ಮುಂಬೈ: 2020ರ ಐಪಿಎಲ್ಗಾಗಿ ಡಿಸೆಂಬರ್ 19ರಂದು ಹರಾಜು ಪ್ರಕ್ರಿಯೆ ನಡೆಯಲಿದ್ದು, ಈಗಾಗಲೇ ಭಾರತೀಯರು ಸೇರಿದಂತೆ ವಿವಿಧ ದೇಶಗಳ ಸುಮಾರು 332 ಆಟಗಾರರು ತಮ್ಮ ಹೆಸರು ನೋಂದಾಯಿಸಿಕೊಂಡಿದ್ದಾರೆ.
ಟಿ-20 ಕ್ರಿಕೆಟ್ನ ಶ್ರೀಮಂತ ಲೀಗ್ಗಳಲ್ಲಿ ಮೊದಲ ಸ್ಥಾನದಲ್ಲಿರುವ ಐಪಿಎಲ್ ಆಡುವುದಕ್ಕೆ ವಿದೇಶಿ ಕ್ರಿಕೆಟಿಗರು ಹಾತೊರೆಯುತ್ತಿದ್ದಾರೆ. ಎಲ್ಲಾ ಮಾದರಿಯ ಕ್ರಿಕೆಟ್ನಲ್ಲಿ ಬಹುಬೇಗ ಬೆಳೆಯುತ್ತಿರುವ ಅಫ್ಘಾನಿಸ್ತಾನ ತಂಡದ ಕೆಲವು ಆಟಗಾರರು ಐಪಿಎಲ್ನಲ್ಲಿ ಈಗಾಗಲೇ ಕಾಣಿಸಿಕೊಂಡು ಯಶಸ್ವಿಯೂ ಅಗಿದ್ದಾರೆ. ಇದೀಗ ಅಂಡರ್ 19 ತಂಡದಲ್ಲಿ ಆಡುತ್ತಿರುವ 14 ವರ್ಷದ ಪ್ರತಿಭೆ ನೂರ್ ಅಹ್ಮದ್ ಹರಾಜು ಪ್ರಕ್ರಿಯೆಯಲ್ಲಿ ಇದ್ದು, ಆಶ್ಚರ್ಯ ಮೂಡಿಸಿದ್ದಾರೆ.
ಈಗಾಗಲೇ ಐಪಿಎಲ್ನಲ್ಲಿ ಆಪ್ಘಾನಿಸ್ತಾನ ಸ್ಪಿನ್ ದಿಗ್ಗಜರಾದ ರಶೀದ್ ಖಾನ್, ಮುಜೀಬ್ ಉರ್ ರೆಹಮಾನ್, ಮೊಹಮ್ಮದ್ ನಬಿ ಐಪಿಎಲ್ನಲ್ಲಿ ಕಾಯಂ ಸದಸ್ಯರಾಗಿದ್ದಾರೆ. ಇವರ ಸಾಲಿಗೆ 14 ವರ್ಷದ ಚೈನಾಮೆನ್ ಸ್ಪಿನ್ನರ್ ನೂರ್ ಅಹ್ಮದ್ ಕೂಡ ಸೇರ್ಪಡೆಗೊಳ್ಳಲು ತುದಿಗಾಲಿನಲ್ಲಿ ನಿಂತಿದ್ದಾರೆ.
ನೂರ್ ಅಹ್ಮದ್ ಇತ್ತೀಚೆಗೆ ಭಾರತ ಅಂಡರ್ 19 ತಂಡದ ವಿರುದ್ಧ ನಡೆದ ಏಕದಿನ ಸರಣಿಯಲ್ಲಿ 9 ವಿಕೆಟ್ ಪಡೆದು ಮಿಂಚಿದ್ದರು. ಈ ಸರಣಿಯನ್ನು ಭಾರತ ತಂಡ 3-2ರಲ್ಲಿ ಗೆದ್ದುಕೊಂಡಿತ್ತು.
