ಅಬುಧಾಬಿ: ಇತ್ತೀಚೆಗೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಬದುಕಿಗೆ ನಿವೃತ್ತಿ ಘೋಷಿಸಿರುವ ಭಾರತ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ 14 ತಿಂಗಳ ನಂತರ ಚುಟುಕು ಕ್ರಿಕೆಟ್ಗೆ ಮರಳುತ್ತಿದ್ದು, ಕೂಲ್ ಕ್ಯಾಪ್ಟನ್ರನ್ನು ಮೈದಾನದಲ್ಲಿ ನೋಡಲು ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ.
ಶನಿವಾರ ಧೋನಿ ನೇತೃತ್ವದ ಸಿಎಸ್ಕೆ, ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ವಿರುದ್ಧ 13ನೇ ಆವೃತ್ತಿಯ ಐಪಿಎಲ್ನಲ್ಲಿ ಸೆಣಸಾಡುತ್ತಿದೆ. ಕ್ರಿಕೆಟ್ ಪ್ರಿಯರಿಗೆ ಐಪಿಎಲ್ ಹಬ್ಬದಂತಿದ್ದರೆ, 2019ರ ವಿಶ್ವಕಪ್ ನಂತರ ಮೈದಾನದಲ್ಲಿ ಘರ್ಜಿಸಲಿರುವ ಧೋನಿಯನ್ನು ಇಂದು ಸಾವಿರಾರು ಅಭಿಮಾನಿಗಳು ಕಣ್ತುಂಬಿಕೊಳ್ಳಲಿದ್ದಾರೆ.
ಧೋನಿ ಕಮ್ಬ್ಯಾಕ್ ಕುರಿತು ಪ್ರತಿಕ್ರಿಯಿಸಿರುವ ಸಿಎಸ್ಕೆ ಕೋಚ್ ಸ್ಟೆಪನ್ ಫ್ಲಮಿಂಗ್, " ಇದರಲ್ಲಿ ಯಾವುದೇ ರೀತಿಯ ವ್ಯತ್ಯಾಸವಿರುವುದಿಲ್ಲ. ಅವರು(ಧೋನಿ) ಫಿಟ್ ಆಗಿದ್ದು, ಮಾನಸಿಕವಾಗಿ ತುಂಬಾ ಸದೃಢರಾಗಿದ್ದಾರೆ" ಎಂದು ತಿಳಿಸಿದ್ದಾರೆ.
ಎಂಎಸ್ ಧೋನಿಯಂತಹ ಅನುಭವಿ ಮತ್ತು ಒಂದು ಕಾಲಕ್ಕೆ ಸೀಮಿತವಾಗಿರುವ ಕ್ರಿಕೆಟಿಗನಿಗೆ ದೀರ್ಘ ವಿರಾಮ ಸೂಕ್ತವಾಗಬಹುದು ಎಂದು ಫ್ಲೆಮಿಂಗ್ ಅಭಿಪ್ರಾಯಪಟ್ಟಿದ್ದಾರೆ. ತಾವೂ ಐಪಿಎಲ್ 2020ರಲ್ಲಿ ಧೋನಿಯ ಆಟವನ್ನು ನೋಡುವ ನಿರೀಕ್ಷೆಯಲ್ಲಿದ್ದೇನೆ ಎಂದು ಹೇಳಿದ್ದಾರೆ.
ಧೋನಿ ಹೊರೆತುಪಡಿಸಿದರೆ ತಂಡದಲ್ಲಿ ಬ್ರಾವೋ, ಆಸೀಸ್ ಲೆಜೆಂಡ್ ಶೇನ್ ವಾಟ್ಸನ್ ಹಾಗೂ ಹರಿಣಗಳ ಮಾಜಿ ಸ್ಪಿನ್ನರ್ ಇಮ್ರಾನ್ ತಾಹೀರ್ ಅಂತಹ ಮ್ಯಾಚ್ ಟರ್ನರ್ಗಳು ತಂಡದಲ್ಲಿದ್ದಾರೆ. ಅವರು ಒತ್ತಡವನ್ನು ನಿಭಾಯಿಸಿಕೊಳ್ಳುವ ಸಾಮರ್ಥ್ಯವನ್ನು ಹೊಂದಿದ್ದಾರೆ ಎಂದು ಫ್ಲಮಿಂಗ್ ಹೇಳಿದ್ದಾರೆ.
ದೀರ್ಘ ಸಮಯದ ಬಳಿಕ ಧೋನಿ ಸ್ಪರ್ಧಾತ್ಮಕ ಕ್ರಿಕೆಟ್ಗೆ ಮರಳುತ್ತಿರುವುದರಿಂದ ಇಂದಿನ ಪಂದ್ಯದಲ್ಲಿ ಅವರ ಮೇಲೆ ಎಲ್ಲರ ದೃಷ್ಟಿ ನೆಟ್ಟಿದೆ. ಸಾವಿರಾರು ಅಭಿಮಾನಿಗಳು ಈಗಾಗಲೆ ಧೋನಿ ಇಂದಿನ ಪಂದ್ಯದಲ್ಲಿ ಆರ್ಭಟಿಸಲಿ ಎಂದು ಆಶಿಸುತ್ತಿದ್ದಾರೆ.
