ಟ್ರಿನಿಡಾಡ್: ಬೌಲರ್ಗಳ ಅದ್ಭುತ ಪ್ರದರ್ಶನದ ನೆರವಿನಿಂದ ಸೇಂಟ್ ಲೂಸಿಯಾ ಜೌಕ್ಸ್ ತಂಡ ಬಲಿಷ್ಠ ಗಯಾನ ಅಮೇಜಾನ್ ವಾರಿಯರ್ಸ್ ವಿರುದ್ಧ 10 ವಿಕೆಟ್ಗಳ ಭರ್ಜರಿ ಜಯ ಸಾಧಿಸಿ ಫೈನಲ್ ಪ್ರವೇಶಿಸಿದೆ.
ಮಂಗಳವಾರ ನಡೆದ 2ನೇ ಸೆಮಿಫೈನಲ್ನಲ್ಲಿ ಲೂಸಿಯಾ ಜೌಕ್ಸ್ ತಂಡದ ಶಿಸ್ತು ಬದ್ದ ದಾಳಿಗೆ ತತ್ತರಿಸಿದ ಗಯಾನ ಕೇವಲ 55 ರನ್ಗಳಿಗೆ ಆಲೌಟ್ ಆಯಿತು. ಈ ಮೂಲಕ ಸಿಪಿಎಲ್ ಇತಿಹಾಸದಲ್ಲೇ ಅತ್ಯಂತ ಕಡಿಮೆ ಮೊತ್ತಕ್ಕೆ ಆಲೌಟ್ ಆದ ಎರಡನೇ ತಂಡ ಎಂಬ ಕುಖ್ಯಾತಿಗೆ ಕಾರಣವಾಯಿತು. 25 ರನ್ಗಳಿಸಿದ ಚಂದ್ರಪಾಲ್ ಹೇಮರಾಜ್ ತಂಡದ ಗರಿಷ್ಠ ಸ್ಕೋರರ್ ಆದರು.
ಹೆಟ್ಮೈರ್(0) ಪೂರನ್(11), ರಾಸ್ ಟೇಲರ್(3), ಬ್ರೆಂಡನ್ ಕಿಂಗ್(0), ಕೀಮೋ ಪಾಲ್(2) , ಕ್ರಿಸ್ಗ್ರೀನ್(11), ಶೆಫಾರ್ಡ್(1) ನವೀನ್ ಉಲ್ಹಕ್(2) ಹಾಗೂ ತಾಹೀರ್ ಕೂಡ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿ ದಯನೀಯ ವೈಫಲ್ಯ ಅನುಭವಿಸಿದರು.
ಸೇಂಟ್ ಲೂಸಿಯಾ ಜೌಕ್ಸ್ ಪರ ಕುಗ್ಗೆಲೀಜ್ನ್ 2, ಜಹೀರ್ ಖಾನ್ 2, ರಾಸ್ಟನ್ ಚೇಸ್ 2, ಮಾರ್ಕ್ ಡೇಯಲ್ 2 ಹಾಗೂ ನಬಿ ಮತ್ತು ಜಾವೆಲ್ ಗ್ಲೆನ್ ತಲಾ ಒಂದು ವಿಕೆಟ್ ಪಡೆದರು ಗಯಾನ್ ತಂಡವನ್ನು ಅಲ್ಪ ಮೊತ್ತಕ್ಕೆ ಕಟ್ಟಿಹಾಕಿದರು.
56 ರನ್ಗಳ ಗುರಿಯನ್ನು ಬೆನ್ನತ್ತಿದ ಡರೇನ್ ಸಾಮಿ ಪಡೆ 4.3 ಓವರ್ಗಳಲ್ಲೇ ವಿಕೆಟ್ ನಷ್ಟವಿಲ್ಲದೆ ಗುರಿ ತಲುಪಿತು. ರಖೀಮ್ ಕಾರ್ನವಾಲ್ 17 ಎಸೆತಗಳಲಗಲಿ 3 ಸಿಕ್ಸರ್ ಹಾಗೂ 2 ಬೌಂಡರಿ ಸಹಿತ 32, ಮಾರ್ಕ್ ಡೇಯಲ್ 10 ಎಸೆತಗಳಲ್ಲಿ 3 ಬೌಂಡರಿ , ಒಂದು ಸಿಕ್ಸರ್ ನೆರವಿನಿಂದ 19 ರನ್ಗಳಿಸಿದರು.
ಟೂರ್ನಿಯಲ್ಲಿ ತನ್ನ ಬೌಲಿಂಗ್ ಬಲದಿಂದ ಫೈನಲ್ ಪ್ರವೇಶಿಸಿರುವ ಸೇಂಟ್ ಲೂಸಿಯಾ ಜೌಕ್ಸ್ 2020ರ ಲೀಗ್ನಲ್ಲಿ ಆಡಿದ 11 ಪಂದ್ಯಗಳಲ್ಲೂ ದಿಗ್ವಿಜಯ ಸಾಧಿಸಿ ಫೈನಲ್ ಪ್ರವೇಶಿಸಿರುವ ಪೊಲಾರ್ಟ್ ನೇತೃತ್ವದ ಟ್ರಿಂಬಾಗೋ ನೈಟ್ ರೈಡರ್ಸ್ ತಂಡವನ್ನು ಸೆಪ್ಟೆಂಬರ್ 10ರಂದು ಎದುರಿಸಲಿದೆ.
