ಜೊಹಾನ್ಸ್‌ಬರ್ಗ್‌: ಮೈದಾನದ ಮೂಲೆ ಮೂಲೆಗೂ ಬೌಂಡರಿ ಬಾರಿಸುವ ಮೂಲಕ ಮಿಸ್ಟರ್ 360 ಎಂದೇ ಖ್ಯಾತಿ ಪಡೆದಿರುವ ಎಬಿ ಡಿ ವಿಲಿಯರ್ಸ್ರನ್ನು ಮತ್ತೆ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ವಾಪಸ್‌ ಕರೆತರುವ ಪ್ರಯತ್ನ ಮಾಡಲಿದ್ದೇನೆ ಎಂದು ಹರಿಣಗಳ ನೂತನ ಕೋಚ್ ಮಾರ್ಕ್ ಬೌಷರ್ ತಿಳಿಸಿದ್ದಾರೆ.
ಆಸ್ಟ್ರೇಲಿಯಾದಲ್ಲಿ ಮುಂದಿನ ವರ್ಷ ಟಿ20 ಕ್ರಿಕೆಟ್ ವಿಶ್ವಕಪ್ ನಡೆಯಲಿದೆ. ಈಗ ದುರ್ಬಲವಾಗಿರುವ ದಕ್ಷಿಣ ಆಫ್ರಿಕಾ ತಂಡದ ಬಲ ಹೆಚ್ಚಿಸಲು ಎಬಿ ಡಿ'ವಿಲಿಯರ್ಸ್ ಸೇರಿದಂತೆ ಇತ್ತೀಚೆಗೆ ನಿವೃತ್ತಿ ಘೋಷಿಸಿರುವ ಕೆಲ ಆಟಗಾರರನ್ನು ತಂಡಕ್ಕೆ ಕರೆತರುವ ಪ್ರಯತ್ನ ಮಾಡುವುದಾಗಿ ಮಾರ್ಕ್ ಬೌಷರ್ ತಿಳಿಸಿದ್ದಾರೆ.
2018ರಲ್ಲಿ ಎಬಿಡಿ ಎಲ್ಲಾ ಮಾದರಿಯ ಕ್ರಿಕೆಟ್ನಿಂದ ನಿವೃತ್ತಿ ಘೋಷಿಸಿದ್ದರು. ಬಳಿಕ 2019ರ ಏಕದಿನ ವಿಶ್ವಕಪ್ ವೇಳೆ ತಂಡದ ಆಡಳಿತ ಮಂಡಳಿ ಬಯಸುವುದಾದರೆ ವಿಶ್ವಕಪ್ ಆಡಲು ಸಿದ್ದ ಎಂದು ತಿಳಿಸಿದ್ದರು. ಆದರೆ, ಇದಕ್ಕೆ ದ.ಆಫ್ರಿಕಾ ಕ್ರಿಕೆಟ್ ಮಂಡಳಿ ಒಪ್ಪಿಗೆ ಸೂಚಿಸಿರಲಿಲ್ಲ. ಪರಿಣಾಮ ಲೀಗ್ ಹಂತದಲ್ಲಿ ಬಾಂಗ್ಲಾದೇಶದಂತಹ ರಾಷ್ಟ್ರದೆದುರು ಸೋಲುಕಾಣುವ ಮೂಲಕ ಟೂರ್ನಿಯಿಂದ ಹೊರಬಿದ್ದಿತ್ತು.
ಹೀಗಾಗಿ ಮಾರ್ಕ್ ಬೌಷರ್ ಟಿ20 ವಿಶ್ವಕಪ್ಗಾದರೂ ತಮ್ಮ ತಂಡವನ್ನು ಬಲಿಷ್ಠಗೊಳಿಸಲು ಬಯಸಿ ಎಬಿಡಿಯನ್ನು ತಂಡಕ್ಕೆ ಕರೆತರುವ ಆಲೋಚನೆ ಮಾಡಿದ್ದಾರೆ. " ವಿಶ್ವಕಪ್‌ನಂತಹ ದೊಡ್ಡ ಟೂರ್ನಿಗಳಿಗೆ ಹೋಗಬೇಕಾದರೆ, ನಿಮಗೆ ನಿಮ್ಮ ತಂಡದಲ್ಲಿ ಬಲಿಷ್ಠ ಆಟಗಾರರು ಬೇಕಾಗುತ್ತದೆ. ವಿಲಿಯರ್ಸ್ ನನ್ನ ಪ್ರಕಾರ ಅತ್ಯುತ್ತಮ ಆಟಗಾರ ಎಂದು ಭಾವಿಸಿದ್ದೇನೆ.
ಹೀಗಾಗಿ ನಾನೇಕೆ ಒಮ್ಮೆ ಅವರೊಡನೆ ಈ ಕುರಿತು ಮಾತನಾಡಬಾರದು? ನಾನು ಈಗಷ್ಟೇ ಕೆಲಸ ಪಡೆದಿದ್ದೇನೆ. ಮುಂದಿನ ದಿನಗಳಲ್ಲಿ ಕೆಲವು ಆಟಗಾರರನ್ನು ಭೇಟಿ ಮಾಡಿ ಅವರೊಡನೆ ಚರ್ಚೆ ನಡೆಸಲಿದ್ದೇನೆ " ಎಂದು ಬೌಷರ್ ಹೇಳಿದ್ದಾರೆ. 35 ವರ್ಷದ ಎಬಿಡಿ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿದರೂ ದೇಶ ವಿದೇಶಗಳ ಟಿ20 ಲೀಗ್ಗಳಲ್ಲಿ ಮಾತ್ರ ಇನ್ನೂ ಸಕ್ರಿಯರಾಗಿದ್ದಾರೆ.
