ನವದೆಹಲಿ: 2020ರ ಐಪಿಎಲ್ಗಾಗಿ ಕಳೆದ ಡಿಸೆಂಬರ್ನಲ್ಲಿ ನಡೆದ ಹರಾಜು ಪ್ರಕ್ರಿಯೆಯಲ್ಲಿ ಬರೋಬ್ಬರಿ 8.5 ಕೋಟಿ ರೂ.ಗೆ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡಕ್ಕೆ ಸೇರ್ಪಡೆಯಾಗಿರುವ ವೆಸ್ಟ್ ಇಂಡೀಸ್ನ ಶೆಲ್ಡಾನ್ ಕಾಟ್ರೆಲ್ ಕನ್ನಡಿಗ ಕೆ ಎಲ್ ನಾಯಕತ್ವದಲ್ಲಿ ಕಣಕ್ಕಿಳಿಯಲು ತಾವು ಎದುರು ನೋಡುತ್ತಿರುವುದಾಗಿ ತಿಳಿಸಿದ್ದಾರೆ.
ಅವರೊಬ್ಬ ಅದ್ಭುತ ಕ್ರಿಕೆಟಿಗ, ಅವರ ಕ್ರಿಕೆಟ್ ಜ್ಞಾನವನ್ನು ಪಡೆಯಲು ನಾನು ಎದುರು ನೋಡುತ್ತಿದ್ದೇನೆ ಎಂದು ರಾಹುಲ್ ನಾಯಕತ್ವದಲ್ಲಿ ತಮ್ಮ ಐಪಿಎಲ್ ಪಾದಾರ್ಪಣೆಗೆ ಕಾಯುತ್ತಿರುವುದಾಗಿ ವಿಂಡೀಸ್ನ ಸೀಮಿತ ಓವರ್ಗಳ ಅಗ್ರ ಬೌಲರ್ ತಿಳಿಸಿದ್ದಾರೆ.
13ನೇ ಆವೃತ್ತಿಯ ಐಪಿಎಲ್ ಸೆಪ್ಟಂಬರ್ 19ರಿಂದ ನವೆಂಬರ್ 10ರವರೆಗೆ ಯುನೈಟೆಡ್ ಅರಬ್ ಎಮಿರೇಟ್ಸ್ನಲ್ಲಿ ನಡೆಯಲಿದೆ. ಅಬುಧಾಬಿ, ದುಬೈ ಹಾಗೂ ಶಾರ್ಜಾದಲ್ಲಿ ಈ ಬಾರಿಯ ಟೂರ್ನಿ ನಡೆಯಲಿದೆ. ಇದೇ ಮೊದಲ ಬಾರಿ ಐಪಿಎಲ್ನಲ್ಲಿ ಕಾಣಿಸಿಕೊಳ್ಳಲಿರುವ ಕಾಟ್ರೆಲ್ ತಮ್ಮ ತಂಡದ ಕ್ರಿಸ್ ಗೇಲ್, ನಿಕೋಲಸ್ ಪೂರನ್ ಜೊತೆಯಾಗಿ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡವನ್ನು ಪ್ರತಿನಿಧಿಸಲಿದ್ದಾರೆ.
ಎಎನ್ಐ ಜೊತೆ ಮಾತನಾಡಿರುವ ಕಾಟ್ರೆಲ್ ಕೆಎಲ್ ರಾಹುಲ್ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ನಾನು ಐಪಿಎಲ್ನಲ್ಲಿ ಆಡುವುದಕ್ಕಾಗಿ ಉತ್ಸುಕನಾಗಿದ್ದೇನೆ. ಕಿಂಗ್ಸ್ ಇಲೆವೆನ್ ಆರ್ಮಿ ಸೇರಿಕೊಳ್ಳಲು ನನ್ನಿಂದ ಕಾಯಲಾಗುತ್ತಿಲ್ಲ. ಜೊತೆಗೆ ಕೆ ಎಲ್ ರಾಹುಲ್ ನಾಯಕತ್ವದಲ್ಲಿ ಆಡಲು ಎದುರು ನೋಡುತ್ತಿದ್ದೆನೆ. ಆತ ಅದ್ಭುತ ವ್ಯಕ್ತಿ. ಇನ್ನು ಕ್ರಿಸ್ ಗೇಲ್ ಮತ್ತು ಪೂರನ್ ಜೊತೆ ಆಡುವುದಕ್ಕೆ ಬಹಳ ಸಂತೋಷವಿದೆ. ನಾನು ತಂಡಕ್ಕಾಗಿ ಶೇ120 ರಷ್ಟು ಸಾಮರ್ಥ್ಯವನ್ನು ನೀಡಲು ತಯಾರಿದ್ದೇನೆ ಎಂದಿದ್ದಾರೆ.
ಶೆಲ್ಡಾನ್ ಕಾಟ್ರೆಲ್ ವೆಸ್ಟ್ ಇಂಡೀಸ್ ಪರ 2 ಟೆಸ್ಟ್, 35 ಏಕದಿನ ಪಂದ್ಯ ಹಾಗೂ 27 ಟಿ20 ಪಂದ್ಯಗಳನ್ನಾಡಿದ್ದಾರೆ. ಅವರು ಕ್ರಮವಾಗಿ 2, 49 ಹಾಗೂ 36 ವಿಕೆಟ್ ಪಡೆದಿದ್ದಾರೆ. ಆಗಸ್ಟ್ 18ರಿಂದ ನಡೆಯುವ ಸಿಪಿಎಲ್ನಲ್ಲಿ ಸೇಂಟ್ ಕಿಟ್ಸ್ ಮತ್ತು ನೇವಿಸ್ ಪ್ಯಾಟ್ರಿಯೋಟ್ಸ್ ತಂಡದ ಪರ ಕಣಕ್ಕಿಳಿಯುತ್ತಿದ್ದಾರೆ.
