ನವದೆಹಲಿ: ಟೀಂ ಇಂಡಿಯಾದ ಕಪ್ತಾನ ವಿರಾಟ್ ಕೊಹ್ಲಿಗೆ ಇಂದು 31ನೇ ಹುಟ್ಟುಹಬ್ಬದ ಸಂಭ್ರಮ. ಸದ್ಯ ಬಾಂಗ್ಲಾ ವಿರುದ್ಧ ಟಿ-20 ಸರಣಿಯಿಂದ ಹೊರಗುಳಿದಿರುವ ಕೊಹ್ಲಿ ತಮ್ಮ ಪತ್ನಿ ಅನುಷ್ಕಾ ಜೊತೆಗೆ ಎಂಜಾಯ್ ಮಾಡುತ್ತಿದ್ದಾರೆ.
19 ವರ್ಷದೊಳಗಿನ ವಿಶ್ವಕಪ್ನಲ್ಲಿ ತಂಡವನ್ನು ಮುನ್ನಡೆಸಿದ ವಿರಾಟ್ ಕೊಹ್ಲಿ ವಿಶ್ವಕಪ್ ಗೆಲ್ಲಿಸಿಕೊಟ್ಟಿದ್ದರು. ಈ ಟೂರ್ನಿಯಿಂದಲೇ ಕೊಹ್ಲಿ ರಾಷ್ಟ್ರೀಯ ತಂಡದ ಟಿಕೆಟ್ ಪಡೆದಿದ್ದರು. ಹಾಗಿದ್ದರೆ ಕೊಹ್ಲಿ ಜೊತೆಗೆ ಅಂದು ಆಡಿದ್ದ ಉಳಿದ ಆಟಗಾರರು ಎಲ್ಲಿದ್ದಾರೆ ಎನ್ನುವ ಕುತೂಹಲಕಾರಿ ಮಾಹಿತಿ ಇಲ್ಲಿದೆ..
ರವೀಂದ್ರ ಜಡೇಜಾ:
ಟೀಂ ಇಂಡಿಯಾದ ಶ್ರೇಷ್ಠ ಆಲ್ರೌಂಡರ್ ಆಗಿ ಗುರುತಿಸಿಕೊಂಡಿರುವ ರವೀಂದ್ರ ಜಡೇಜಾ, 46 ಟೆಸ್ಟ್, 156 ಏಕದಿನ ಹಾಗೂ 44 ಟಿ-20 ಪಂದ್ಯವನ್ನಾಡಿದ್ದಾರೆ. ವಿರಾಟ್ ಕೊಹ್ಲಿ ಬಳಗದ ಸದ್ಯದ ನಂಬಿಕಸ್ತ ಆಟಗಾರನಾಗಿ ಜಡ್ಡು ತಂಡದಲ್ಲಿದ್ದಾರೆ. ಐಪಿಎಲ್ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್, ಗುಜರಾತ್ ಲಯನ್ಸ್, ಕೊಚ್ಚಿ ಟಸ್ಕರ್ಸ್ ಕೇರಳ ಹಾಗೂ ರಾಜಸ್ಥಾನ ರಾಯಲ್ಸ್ ತಂಡದಲ್ಲಿ ಆಡಿದ್ದಾರೆ.
ಅಜಿತೇಶ್ ಅರ್ಗಲ್:
U-19 ವಿಶ್ವಕಪ್ ಫೈನಲ್ನಲ್ಲಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದಿದ್ದ ಅಜಿತೇಶ್ ಆ ಬಳಿಕ ಕ್ರಿಕೆಟ್ನಿಂದ ದೂರವಾಗಿದ್ದಾರೆ. ವಡೋದರದಲ್ಲಿ ಪ್ರಸ್ತುತ ಆದಾಯ ತೆರಿಗೆ ಇಲಾಖೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ.
ನೆಪೋಲಿಯನ್ ಐನ್ಸ್ಟೀನ್: ನೆಪೋಲಿಯನ್ 2008ರ ಐಪಿಎಲ್ ಆವೃತ್ತಿಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡಕ್ಕೆ ಆಯ್ಕೆಯಾಗಿದ್ದರು. ಸದ್ಯ ಈ ಬಲಗೈ ಆಟಗಾರನ ಬಗ್ಗೆ ಯಾವುದೇ ಮಾಹಿತಿ ಇಲ್ಲ.
ಶ್ರೀವತ್ಸ್ ಗೋಸ್ವಾಮಿ: ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ U-19 ವಿಶ್ವಕಪ್ನಲ್ಲಿ ಒಟ್ಟಾರೆ 152 ರನ್ ಗಳಿಸಿದ್ದರು. ಆ ಬಳಿಕ ಐಪಿಎಲ್ನಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್, ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಸನ್ರೈಸರ್ಸ್ ಹೈದರಾಬಾದ್ ತಂಡಗಳಲ್ಲಿ ಆಡಿದ್ದರು. ದೇಶೀಯ ಕ್ರಿಕೆಟ್ನಲ್ಲಿ ಅದ್ಭುತ ಪ್ರದರ್ಶನ ನೀಡುತ್ತಿದ್ದಾರೆ.
