ಸೌತಾಂಪ್ಟನ್ : ಭಾರತ ಮತ್ತು ನ್ಯೂಜಿಲ್ಯಾಂಡ್ ತಂಡಗಳು ಜೂನ್ 18ರಂದು ನಡೆಯುವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ನಲ್ಲಿ ಮುಖಾಮುಖಿಯಾಗಲಿವೆ. ಇದೇ ಮೊದಲ ಬಾರಿಗೆ ನಡೆಯುತ್ತಿರುವ WTCಯಲ್ಲಿ ವಿರಾಟ್ ಕೊಹ್ಲಿ ಪಡೆ ಪ್ರಾಬಲ್ಯಯುತ ಪ್ರದರ್ಶನ ತೋರಿದೆ. ವಿದೇಶದಲ್ಲಿ ಆಡಿದ 3 ಸರಣಿಗಳಲ್ಲಿ 2ರಲ್ಲಿ ಗೆದ್ದಿದ್ದರೆ, ಪ್ರತಿಸ್ಪರ್ಧಿ ನ್ಯೂಜಿಲ್ಯಾಂಡ್ 2 ವಿದೇಶಿ ಸರಣಿಯಲ್ಲಿ ಕೇವಲ ಒಂದೇ ಒಂದು ಪಂದ್ಯ ಮಾತ್ರ ಗೆದ್ದಿದೆ. ಗೆದ್ದಿರುವ ಮೂರು ಸರಣಿಗಳು ತವರಿನಲ್ಲಿ ನಡೆದಿವೆ ಎನ್ನುವುದು ಗಮನಾರ್ಹ ಸಂಗತಿ.
WTCಯಲ್ಲಿ 2019-21ರ ಅವಧಿಯಲ್ಲಿ ನ್ಯೂಜಿಲ್ಯಾಂಡ್ ತನ್ನ ನೆಲದಲ್ಲಿ ಭಾರತ, ಪಾಕಿಸ್ತಾನ ಮತ್ತು ವೆಸ್ಟ್ ಇಂಡೀಸ್ ವಿರುದ್ಧ ಸರಣಿ ಗೆದ್ದಿದೆ. ಇದೇ ಅವರನ್ನು ಫೈನಲ್ ಪ್ರವೇಶಿಸುವಂತೆ ಮಾಡಿದೆ. ಆದರೆ, ವಿಲಿಯಮ್ಸನ್ ಪಡೆ WTCಯಲ್ಲಿ ಕಳಪೆ ಆರಂಭ ಪಡೆದಿತ್ತು. ಮೊದಲು 2019ರ ಶ್ರೀಲಂಕಾ ಪ್ರವಾಸದಲ್ಲಿ 1-1ರಲ್ಲಿ ಡ್ರಾ ಸಾಧಿಸಿದರೆ, ನಂತರ 2019-20ರಲ್ಲಿ ಆಸ್ಟ್ರೇಲಿಯಾ ಪ್ರವಾಸದಲ್ಲಿ 0-3ರಲ್ಲಿ ಹೀನಾಯ ಸೋಲು ಕಂಡಿತ್ತು.
ಆದರೆ, ಭಾರತ ತಂಡದ 2019ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ 2-0ಯಲ್ಲಿ ಗೆಲ್ಲುವ ಮೂಲಕ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನಲ್ಲಿ ಅದ್ಭುತವಾಗಿ ತನ್ನ ಅಭಿಯಾನವನ್ನು ಆರಂಭಿಸಿತ್ತು. ನಂತರ ತವರಿನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 3-0, ಬಾಂಗ್ಲಾದೇಶದ ವಿರುದ್ಧ 2-0 ಗೆದ್ದರೆ, ಕಿವೀಸ್ನಲ್ಲಿ 0-2ರಲ್ಲಿ ಸೋಲು ಕಂಡಿತ್ತು.
