ನವದೆಹಲಿ: ತಂಡದಲ್ಲಿ ಸಂಪೂರ್ಣ ಸ್ವಾತಂತ್ರ್ಯ ನೀಡಿದರೂ ರಾಹುಲ್ ಹೊರಹೋಗಲು ಬಯಸಿದ ನಡೆಗೆ ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿ ಬೇಸರ ವ್ಯಕ್ತಪಡಿಸಿದೆ. ಅಲ್ಲದೇ ತಾವೂ ರಿಟೈನ್ ಮಾಡಿಕೊಳ್ಳುವ ಮುನ್ನ ಹೊಸ ಫ್ರಾಂಚೈಸಿಗಳು ಅವರನ್ನು ಸಂಪರ್ಕಿಸಿದ್ದೇ ಆದರೆ ಅದು ಅನೈತಿಕ ಎಂದು ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿ ಹೇಳಿದೆ.
ರಾಹುಲ್ 2020ರ ಆವೃತ್ತಿಯಲ್ಲಿ ರವಿ ಚಂದ್ರನ್ ಅಶ್ವಿನ್ ಬದಲಿಗೆ ಪಂಜಾಬ್ ತಂಡದ ನಾಯಕನಾಗಿ ನೇಮಕವಾಗಿದ್ದರು. ಅವರೂ ಕಳೆದ 2 ಆವೃತ್ತಿಗಳಲ್ಲೂ ಅತ್ಯುತ್ತಮವಾಗಿ ಬ್ಯಾಟಿಂಗ್ ಪ್ರದರ್ಶನ ತೋರಿದರೂ ನಾಯಕನಾಗಿ ತಂಡವನ್ನು ಪ್ಲೇ ಆಫ್ ಹಂತಕ್ಕೆ ಕೊಂಡೊಯ್ಯಲು ವಿಫಲರಾಗಿದ್ದರು. ಇದೀಗ ರಾಹುಲ್ ಆರ್ಪಿಎಸ್ಜಿ ಗ್ರೂಪ್ ಮಾಲಿಕತ್ವದ ಲಖನೌ ಫ್ರಾಂಚೈಸಿ ರಾಹುಲ್ರನ್ನು ಸೆಳೆಯಲು ಪ್ರಯತ್ನಿಸುತ್ತಿದೆ. ಅವರು 2022ಕ್ಕೆ ನೂತನ ಫ್ರಾಂಚೈಸಿಯನ್ನು ಮುನ್ನಡೆಸಲಿದ್ದಾರೆ ಎಂಬ ವಿಷಯಗಳು ಭಾರಿ ಚರ್ಚೆಯಾಗುತ್ತಿವೆ.
ನಾವು ರಾಹುಲ್ರನ್ನು ರಿಟೈನ್ ಮಾಡಿಕೊಳ್ಳುವುದಕ್ಕೆ ಬಯಸಿದ್ದೆವು. ಆದರೆ ಅವರು ಹರಾಜಿಗೆ ಹೋಗುವುದಕ್ಕೆ ಬಯಸಿದರು. ಒಂದು ವೇಳೆ ಇದೆಲ್ಲಾ ಮುಗಿಯುವ ಮುನ್ನವೇ ಅವರನ್ನು ಬೇರೆ ಫ್ರಾಂಚೈಸಿ ಸಂಪರ್ಕಿಸಿದ್ದರೆ, ಅದು ಅನೈತಿಕವಾಗುತ್ತದೆ ಎಂದು ಪಂಜಾಬ್ ಕಿಂಗ್ಸ್ ಸಹಾ ಮಾಲೀಕ ನೆಸ್ ವಾಡಿಯಾ ಪಿಟಿಐಗೆ ಹೇಳಿದ್ದಾರೆ.
ರಾಹುಲ್ ಲಖನೌ ಫ್ರಾಂಚೈಸಿಯನ್ನು ದೊಡ್ಡ ಮೊತ್ತದ ಆಮಿಷಕ್ಕೊಳಗಾಗಿರಬಹುದೇ ಎಂದು ಕೇಳಿದ್ದಕ್ಕೆ, ನೆಸ್ ವಾಡಿಯಾ, " ಹಾಗಾಗಿರುವುದಿಲ್ಲ ಎಂದು ನಾನು ಭಾವಿಸುತ್ತೇನೆ ಏಕೆಂದರೆ ಅದು ಬಿಸಿಸಿಐ ನಿಗದಿಪಡಿಸಿದ ಮಾರ್ಗಸೂಚಿಗಳಿಗೆ ವಿರುದ್ಧವಾಗಿದೆ" ಎಂದು ಅವರು ಇದೇ ವೇಳೆ ಹೇಳಿದ್ದಾರೆ.
2010ರಲ್ಲಿ ರವೀಂದ್ರ ಜಡೇಜಾ ರಾಜಸ್ಥಾನ್ ರಾಯಲ್ಸ್ ತಂಡ ತಮ್ಮನ್ನು ಬಿಡುಗಡೆ ಮಾಡುವ ಮುನ್ನಡೆ ಬೇರೆ ಫ್ರಾಂಚೈಸಿಯೊಂದಿಗೆ ಒಪ್ಪಂದ ಮಾಡಿಕೊಳ್ಳಲು ಬಯಸಿದ್ದರಿಂದ ಒಂದು ವರ್ಷ ಐಪಿಎಲ್ನಿಂದ ಅಮಾನತುಗೊಂಡಿದ್ದರು.
ಹೊಸ ತಂಡಗಳಾದ ಲಖನೌ ಮತ್ತು ಅಹ್ಮದಾಬಾದ್ ಫ್ರಾಂಚೈಸಿಗಳು ಡಿಸೆಂಬರ್ 25ರವರೆಗೆ ತಲಾ 3 ಆಟಗಾರರನ್ನು ಖರೀದಿಸಲು ಅವಕಾಶವಿದೆ. ರಾಹುಲ್, ರಶೀದ್ ಖಾನ್, ಹಾರ್ದಿಕ್ ಪಾಂಡ್ಯ, ಅಶ್ವಿನ್, ಯುಜ್ವೇಂದ್ರ ಚಹಲ್ ಮತ್ತು ಶಿಖರ್ ಧವನ್, ಡೇವಿಡ್ ವಾರ್ನರ್ ಅವರಂತಹ ಕೆಲವು ಸ್ಟಾರ್ ಆಟಗಾರರನ್ನು ಈ ಎರಡು ಫ್ರಾಂಚೈಸಿಗಳು ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.
ಇದನ್ನೂ ಓದಿ:'See You On The Other Side' : ಪಂಜಾಬ್ ಕಿಂಗ್ಸ್ನಿಂದ ಬೇರ್ಪಟ್ಟ ಕೆ ಎಲ್ ರಾಹುಲ್ ಮೊದಲ ಟ್ವೀಟ್
