ಮುಂಬೈ: ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ತಮ್ಮ ಮೊದಲ ಶತಕ ಸಿಡಿಸಿ ಇಂದಿಗೆ ಬರೋಬ್ಬರಿ 10 ವರ್ಷ ತುಂಬಿದೆ.
ಅಂಡರ್ 19 ವಿಶ್ವಕಪ್ ಗೆದ್ದ ಒಂದು ವರ್ಷದಲ್ಲಿ ಸೀನಿಯರ್ ಟೀಮ್ ಸೇರಿಕೊಂಡ ವಿರಾಟ್ ಕೊಹ್ಲಿ ತಮ್ಮ ಸಾಮರ್ಥ್ಯ ತೋರಿದ್ದು 2009 ಡಿಸೆಂಬರ್ 24 ರಂದು ನಡೆದ ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ. ಆ ಪಂದ್ಯದಲ್ಲಿ ಕೊಹ್ಲಿ ಭರ್ಜರಿ ಶತಕದ ಮೂಲಕ ತಮ್ಮ ವೃತ್ತಿ ಜೀವನದ ಚೊಚ್ಚಲ ಶತಕ ಸಿಡಿಸಿದ್ದರು.
ಅಂದು ಮೊದಲು ಬ್ಯಾಟಿಂಗ್ ನಡೆಸಿದ್ದ ಶ್ರೀಲಂಕಾ ಉಪುಲ್ ತರಂಗ(118) ಅವರ ಶತಕದ ನೆರವಿನಿಂದ 315 ರನ್ಗಳಿಸಿತ್ತು. ಈ ಮೊತ್ತವನ್ನು ಬೆನ್ನತ್ತಿದ ಭಾರತ ತಂಡ 23 ರನ್ಗಳಾಗುವಷ್ಟರಲ್ಲಿ ಸಚಿನ್ ಹಾಗೂ ತೆಂಡೂಲ್ಕರ್ ವಿಕೆಟ್ ಕಳೆದುಕೊಂಡಿತ್ತು. ಆದರೆ ಗಂಭೀರ್ ಜೊತೆ ಸೇರಿಕೊಂಡ ಕೊಹ್ಲಿ 224 ರನ್ಗಳ ಜೊತೆಯಾಟ ನಡೆಸಿ ಭಾರತಕ್ಕೆ ಜಯ ತಂದುಕೊಟ್ಟಿದ್ದರು.
ಆ ಪಂದ್ಯದಲ್ಲಿ 107 ರನ್ಗಳಿಸಿ ಕೊಹ್ಲಿ ಔಟಾಗಿದ್ದರು. ಗೌತಮ್ ಗಂಭೀರ್ ಅಜೇಯ 150 ರನ್ ಗಳಿಸಿ ಭಾರತಕ್ಕೆ 7 ವಿಕೆಟ್ಗಳ ಸುಲಭ ಜಯ ತಂದುಕೊಟ್ಟಿದ್ದರು. 150 ರನ್ಗಳಿಸಿದ ಗಂಭೀರ್ ಪಂದ್ಯ ಶ್ರೇಷ್ಠ ಪ್ರಶಸ್ತಿಯನ್ನು ಕೊಹ್ಲಿ ಜೊತೆ ಹಂಚಿಕೊಂಡು ಹೃದಯವೈಶಾಲ್ಯತೆ ಮೆರೆದಿದ್ದರು.
ಅಂದು ತಮ್ಮ ಮೊದಲ ಶತಕಕ್ಕೆ ಅಡಿಪಾಯ ಹಾಕಿದ್ದ ಕೊಹ್ಲಿ ಇಂದು ಏಕದಿನ ಕ್ರಿಕೆಟ್ನಲ್ಲಿ 43 ಶತಕ ಸಿಡಿಸುವ ಮೂಲಕ ಹೆಚ್ಚು ಶತಕ ದಾಖಲಿಸಿರುವ 2ನೇ ಬ್ಯಾಟ್ಸ್ಮನ್ ಎನಿಸಿಕೊಂಡಿದ್ದಾರೆ. ಇನ್ನು ಟೆಸ್ಟ್ ಕ್ರಿಕೆಟ್ನಲ್ಲೂ 27 ಶತಕ ಸಿಡಿಸಿರುವ ಕೊಹ್ಲಿ ಭಾರತ ಕ್ರಿಕೆಟ್ ತಂಡದ ಅತ್ಯಂತ ಯಶಸ್ವಿ ನಾಯಕ ಎಂಬ ದಾಖಲೆಗೂ ಪಾತ್ರರಾಗಿದ್ದಾರೆ.
ಕೊಹ್ಲಿ ನಾಯಕತ್ವದಲ್ಲಿ ಇತ್ತೀಚೆಗೆ ವೆಸ್ಟ್ ಇಂಡೀಸ್ ವಿರುದ್ಧ ಸತತ 10ನೇ ಏಕದಿನ ಸರಣಿ ಗೆದ್ದ ದಾಖಲೆಗೆ ಪಾತ್ರರಾಗಿದ್ದರು.