ಪೆರಿ ಗೋಯಲ್: ಪೆರಿ ಗೋಯಲ್ U-19 ವಿಶ್ವಕಪ್ನಲ್ಲಿ ಒಂದು ಪಂದ್ಯವನ್ನೂ ಆಡಿರಲಿಲ್ಲ. ಆ ಬಳಿಕ ಜಂಟಲ್ಮೆನ್ ಕ್ರೀಡೆಯನ್ನು ತ್ಯಜಿಸಿ ಆರ್ಎಸ್ಜಿ ಪ್ರಾಪರ್ಟೀಸ್ ಹೆಸರಿನ ಕಂಪನಿಯಲ್ಲಿ ನಿರ್ದೇಶಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.
ಇಕ್ಬಾಲ್ ಅಬ್ದುಲ್ಲಾ: U-19 ವಿಶ್ವಕಪ್ನಲ್ಲಿ ತಂಡದ ಪರವಾಗಿ ಅತಿಹೆಚ್ಚು ವಿಕೆಟ್(10) ಪಡೆದು ಮಿಂಚಿದ್ದರು. ಮುಂಬೈ ತಂಡದ ಪರವಾಗಿ ರಣಜಿ ಆಡಿದ್ದ ಇಕ್ಬಾಲ್, 2016ರಲ್ಲಿ ಕೇರಳ ತಂಡವನ್ನು ಪ್ರತಿನಿಧಿಸಿದ್ದರು. ಐಪಿಎಲ್ನಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ಹಾಗೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲಿ ಆಡಿದ್ದಾರೆ.
ಸಿದ್ಧಾರ್ಥ್ ಕೌಲ್: ಭಾರತದ ರಾಷ್ಟ್ರೀಯ ತಂಡದ ಪರವಾಗಿ 3 ಏಕದಿನ ಹಾಗೂ 2 ಟಿ20 ಪಂದ್ಯವನ್ನಾಡಿರುವ ಸಿದ್ಧಾರ್ಥ್ ಕೌಲ್ ಟೀಂ ಇಂಡಿಯಾದಲ್ಲಿ ಕಾಯಂ ಸ್ಥಾನ ಪಡೆಯುವಲ್ಲಿ ವಿಫಲರಾಗಿದ್ದಾರೆ. ಐಪಿಎಲ್ನಲ್ಲಿ ಡೆಲ್ಲಿ ಡೇರ್ಡೆವಿಲ್ಸ್, ಕೋಲ್ಕತ್ತಾ ನೈಟ್ ರೈಡರ್ಸ್, ಕಿಂಗ್ಸ್ ಇಲೆವೆನ್ ಪಂಜಾಬ್ ಹಾಗೂ ಸನ್ರೈಸರ್ಸ್ ಹೈದರಾಬಾದ್ ಪರವಾಗಿ ಆಡಿದ್ದಾರೆ.
ತರುವರ್ ಕೊಹ್ಲಿ: ತರುವರ್ ಕೊಹ್ಲಿ, ಎರಡನೇ ಆವೃತ್ತಿಯ ಐಪಿಎಲ್ನಲ್ಲಿ ರಾಜಸ್ಥಾನ ರಾಯಲ್ಸ್ ಪರವಾಗಿ ಆಡಿದ್ದರು. ನಂತರದಲ್ಲಿ ಕಿಂಗ್ಸ್ ಇಲವೆನ್ ಪಂಜಾಬ್ ತಂಡದಲ್ಲೂ ಕಾಣಿಸಿಕೊಂಡಿದ್ದರು. 2012-13ರ ರಣಜಿ ಸೆಮಿಫೈನಲ್ನಲ್ಲಿ ಪಂಜಾಬ್ ಪರ ತ್ರಿಶತಕ ಬಾರಿಸಿ ಮಿಂಚಿದ್ದರು.2018-19ರ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಮಿಜೋರಾಂ ರಾಜ್ಯ ಪ್ರತಿನಿಧಿಸಿದ್ದ ತರುವರ್ ಕೊಹ್ಲಿ 373 ರನ್ ಹಾಗೂ 8 ವಿಕೆಟ್ ಕಿತ್ತಿದ್ದರು.
ಅಭಿನವ್ ಮುಕುಂದ್: ದೇಶೀಯ ಕ್ರಿಕೆಟ್ನಲ್ಲಿ ಅದ್ಭುತ ಪ್ರದರ್ಶನ ನೀಡುತ್ತಿರುವ ಅಭಿನವ್ ಮುಕುಂದ್ ರಾಷ್ಟ್ರೀಯ ತಂಡದಲ್ಲಿ ಅಷ್ಟಾಗಿ ಮಿಂಚಿಲ್ಲ. 2011ರಲ್ಲಿ ಸತತ ವೈಫಲ್ಯದ ಹಿನ್ನೆಲೆಯಲ್ಲಿ ತಂಡದಿಂದ ಹೊರಬಿದ್ದಿದ್ದ ಮುಕುಂದ್ 2017ರಲ್ಲಿ ತಂಡಕ್ಕೆ ಕಂಬ್ಯಾಕ್ ಮಾಡಿದ್ದರು. ಆ ವೇಳೆ ಶ್ರೀಲಂಕಾ ವಿರುದ್ಧ 81 ರನ್ ಸಿಡಿಸಿದ್ದರು.
