ಚೆನ್ನೈ: ಐಪಿಎಲ್ ಇತಿಹಾಸದಲ್ಲಿ ಧೋನಿ ನಾಯಕತ್ವದ ಚೆನ್ನೈ ಸೂಪರ್ ಕಿಂಗ್ಸ್ 8 ಬಾರಿ ಫೈನಲ್ ಪ್ರವೇಶಿಸಿದೆ. 3 ಬಾರಿ ಚಾಂಪಿಯನ್ ಪಟ್ಟ ಪಡೆದಿರುವ ಸಿಎಸ್ಕೆ ತಂಡಕ್ಕೆ ಹಾಗೂ ಫ್ರಾಂಚೈಸಿ ಮಾಲೀಕರಿಗೆ ಧೋನಿ ಮಾತು ವೇದವಾಕ್ಯವಾಗಿತ್ತು ಎನ್ನುವುದಕ್ಕೆ ಶ್ರೀನಿವಾಸನ್ ಘಟನೆಯೊಂದನ್ನು ಉದಾಹರಣೆಯಾಗಿ ಕೊಟ್ಟಿದ್ದಾರೆ.
ತಂಡದ ಒಳಿತಿಗಾಗಿ ನೇರವಾಗಿ ಮಾತನಾಡುವ ಧೋನಿ ಒಮ್ಮೆ ಸಿಎಸ್ಕೆ ಫ್ರಾಂಚೈಸಿ ಒಬ್ಬ ದೊಡ್ಡ ಆಟಗಾರರನ್ನ ತಮ್ಮ ತಂಡಕ್ಕೆ ಸೇರಿಸಿಕೊಳ್ಳಲು ಬಯಸಿದ್ದರಂತೆ. ಆದರೆ ಧೋನಿಗೆ ಆ ಆಟಗಾರ ಇಷ್ಟವಿಲ್ಲದ್ದರಿಂದ ಆ ಆಲೋಚನೆ ಬಿಡಲಾಗಿತ್ತು ಎಂದು ಸ್ವತಃ ಸಿಎಸ್ಕೆ ಮಾಲೀಕ ಎನ್ ಶ್ರೀನಿವಾಸನ್ ಹೇಳಿದ್ದಾರೆ.
"ನಾವು ಒಬ್ಬ ಅದ್ಭುತ ಆಟಗಾರನನ್ನು ತಂಡಕ್ಕೆ ಸೇರಿಸಿಕೊಳ್ಳಲು ಧೋನಿಗೆ ಸಲಹೆ ನೀಡಿದ್ದೆವು. ಆದರೆ ಧೋನಿ, ಬೇಡಾ ಸರ್, ಆತ ತಂಡವನ್ನು ಹಾಳು ಮಾಡುತ್ತಾನೆ'. ತಂಡದಲ್ಲಿ ಒಗ್ಗಟ್ಟು ಮುಖ್ಯವಾಗಿರುತ್ತದೆ. ಆದ್ದರಿಂದಲೇ ಅಮೆರಿಕದಲ್ಲಿ ಫ್ರಾಂಚೈಸಿ ಆಧಾರಿತ ಕ್ರೀಡೆಗಳು ಬಹಳ ಸಮಯದಿಂದ ಇವೆ" ಎಂದು ಧೋನಿ ಹೇಳಿದ ಮಾತನ್ನು ಪ್ರಮುಖ ಸುದ್ದಿವಾಹಿನಿಗೆ ನೀಡಿದ ಸಂದರ್ಶನದಲ್ಲಿ ಶ್ರೀನಿವಾಸನ್ ಬಿಚ್ಚಿಟ್ಟಿದ್ದಾರೆ. ಆದರೆ ಶ್ರೀನಿವಾಸನ್ ಧೋನಿ ರಿಜೆಕ್ಟ್ ಮಾಡಿದ ಆಟಗಾರನ ಹೆಸರನ್ನು ಬಹಿರಂಗಗೊಳಿಸಿಲ್ಲ.
ಧೋನಿ 2008ರಲ್ಲಿ ಸಿಎಸ್ಕೆ ತಂಡಕ್ಕೆ ಸೇರ್ಪಡೆಗೊಂಡಿದ್ದರು. ನಿಷೇಧಗೊಂಡಿದ್ದ 2 ಆವೃತ್ತಿ ಬಿಟ್ಟರೆ ಧೋನಿ ಎಲ್ಲಾ ಆವೃತ್ತಿಗಳಲ್ಲೂ ಸಿಎಸ್ಕೆ ತಂಡವನ್ನು ಮುನ್ನಡೆಸಿದ್ದಾರೆ. ಧೋನಿ ನಾಯಕತ್ವಲ್ಲಿ ಸಿಎಸ್ಕೆ 2010, 2011, 2018ರಲ್ಲಿ ಚಾಂಪಿಯನ್ ಪಟ್ಟ ಅಲಂಕರಿಸಿತ್ತು. 2008, 2012, 2013, 2015 ಹಾಗೂ 2019ರಲ್ಲಿ ರನ್ನರ್ ಅಪ್ ಸ್ಥಾನ ಒಡೆದಿದೆ. 10 ಆವೃತ್ತಿಗಳನ್ನು ಪ್ಲೇ ಆಫ್ ತಲುಪಿರುವುದು ಧೋನಿ ನಾಯಕತ್ವದ ಹೆಗ್ಗಳಿಕೆಯಾಗಿದೆ.
