ಮೆಲ್ಬೋರ್ನ್: ಇಡೀ ವಿಶ್ವವನ್ನೇ ಒಂದು ಕಾಲದಲ್ಲಿ ಆಳುತ್ತಿದ್ದ ಆಸ್ಟ್ರೇಲಿಯಾ ತಂಡದ ಆಟಗಾರರು ಪ್ರಸ್ತುತ ಮಂಕಾಗಿದ್ದು ಸ್ಲೆಡ್ಜಿಂಗ್ ಮಾಡುವುದನ್ನೇ ಬಿಟ್ಟಿದ್ದಾರೆ.
ಒಂದು ಕಾಲದಲ್ಲಿ ಸ್ಲೆಡ್ಜಿಂಗ್ ಅನ್ನು ತಂಡದ ಭಾಗವನ್ನಾಗಿ ಮಾಡಿಕೊಂಡಿದ್ದ ಆಸ್ಟ್ರೇಲಿಯಾ ತಂಡದ ಆಟಗಾರರು ಭಾರತ ತಂಡದ ಆಟಗಾರರು ಹಾಗೂ ನಾಯಕ ವಿರಾಟ್ ಕೊಹ್ಲಿ ಎಂದರೆ ಭಯ ಪಡುತ್ತಿರಿದ್ದಾರೆ. ಇದಕ್ಕೆಲ್ಲಾ ಕಾರಣ ಐಪಿಎಲ್ ಹಾಗೂ ಐಪಿಎಲ್ನಿಂದ ಬರುತ್ತಿರುವ ಕೋಟ್ಯಾಂತರ ರೂಪಾಯಿ ಹಣ ಎಂದು ಆಸ್ಟ್ರೇಲಿಯಾದ ಮಾಜಿ ನಾಯಕ ಮೈಕಲ್ ಕ್ಲಾರ್ಕ್ ಅಭಿಪ್ರಾಯಪಟ್ಟಿದ್ದಾರೆ.
ಕೆಲವು ವರ್ಷಗಳ ಹಿಂದೆ ಎರುಡು ರಾಷ್ಟ್ರಗಳು ಎದುರುಬದುರಾದಾಗ ಪಂದ್ಯಗಳು ರೋಚಕವಾಗಿರುತ್ತಿದ್ದವು. ಅಲ್ಲದೆ ಆಸೀಸ್ ಆಟಗಾರರು ಸ್ಲೆಡ್ಜಿಂಗ್ ಮಾಡಿ ಭಾರತೀಯರನ್ನು ಕೆಣಕುತ್ತಿದ್ದರು. ಆದರೆ ಐಪಿಎಲ್ ಮಿಲಿಯನ್ ಡಾಲರ್ ಒಪ್ಪಂದ ಮಾಡಿಕೊಂಡ ಮೇಲೆ ಆಸೀಸ್ ಆಟಗಾರರು ಮೃದುಭಾವನೆ ತಳೆದಿದ್ದಾರೆ. ವಿರಾಟ್ ಕೊಹ್ಲಿ ಅಥವಾ ಭಾರತೀಯರನ್ನು ಕೆಣಕಿದರೆ ಎಲ್ಲಿ ತಮ್ಮ ಐಪಿಎಲ್ ಭವಿಷ್ಯ ಕಮರುವುದೋ ಎಂಬ ಆತಂಕದಲ್ಲಿ ಆಸೀಸ್ ಆಟಗಾರರು ಚಿಂತನೆ ಮಾಡುತ್ತಿದ್ದಾರೆ ಎಂದು ಕ್ಲಾರ್ಕ್ ಸ್ಪಷ್ಟನೇ ನೀಡಿದ್ದಾರೆ.
ಮೈದಾನದಲ್ಲಿ ಆಕ್ರಮಣಕಾರಿಯಾಗಿ ವರ್ತಿಸುವ ಆಸ್ಟ್ರೇಲಿಯಾದ ಕೆಲವು ಆಟಗಾರರು ಐಪಿಎಲ್ನಲ್ಲಿ ಅತಿ ಹೆಚ್ಚು ಹಣ ಪಡೆದಿರುವ ಟಾಪ್ 10 ಲಿಸ್ಟ್ನಲ್ಲಿದ್ದಾರೆ. ಇದೇ ಕಾರಣದಿಂದ ಆಸೀಸ್ ಆಟಗಾರರು ಕೊಹ್ಲಿಯನ್ನು ಎಂದಿಗೂ ಸ್ಲೆಡ್ಜಿಂಗ್ ಮಾಡುವುದಿಲ್ಲ ಎಂದಿದ್ದಾರೆ.
2019 ಡಿಸೆಂಬರ್ನಲ್ಲಿ ನಡೆದ ಹರಾಜಿನಲ್ಲಿ ವೇಗಿ ಪ್ಯಾಟ್ ಕಮ್ಮಿನ್ಸ್ 15.5 ಕೋಟಿ, ಗ್ಲೆನ್ ಮ್ಯಾಕ್ಸ್ವೆಲ್ 10.75 ಕೋಟಿ, ನಾಥನ್ ಕೌಲ್ಟರ್ಲೈನ್ 8 ಕೋಟಿ, ನಾಯಕ ಆ್ಯರೋನ್ ಫಿಂಚ್ 4.4 ಕೋಟಿ ಮೊತ್ತಕ್ಕೆ ಹರಾಜಾಗಿದ್ದಾರೆ. ಕೇವಲ ನಾಲ್ಕುವಾರ ನಡೆಯುವ ಈ ಟೂರ್ನಿಯಲ್ಲಿ ಹಣ ಪಡೆಯುವ ಉದ್ದೇಶದಿಂದ ಆಸ್ಟ್ರೇಲಿಯಾ ಆಟಗಾರರು ಕೊಹ್ಲಿ ಹಾಗೂ ಭಾರತೀಯರನ್ನು ಕೆಣಕುವ ಗೋಜಿಗೆ ಹೋಗುತ್ತಿಲ್ಲ ಎಂಬುದು ಕ್ಲಾರ್ಕ್ ಅಭಿಪ್ರಾಯವಾಗಿದೆ.
