ಅಬುಧಾಬಿ : ಕೋಲ್ಕತಾ ನೈಟ್ ರೈಡರ್ಸ್ ತಂಡದ ಸ್ಟಾರ್ ಸ್ಪಿನ್ನರ್ ಸುನೀಲ್ ನರೈನ್ ಮತ್ತೊಮ್ಮೆ ವಿವಾದಾತ್ಮಕ ಶೈಲಿಯಲ್ಲಿ ಬೌಲಿಂಗ್ ಮಾಡಿ ಸುದ್ದಿಯಾಗಿದ್ದಾರೆ. ಪಂಜಾಬ್ ವಿರುದ್ಧ ಶನಿವಾರ ನಡೆದ ಪಂದ್ಯದಲ್ಲಿ ನರೈನ್ ಅಸಂಬದ್ಧ ಶೈಲಿಯ ಬೌಲಿಂಗ್ ಬಗ್ಗೆ ಅಂಪೈರ್ಗಳು ಐಪಿಎಲ್ ಆಡಳಿತ ಮಂಡಳಿಗೆ ವರದಿ ನೀಡಿದ್ದಾರೆ.
ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧ ನರೈನ್ ಬೌಲಿಂಗ್ ಶೈಲಿ ವಿವಾದಾತ್ಮಕವಾಗಿತ್ತು ಎಂದು ಮೈದಾನದಲ್ಲಿದ್ದ ಅಂಪೈರ್ಗಳು ವರದಿ ನೀಡಿದ್ದಾರೆ. ಈ ಬಗ್ಗೆ ನರೈನ್ಗೆ ಎಚ್ಚರಿಕೆ ನೀಡಲಾಗುವುದು. ಅವರು ಟೂರ್ನಿಯಲ್ಲಿ ಮುಂದುವರೆಯಬಹುದು. ಆದರೆ ಮುಂದೊಮ್ಮೆ ಇದೇ ತಪ್ಪು ಮರುಕಳಿಸಿದರೆ ಐಪಿಎಲ್-2020ಯಲ್ಲಿ ಅವರು ಬೌಲಿಂಗ್ ಮಾಡುವಂತಿಲ್ಲ. ಬಿಸಿಸಿಐನ ವಿವಾದಾತ್ಮಕ ಬೌಲಿಂಗ್ ಶೈಲಿ ಸಮಿತಿಯು ಈ ಬಗ್ಗೆ ಅನುಮತಿ ನೀಡುವವರೆಗೆ ಅವರಿಗೆ ಬೌಲಿಂಗ್ ಅವಕಾಶವಿರುವುದಿಲ್ಲ ಎಂದು ಐಪಿಎಲ್ ಆಡಳಿತ ಮಂಡಳಿ ತಿಳಿಸಿದೆ.
ಒಂದು ವೇಳೆ ನರೈನ್ ಬೌಲಿಂಗ್ನಿಂದ ನಿಷೇಧಕ್ಕೊಳಗಾದರೆ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡಕ್ಕೆ ದೊಡ್ಡ ಹೊಡೆತ ಬೀಳಲಿದೆ. ಪಂಜಾಬ್ ವಿರುದ್ಧದ ಪಂದ್ಯದಲ್ಲಿ 28 ರನ್ಗೆ 2 ವಿಕೆಟ್ ಪಡೆದ ಅವರು, ಕೊನೆಯ ಓವರ್ನಲ್ಲಿ ಉತ್ತಮ ನಿರ್ವಹಣೆಯಿಂದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಅಲ್ಲದೆ ನರೈನ್ ಬೌಲಿಂಗ್ ಬಗ್ಗೆ ಈ ರೀತಿಯ ದೂರುಗಳು ಬರುತ್ತಿರುವುದು ಇದೇ ಮೊದಲಲ್ಲ. ಈ ಹಿಂದೆಯೂ ಕೂಡ ಅವರ ಬೌಲಿಂಗ್ ಶೈಲಿ ಬಗ್ಗೆ ವಿವಾದಾತ್ಮಕವಾಗಿದ್ದ ಹಿನ್ನೆಲೆ 2014ರ ಚಾಂಪಿಯನ್ಸ್ ಟ್ರೋಫಿ, 2015ರ ವಿಶ್ವಕಪ್‍ನಲ್ಲಿ ಕೆರಿಬಿಯನ್ ತಂಡದಿಂದ ಹೊರಗುಳಿಯುವಂತಾಗಿತ್ತು.