ಮನೀಷ್ ಪಾಂಡೆ: U-19 ವಿಶ್ವಕಪ್ನಲ್ಲಿ ಉತ್ತಮ ಪ್ರದರ್ಶನ ನೀಡುವಲ್ಲಿ ವಿಫಲರಾಗಿದ್ದ ಮನೀಷ್ ರಾಷ್ಟ್ರೀಯ ತಂಡದಲ್ಲಿ 23 ಏಕದಿನ, 31 ಟಿ-20 ಪಂದ್ಯವನ್ನಾಡಿದ್ದಾರೆ. ಐಪಿಎಲ್ನಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್, ಮುಂಬೈ ಇಂಡಿಯನ್ಸ್, ಪುಣೆ ವಾರಿಯರ್ಸ್, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹಾಗೂ ಸನ್ರೈಸರ್ಸ್ ಹೈದರಾಬಾದ್ ಪರವಾಗಿ ಆಡಿದ್ದಾರೆ. ಐಪಿಎಲ್ನಲ್ಲಿ ಶತಕ ಸಿಡಿಸಿದ ಮೊದಲ ಭಾರತೀಯ(2014) ಎನ್ನುವ ಹೆಗ್ಗಳಿಕೆ ಮನೀಷ್ ಪಾಂಡೆಯದ್ದು.
ಪ್ರದೀಪ್ ಸಾಂಗ್ವಾನ್: U-19 ವಿಶ್ವಕಪ್ನಲ್ಲಿ ಐದು ವಿಕೆಟ್ ಕಿತ್ತು ಮಿಂಚಿದ್ದ ಸಾಂಗ್ವಾನ್, ರಣಜಿಯಲ್ಲಿ ದೆಹಲಿ ತಂಡದ ಪರವಾಗಿ ಕಣಕ್ಕಿಳಿದಿದ್ದರು. ಐಪಿಎಲ್ನಲ್ಲಿ ಡೆಲ್ಲಿ ಡೇರ್ಡೆವಿಲ್ಸ್, ಗುಜರಾತ್ ಲಯನ್ಸ್, ಕೋಲ್ಕತ್ತಾ ನೈಟ್ ರೈಡರ್ಸ್ ಹಾಗೂ ಮುಂಬೈ ಇಂಡಿಯನ್ಸ್ ತಂಡವನ್ನು ಪ್ರತಿನಿಧಿಸಿದ್ದಾರೆ. 2013ರ ಆವೃತ್ತಿಯ ಐಪಿಎಲ್ ವೇಳೆ ಡ್ರಗ್ಸ್ ಸೇವನೆ ಹಿನ್ನೆಲೆಯಲ್ಲಿ ಸಾಂಗ್ವಾನ್ರನ್ನು 18 ತಿಂಗಳುಗಳ ಕಾಲ ಬ್ಯಾನ್ ಮಾಡಲಾಗಿತ್ತು.
ತನ್ಮಯ್ ಶ್ರೀವಾಸ್ತವ:
U-19 ವಿಶ್ವಕಪ್ನಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ್ದ ತನ್ಮಯ್, 52ರ ಸರಾಸರಿಯಲ್ಲಿ 262 ರನ್ ಕಲೆಹಾಕಿದ್ದರು. ಸದ್ಯ ದೇಶೀಯ ಕ್ರಿಕೆಟ್ನಲ್ಲಿ ಮೈದಾನಕ್ಕಿಳಿಯುತ್ತಿದ್ದಾರೆ.
ಸೌರಭ್ ತಿವಾರಿ: ರಾಷ್ಟ್ರೀಯ ತಂಡದಲ್ಲಿ ತಿವಾರಿ 3 ಏಕದಿನ ಪಂದ್ಯವನ್ನಾಡಿದ್ದಾರೆ. 2010ರ ಐಪಿಎಲ್ನಲ್ಲಿ ಮುಂಬೈ ಇಂಡಿಯನ್ಸ್ ಪ್ರತಿನಿಧಿಸಿದ್ದ ಸೌರಭ್ ತಿವಾರಿ ನಂತರದಲ್ಲಿ ಆರ್ಸಿಬಿ ಸೇರಿದ್ದರು. ಡೆಲ್ಲಿ ಹಾಗೂ ಪುಣೆ ತಂಡದಲ್ಲೂ ತಿವಾರಿ ಆಡಿದ್ದರು. ಸದ್ಯ ದೇಶೀಯ ಕ್ರಿಕೆಟ್ನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
