ಸರಣಿಗಳಿಗೆ ಹೊಸ ಕೋಚಿಂಗ್ ಸಿಬ್ಬಂದಿಯನ್ನು ಸರಿಯಾದ ಸಮಯದಲ್ಲಿ ಘೋಷಿಸುತ್ತದೆ ಎಂದು ವರದಿಯಾಗಿದೆ.
ಮಹತ್ವದ ಟೂರ್ನಿಯಲ್ಲಿ ಕಳಪೆ ಪ್ರದರ್ಶನ: 2023ರ ಏಷ್ಯಾಕಪ್ ಮತ್ತು ವಿಶ್ವಕಪ್ನಲ್ಲಿ ಪಾಕಿಸ್ತಾನ ತಂಡ ನಿರೀಕ್ಷಿತ ಪ್ರದರ್ಶನ ನೀಡುವಲ್ಲಿ ಎಡವಿದೆ. ಏಷ್ಯಾಕಪ್ ಆರಂಭವಾಗುವ ಮುನ್ನ ಪಾಕಿಸ್ತಾನ ತಂಡ ಐಸಿಸಿ ಶ್ರೇಯಾಂಕದಲ್ಲಿ ನಂ.1 ತಂಡವಾಗಿತ್ತು. ಆದರೆ, ಏಷ್ಯಾಕಪ್ನಲ್ಲಿ ಕ್ಯಾಲಿಫೈರ್ನಿಂದ ಹೊರಬಿದ್ದ ತಂಡ ನಂ.1 ಪಟ್ಟವನ್ನು ಕಳೆದುಕೊಂಡಿತು. ನಂತರ ನಡೆ ವಿಶ್ವಕಪ್ನಲ್ಲಿ ಪಾಕಿಸ್ತಾನ ಲೀಗ್ ಹಂತದಲ್ಲಿ ಕೇವಲ 4 ಗೆಲುವನ್ನು ದಾಖಲಿಸಿತು. ಅದರಲ್ಲಿ ಗಮನಿಸ ಬೇಕಾದ ವಿಷಯ ಎಂದರೆ ಪಾಕ್ ಗೆದ್ದದ್ದು ನೆದರ್ಲೆಂಡ್ಸ್, ಬಾಂಗ್ಲಾದೇಶ, ಶ್ರೀಲಂಕಾ ಮತ್ತು ನ್ಯೂಜಿಲೆಂಡ್ ವಿರುದ್ಧ ಮಾತ್ರ. ಕಿವೀಸ್ ವಿರುದ್ಧ ವರುಣನ ಕೃಪೆಯಿಂದ ಗೆದ್ದಿತು ಎಂದರೆ ತಪ್ಪಾಗದು. ಬಲಿಷ್ಠ ತಂಡಗಳ ಮುಂದೆ ಬಾಬರ್ ಪಡೆ ಮಂಡಿಯೂರಿತ್ತು.
ಕೋಚ್, ನಾಯಕ ರಾಜೀನಾಮೆ: ಪಾಕಿಸ್ತಾನ ತಂಡದ ಈ ಪ್ರದರ್ಶನದ ನಂತರ ಪಾಕ್ ಬೌಲಿಂಗ್ ಕೋಚ್ ಆಗಿದ್ದ ದಕ್ಷಿಣ ಆಫ್ರಿಕಾದ ಆಟಗಾರ ಮೊರ್ನೆ ಮೊರ್ಕೆಲ್ ರಾಜೀನಾಮೆ ನೀಡಿದರು. ಅವರ ಬೆನ್ನಲ್ಲೇ ನಾಯಕ ಬಾಬರ್ ಅಜಮ್ ಸಹ ತಂಡದ ಮೂರು ಮಾದರಿಯ ನಾಯಕತ್ವದಿಂದ ಹಿಂದೆ ಸರಿದರು. ಬಾಬರ್ ಬದಲಿಯಾಗಿ ಟೆಸ್ಟ್ ತಂಡದ ನಾಯಕರಾಗಿ ಶಾನ್ ಮಸೂದ್ ಮತ್ತು ವೈಟ್ ಬಾಲ್ (ಏಕದಿನ - ಟಿ20) ಕ್ರಿಕೆಟ್ಗೆ ವೇಗಿ ಶಾಹೀನ್ ಶಾ ಅಫ್ರಿದಿ ಅವರನ್ನು ಪಿಸಿಬಿ ಆಯ್ಕೆ ಮಾಡಿದೆ.
ಇದನ್ನೂ ಓದಿ: ವಿಶ್ವಕಪ್ನಲ್ಲಿ ಕಳಪೆ ಪ್ರದರ್ಶನ: ಮೂರು ಮಾದರಿಗಳ ನಾಯಕತ್ವ ತ್ಯಜಿಸಿದ ಬಾಬರ್
