ಮುಂಬೈ: ಭಾರತ ತಂಡ ವಿಶ್ವಕಪ್ನಲ್ಲಿ ಸೋಲು ಕಾಣಲು ಆಟಗಾರರ ಬ್ಯಾಟಿಂಗ್ ಕ್ರಮಾಂಕದ ಸಂಯೋಜನೆ ಹಾಗೂ ಸೆಮಿಫೈನಲ್ನಲ್ಲಿ ಧೋನಿಯನ್ನು 7ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ಗೆ ಕಳುಹಿಸದ್ದೇ ಕಾರಣವೆಂದು ಬಿಸಿಸಿಐ ಅಯ್ಕೆ ಸಮಿತಿಯನ್ನು ಮಾಜಿ ಲೆಜೆಂಡ್ ಆಲ್ರೌಂಡರ್ ಯುವರಾಜ್ ಸಿಂಗ್ ದೂರಿದ್ದಾರೆ.
ಟೀಮ್ ಇಂಡಿಯಾದ ಮ್ಯಾನೇಜ್ಮೆಂಟ್ ತಂಡದ ಬ್ಯಾಟಿಂಗ್ ಕ್ರಮಾಂಕ ಸಂಯೋಜನೆಯಲ್ಲಿ ದೊಡ್ಡ ತಪ್ಪು ಮಾಡಿತು. ವಿಶ್ವಕಪ್ಗೂ ಹಿಂದಿನ ಮೂರು ವರ್ಷ ನಾಲ್ಕನೇ ಕ್ರಮಾಂಕದಲ್ಲಿ ಆಡಿದ್ದ ಅಂಬಾಟಿ ರಾಯುಡರನ್ನು ತಂಡದಿಂದ ಕೈಬಿಟ್ಟಿದ್ದು ದೊಡ್ಡ ದುರಂತ. ಅವರ ಜಾಗಕ್ಕೆ ಅನುಭವವಿಲ್ಲದ ವಿಜಯ ಶಂಕರ್ರನ್ನು ಆಯ್ಕೆ ಮಾಡಿದರು. ಧವನ್ ಹಾಗೂ ಶಂಕರ್ ಗಾಯಗೊಂಡ ಮೇಲು ಮತ್ತೆ ರಾಯುಡರನ್ನು ಕಡೆಗಣಿಸಿ ಪಂತ್ಗೆ ಅವಕಾಶ ನೀಡಿದ್ದು ಕೂಡ ಸರಿಯಾದ ಕ್ರಮವಲ್ಲ ಎಂದು ಯುವಿ ಬೇಸರ ವ್ಯಕ್ತಪಡಿಸಿದ್ದಾರೆ.
ಕೇವಲ 5 ಏಕದಿನ ಪಂದ್ಯವಾಡಿದ್ದ ಪಂತ್ ಹಾಗೂ ಶಂಕರ್ ತಂಡ ಸೇರಿದ್ದಕ್ಕೆ ನನ್ನ ವಿರೋಧವಿಲ್ಲ. ಆದರೆ ಅವರು ಬಂದ ಜಾಗಕ್ಕೆ ರಾಯಡು ತುಂಬಾ ಅನುಭವಿ ಆಟಗಾರರಾಗಿದ್ದರು ಎಂಬುದೇ ನನ್ನ ಅನಿಸಿಕೆ. ಅಲ್ಲದೆ ಅದೇ ವರ್ಷ ರಾಯುಡು ಕಿವೀಸ್ ವಿರುದ್ಧ 90 ರನ್ ಗಳಿಸಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದಿದ್ದರು. ಆಸ್ಟ್ರೇಲಿಯಾ ವಿರುದ್ಧದ ಸರಣಿಯಲ್ಲೂ ಆಡಿದ್ದರು. ಹಾಗಾಗಿ ರಾಯುಡು 4ನೇ ಕ್ರಮಾಂಕಕ್ಕೆ ಸೂಕ್ತವಾದ ಆಟಗಾರನಾಗಿದ್ದರು ಎಂದು ಎರಡು ವಿಶ್ವಕಪ್ಗಳ ಹೀರೋ ಯುವಿ ಆಯ್ಕೆ ಸಮಿತಿ ನಡೆಯನ್ನು ಖಂಡಿಸಿದ್ದಾರೆ.
ನನ್ನ ಪ್ರಕಾರ ಇಡೀ ಟೂರ್ನಿಯಿಂದ ಹೊರಗುಳಿದಿದ್ದ ದಿನೇಶ್ ಕಾರ್ತಿಕ್ ಸೆಮಿಫೈನಲ್ನಲ್ಲಿ 4ನೇ ಕ್ರಮಾಂಕದಲ್ಲಿ ಆಡಿದ್ದು ಕೂಡ ಚರ್ಚಿಸಬೇಕಾದಂತಹ ವಿಚಾರ. ಅದರಲ್ಲೂ ಧೋನಿಯನ್ನು 7ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಕಳುಸಿದ್ದು ಆಡಳಿತ ಮಂಡಳಿಯ ದೊಡ್ಡ ದೋಷ. ಮಹತ್ವದ ಪಂದ್ಯಗಳಲ್ಲಿ ಇಂತಹ ನಿರ್ಧಾರ ತೆಗೆದುಕೊಳ್ಳಲಾಗುವುದಿಲ್ಲ ಎಂದು ಯುವರಾಜ್ ತಿಳಿಸಿದ್ದಾರೆ.
ತಂಡದಲ್ಲಿನ 4ನೇ ಕ್ರಮಾಂಕದ ಬ್ಯಾಟ್ಸ್ಮನ್ ಇಡೀ ಟೂರ್ನಿಯಲ್ಲಿ 48 ರನ್ ಗಳಿಸಿದ್ದೇ ಗರಿಷ್ಠವಾದರೆ ಇದು ಆಯ್ಕೆ ಸಮಿತಿಯ ಅಜ್ಞಾನಕ್ಕೆ ಹಿಡಿದ ಕೈಗನ್ನಡಿ. ಅವರು ಸಂಪೂರ್ಣ ರೋಹಿತ್ ಶರ್ಮಾ ಹಾಗೂ ವಿರಾಟ್ ಕೊಹ್ಲಿಯನ್ನು ನಂಬಿಕೊಂಡರು. ಆದರೆ, ತಂಡದಲ್ಲಿ ಇಬ್ಬರ ಆಟದಿಂದ ಪಂದ್ಯ ಗೆಲ್ಲಲು ಸಾಧ್ಯವಿಲ್ಲ. ಆಸ್ಟ್ರೇಲಿಯಾ ತಂಡದ ಸಂಯೋಜನೆ ನೋಡಿದರೆ, 2003, 2007, 2015ರಲ್ಲಿ ಹಿಂದೆ ತಂಡದಲ್ಲಿ ಸೆಟ್ ಆದಂತಹ ಆಟಗಾರರನ್ನು ಸೇರಿಸಿಕೊಂಡಿತ್ತು. ಒಟ್ಟಾರೆ ನಮ್ಮ ವಿಶ್ವಕಪ್ ತಂಡದ ಸಂಯೋಜನೆ ಸಂಪೂರ್ಣ ಕೆಟ್ಟದಾಗಿತ್ತು ಎಂದು ಯುವರಾಜ್ ಸಿಂಗ್ ಅಭಿಪ್ರಾಯಪಟ್ಟಿದ್ದಾರೆ.
