ಲಾಹೋರ್: ನವೆಂಬರ್ 22ರಿಂದ ಡಿಸೆಂಬರ್ 1ರವರೆಗೆ ರಾವಲ್ಪಿಂಡಿಯ ಪಿಂಡಿ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ವುಮೆನ್ಸ್ ಟಿ-20 ಚಾಂಪಿಯನ್ಶಿಪ್ ನಡೆಯಲಿದೆ. 1.7 ಮಿಲಿಯನ್ ಪಾಕಿಸ್ತಾನ ರೂಪಾಯಿ ಬಹುಮಾನವುಳ್ಳ ರಾಷ್ಟ್ರೀಯ ತ್ರಿಕೋನ ಟಿ-20 ಮಹಿಳಾ ಕ್ರಿಕೆಟ್ ಚಾಂಪಿಯನ್‌ಶಿಪ್‌ನಲ್ಲಿ 42 ಮಹಿಳಾ ಕ್ರಿಕೆಟಿಗರು ಕಾರ್ಯಪ್ರವೃತ್ತರಾಗಲಿದ್ದಾರೆ.
ಮಹಿಳೆಯರ ಕ್ರಿಕೆಟ್ಗೆ ಪ್ರೋತ್ಸಾಹ ಮತ್ತು ಅವರ ಸಾಮರ್ಥ್ಯ ಸಾಬೀತುಪಡಿಸಲು ಅವಕಾಶ ನೀಡುವ ದೃಷ್ಟಿಯಲ್ಲಿ ಪಿಸಿಬಿ ಮೂರು ತಂಡಗಳ ಟೂರ್ನಿಗೆ ಚಾಲನೆ ನೀಡುತ್ತಿದೆ. 10 ದಿನಗಳ ಕಾಲ ನಡೆಯುವ ಈ ಟೂರ್ನಿಯಲ್ಲಿ ಪಿಸಿಬಿ ಬ್ಲಾಸ್ಟರ್ಸ್, ಪಿಸಿಬಿ ಚಾಂಲೆಂಜರ್ಸ್ ಮತ್ತು ಪಿಸಿಬಿ ಡೈನಾಮೈಟ್ಸ್ ತಂಡಗಳು ಸ್ಪರ್ಧಿಸಲಿವೆ.
3 ತಂಡಗಳು ತಲಾ ಎರಡು ಪಂದ್ಯಗಳನ್ನು ಆಡಲಿವೆ. ಡಿಸೆಂಬರ್ 1ರಂದು ಫೈನಲ್ ಪಂದ್ಯ ನಡೆಯಲಿದೆ. ಇನ್ನು ಈ ಬಾರಿ ಟೂರ್ನಿಯ ಬಹುಮಾನ ಮೊತ್ತವನ್ನು ಶೇ. 100ರಷ್ಟು ಹೆಚ್ಚಿಸಲಾಗಿದೆ. ಚಾಂಪಿಯನ್ ತಂಡ ಒಂದು ಮಿಲಿಯನ್ ಪಿಕೆಆರ್ ಮೊತ್ತವನ್ನು ಪಡೆದರೆ, ರನ್ನರ್ ಅಪ್ 5,00,000 ಪಿಕೆಆರ್ ಮೊತ್ತವನ್ನು ಪಡೆಯಲಿದೆ.
ಸರಣಿ ಶ್ರೇಷ್ಠ ಪ್ರಶಸ್ತಿಗೆ 50,00 ಪಿಕೆಆರ್, ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ 20,000 ಪಿಕೆಆರ್ ಮೊತ್ತವನ್ನು ನಿಗದಿ ಮಾಡಲಾಗಿದೆ.