ಕೋವಿಡ್ ವಿರಾಮದ ನಂತರ ಆಸ್ಟ್ರೇಲಿಯಾದಲ್ಲಿ ಆಸೀಸ್ ತಂಡದ ವಿರುದ್ಧ 4 ಪಂದ್ಯಗಳ ಸರಣಿಯನ್ನು 2-1ರಲ್ಲಿ ಗೆದ್ದು ದಾಖಲೆ ಬರೆದರೆ ಮತ್ತೆ ತವರಿನಲ್ಲಿ ಬಲಿಷ್ಠ ಇಂಗ್ಲೆಂಡ್ ವಿರುದ್ಧ 3-1ರಲ್ಲಿ ಗೆದ್ದು ಅಗ್ರಸ್ಥಾನಿಯಾಗಿ ಫೈನಲ್ ಪ್ರವೇಶ ಪಡೆದಿದೆ.
ದಾಖಲೆಗಳನ್ನು ನೋಡಿದರೆ ಭಾರತ ತಂಡವೇ ಮೇಲುಗೈ ಸಾಧಿಸಿದೆ. ಆದರೆ, ಕಿವೀಸ್ ಮತ್ತು ಇಂಗ್ಲೆಂಡ್ ಪಿಚ್ಗಳು ಹೆಚ್ಚು ಕಡಿಮೆ ಒಂದೇ ರೀತಿ ಇರುವುದರಿಂದ ಭಾರತಕ್ಕಿಂತ ನ್ಯೂಜಿಲ್ಯಾಂಡ್ ತಂಡಕ್ಕೆ WTC ಗೆಲ್ಲುವ ಅವಕಾಶ ಇದೆ ಎಂದು ಬ್ರೆಟ್ ಲೀ, ಗ್ಲೇನ್ ಟರ್ನರ್ ಅಂತಹ ಮಾಜಿ ಕ್ರಿಕೆಟರ್‌ಗಳು ಅಭಿಪ್ರಾಯ ಪಟ್ಟಿದ್ದಾರೆ.
ಆದರೆ, ಟೂರ್ನಿಯುದ್ದಕ್ಕೂ ಮತ್ತು ಆಸ್ಟ್ರೇಲಿಯಾದಲ್ಲಿ ಆದ್ಭುತ ಪ್ರದರ್ಶನ ತೋರಿರುವ ಭಾರತ ತಂಡವನ್ನು ಮಣಿಸುವುದು ನಮ್ಮ ತಂಡಕ್ಕೆ ದೊಡ್ಡ ಸವಾಲು ಎಂದು ಸ್ಪಿನ್ನರ್ ಇಶ್ ಸೋಧಿ ಅಭಿಪ್ರಾಯ ಪಟ್ಟಿದ್ದಾರೆ.
ದಾಖಲೆಗಳು ಭಾರತದ ಪರವಾಗಿದ್ದರೆ, ಇಂಗ್ಲೆಂಡ್ ಪರಿಸ್ಥಿತಿ ಕಿವೀಸ್ ಪರವಾಗಿವೆ. ಆದರೆ, ಭಾರತ ತಂಡ ಆಸ್ಟ್ರೇಲಿಯಾದಲ್ಲಿ ನೀಡಿದ ಪ್ರದರ್ಶನವನ್ನು ಮರುಕಳಿಸಿದರೆ ನಿಜಕ್ಕೂ ಚೊಚ್ಚಲ ವಿಶ್ವಟೆಸ್ಟ್ ಚಾಂಪಿಯನ್ಶಿಪ್ ಗೆಲ್ಲುವುದು ಅಸಾಧ್ಯವೇನಲ್ಲ.
ಇದನ್ನು ಓದಿ:WTC ಫೈನಲ್ಗೆ ಕಿವೀಸ್ ತಯಾರಿ : 2ನೇ ಟೆಸ್ಟ್ ಪಂದ್ಯದಿಂದ ಪ್ರಮುಖ ಆಟಗಾರರ ಕೈಬಿಡಲು ನಿರ್ಧಾರ
