ಸೇಂಟ್ ಲೂಸಿಯ: ವೆಸ್ಟ್ ಇಂಡೀಸ್ ತಂಡದ ಮಾಜಿ ಬ್ಯಾಟ್ಸ್ಮನ್ ಮಾರ್ಲಾನ್ ಸ್ಯಾಮ್ಯುಯೆಲ್ಸ್ ವೃತ್ತಿಪರ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿದ್ದಾರೆ.
ಜೂನ್ ತಿಂಗಳಲ್ಲೇ ಸ್ಯಾಮ್ಯುಯೆಲ್ಸ್ ತಮ್ಮ ನಿವೃತ್ತಿ ಕುರಿತು ಕ್ರಿಕೆಟ್ ಬೋರ್ಡ್ಗೆ ಮಾಹಿತಿ ನೀಡಿದ್ದರು ಎಂದು ಕ್ರಿಕೆಟ್ ವೆಸ್ಟ್ ಇಂಡೀಸ್ ಮುಖ್ಯಸ್ಥ ಜಾನಿ ಗ್ರೇವ್ ತಿಳಿಸಿದ್ದಾರೆ. ಸ್ಯಾಮ್ಯುಯೆಲ್ಸ್ 2018ರಲ್ಲಿ ಕೊನೆಯ ಬಾರಿ ಅಂತಾರಾಷ್ಟ್ರೀಯ ಪಂದ್ಯವನ್ನಾಡಿದ್ದರು.
39 ವರ್ಷದ ಆಟಗಾರ ವಿಂಡೀಸ್ ಪರ 71 ಟೆಸ್ಟ್, 207 ಏಕದಿನ ಹಾಗೂ 67 ಟಿ-20 ಪಂದ್ಯಗಳನ್ನಾಡಿದ್ದಾರೆ. ಅವರು ಒಟ್ಟಾರೆ 11,000ಕ್ಕೂ ಹೆಚ್ಚು ರನ್ ಹಾಗೂ 150ಕ್ಕೂ ಹೆಚ್ಚು ವಿಕೆಟ್ ಪಡೆದಿದ್ದಾರೆ.
ವೆಸ್ಟ್ ಇಂಡೀಸ್ ತಂಡಕ್ಕೆ ಸ್ಯಾಮ್ಯುಯೆಲ್ಸ್ ಮಹತ್ವದ ಸರಣಿಗಳಲ್ಲಿ ಆಪತ್ಪಾಂಧವರಾಗಿದ್ದರು. ಅವರು 2012 ಮತ್ತು 2016ರ ಟಿ-20 ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ಮಿಂಚುವ ಮೂಲಕ ತಂಡಕ್ಕೆ 2 ವಿಶ್ವಕಪ್ ಗೆಲ್ಲುವಲ್ಲಿ ನೆರವಾಗಿದ್ದರು. 2012ರ ವಿಶ್ವಕಪ್ ಫೈನಲ್ನಲ್ಲಿ ಶ್ರೀಲಂಕಾ ವಿರುದ್ಧ 78 ಹಾಗೂ 2016ರ ವಿಶ್ವಕಪ್ ಫೈನಲ್ನಲ್ಲಿ ಇಂಗ್ಲೆಂಡ್ ವಿರುದ್ಧ 85 ರನ್ಗಳಿಸಿದ್ದರು.
ಸ್ಯಾಮ್ಯುಯೆಲ್ಸ್ ವೆಸ್ಟ್ ಇಂಡೀಸ್ ಅಲ್ಲದೆ ಕೆಲವು ಟಿ-20 ಲೀಗ್ಗಳಲ್ಲೂ ಕಾಣಿಸಿಕೊಂಡಿದ್ದಾರೆ. ಅವರು ಐಪಿಎಲ್ನಲ್ಲಿ ಡೆಲ್ಲಿ ಡೇರ್ ಡೇವಿಲ್ಸ್, ಪುಣೆ ವಾರಿಯರ್ಸ್, ಬಿಗ್ಬ್ಯಾಶ್ನಲ್ಲಿ ಮೆಲ್ಬೋರ್ನ್ ರೆನೆಗೇರ್ಡ್ಸ್, ಪಿಎಸ್ಎಲ್ನಲ್ಲಿ ಪೇಶಾವರ ಝಲ್ಮಿ ತಂಡದ ಪರ ಆಡಿದ್ದರು.
