ಲಂಡನ್: ಐಸಿಸಿ ಏಕದಿನ ವಿಶ್ವಕಪ್ನಲ್ಲಿ ಭಾರತ ಈಗಾಗಲೇ ಲೀಗ್ ಹಂತದಲ್ಲಿ ಪಾಕ್ ವಿರುದ್ಧ ಭರ್ಜರಿ ಗೆಲುವು ದಾಖಲು ಮಾಡಿದೆ. ಇದೀಗ ಎಲ್ಲವೂ ಪಾಕಿಸ್ತಾನ ಅಂದುಕೊಂಡಿರುವ ಹಾಗೇ ನಡೆದರೆ ಸೆಮಿಫೈನಲ್ನಲ್ಲಿ ಭಾರತ-ಪಾಕ್ ಮತ್ತೊಮ್ಮೆ ಮುಖಾಮುಖಿಯಾಗುವ ಸಾಧ್ಯತೆ ಗೋಚರಿಸುತ್ತಿದೆ.
ವಿಶ್ವಕಪ್ ಸೆಮಿಫೈನಲ್ ಪಂದ್ಯಗಳು ಅಂಕಪಟ್ಟಿಯಲ್ಲಿ ನಂಬರ್ 1 ಹಾಗೂ ನಂಬರ್ 4 ಸ್ಥಾನ, 2ನೇ ಮತ್ತು 3ನೇ ಸ್ಥಾನದಲ್ಲಿರುವ ತಂಡಗಳ ಮಧ್ಯೆ ನಡೆಯಲಿದ್ದು, ಮುಂದಿನ ಎಲ್ಲಾ ಪಂದ್ಯಗಳಲ್ಲಿ ಭಾರತ ಹಾಗೂ ಪಾಕ್ ಗೆಲುವು ದಾಖಲು ಮಾಡಿದರೆ ಮಾತ್ರ ಪ್ರೇಕ್ಷಕರಿಗೆ ಮತ್ತೊಂದು ಹೈ ವೋಲ್ಟೇಜ್ ಪಂದ್ಯ ನೋಡಲು ಸಿಗಲಿದೆ.
ಏನೆಲ್ಲ ನಡೆಯಬೇಕು!?
ಈಗಾಗಲೇ ಭಾರತ ತಾನಾಡಿರುವ 5 ಪಂದ್ಯಗಳಿಂದ 9 ಅಂಕ ಗಳಿಸಿ 3ನೇ ಸ್ಥಾನದಲ್ಲಿದೆ. ಪಾಕ್ ಆಡಿರುವ 6 ಪಂದ್ಯಗಳಲ್ಲಿ ಕೇವಲ 2ರಲ್ಲಿ ಗೆದ್ದು 5 ಅಂಕಗಳೊಂದಿಗೆ 7ನೇ ಸ್ಥಾನದಲ್ಲಿದೆ. ಇದೀಗ ಪಾಕ್ ಸೆಮೀಸ್ಗೆ ಲಗ್ಗೆ ಹಾಕಬೇಕಾದರೆ ಮುಂದಿನ ನ್ಯೂಜಿಲ್ಯಾಂಡ್, ಅಫ್ಘಾನಿಸ್ತಾನ ಹಾಗೂ ಬಾಂಗ್ಲಾ ವಿರುದ್ಧದ ಪಂದ್ಯಗಳಲ್ಲೂ ಗೆಲ್ಲಬೇಕಾದ ಅನಿವಾರ್ಯತೆ ಇದೆ. ಜತೆಗೆ ಶ್ರೀಲಂಕಾ, ಬಾಂಗ್ಲಾ, ಇಂಗ್ಲೆಂಡ್ ಹಾಗೂ ವೆಸ್ಟ್ ಇಂಡೀಸ್ ಎರಡೆರಡು ಪಂದ್ಯಗಳಲ್ಲಿ ಸೋಲು ಕಾಣಬೇಕಾಗಿದೆ.
ಪಾಕ್ ಮುಂದಿನ ಎಲ್ಲ ಪಂದ್ಯಗಳಲ್ಲಿ ಗೆದ್ದರೆ 11 ಅಂಕ ಗಳಿಸಲಿದ್ದು, ಇಂಗ್ಲೆಂಡ್, ಶ್ರೀಲಂಕಾ ಹಾಗೂ ಬಾಂಗ್ಲಾ 2 ಪಂದ್ಯಗಳಲ್ಲಿ ಸೋತರೆ ಪಾಕ್ಗಿಂತಲೂ ಕಡಿಮೆ ಅಂಕ ಗಳಿಸಲಿವೆ. ಹೀಗಾಗಿ ಪಾಕ್ 4ನೇ ತಂಡವಾಗಿ ಸೆಮೀಸ್ಗೆ ಲಗ್ಗೆ ಹಾಕಲಿದೆ. ಆಗ ಜುಲೈ 9ರಂದು ನಡೆಯುವ ಸೆಮೀಸ್ನಲ್ಲಿ ಇಂಡೋ-ಪಾಕ್ ಫೈಟ್ ನಡೆಯುವುದು ಪಕ್ಕಾ ಆಗಲಿದೆ. ಆದರೆ ಇದು ಎಷ್ಟರ ಮಟ್ಟಿಗೆ ಸಾಧ್ಯ ಎಂಬ ಮಾತು ಸಹ ಕೇಳಿಬರುತ್ತಿದೆ.
ಇನ್ನು ಭಾರತ ಮುಂದಿನ ಎಲ್ಲ ಪಂದ್ಯ ಗೆದ್ದರೆ 9+8 ಅಂಕ ಸೇರಿ ಒಟ್ಟು 17 ಅಂಕ ಗಳಿಕೆ ಮಾಡಲಿದ್ದು, ಆಸ್ಟ್ರೇಲಿಯಾ ಹಾಗೂ ನ್ಯೂಜಿಲ್ಯಾಂಡ್ 1 ಪಂದ್ಯಗಳಲ್ಲಿ ಸೋಲು ಕಾಣಬೇಕು. ಆಗ ಎರಡು ತಂಡಗಳ ಅಂಕ 15 ಆಗಲಿದೆ.
