ಮುಂಬೈ: ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಹಾಗೂ ಟೆಸ್ಟ್ ಕ್ರಿಕೆಟ್ನಲ್ಲಿ ಮೊದಲ ಬಾರಿಗೆ 10 ಸಾವಿರ ಗಡಿದಾಟಿದ ದಾಖಲೆ ಹೊಂದಿರುವ ಸುನಿಲ್ ಗವಾಸ್ಕರ್ ಕ್ರಿಕೆಟ್ ಜಗತ್ತಿನಲ್ಲಿ ಸಚಿನ್ ತೆಂಡೂಲ್ಕರ್ ಅವರಂತೆ ಪರಿಪೂರ್ಣವಾದ ಬ್ಯಾಟ್ಸ್ಮನ್ರನ್ನು ನಾನು ಕಂಡಿಲ್ಲ ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಭಾರತ ತಂಡದ ಮಾಜಿ ನಾಯಕನ ಪ್ರಕಾರ ಕ್ರಿಕೆಟ್ ಜಗತ್ತಿನ್ಲಲಿ ಸಚಿನ್ಗೆ ಸರಿಸಮನಾಗಿ ಪರಿಪೂರ್ಣತೆಯಿಂದ ಕೂಡಿದ ಮತ್ತೊಬ್ಬ ಬ್ಯಾಟ್ಸ್ಮನ್ರನ್ನು ತಾವೂ ನೋಡಿಲ್ಲ ಎಂದಿದ್ದಾರೆ. ಸಚಿನ್ ತೆಂಡೂಲ್ಕರ್ 2013ರಲ್ಲಿ 24 ವರ್ಷಗಳ ಕ್ರಿಕೆಟ್ ಬದುಕಿಗೆ ನಿವೃತ್ತಿ ಘೋಷಿಸಿದ್ದರು. ದೇಶದ ಒಳಗೆ ಮತ್ತು ಹೊರಗೆ ಕೋಟ್ಯಾಂತರ ಅಭಿಮಾನಿಗಳನ್ನು ಹೊಂದಿರುವ ಅವರು ಒಟ್ಟಾರೆ ವೃತ್ತಿ ಜೀವನದಲ್ಲಿ 34,437 ರನ್ಗಳಿಸಿದ್ದಾರೆ. ಇದರಲ್ಲಿ 100 ಶತಕಗಳು ಸೇರಿವೆ.
ಖಾಸಗಿ ಮಾಧ್ಯಮಕ್ಕೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿರುವ ಸುನಿಲ್ ಗವಾಸ್ಕರ್ ಸಚಿನ್ ತೆಂಡೂಲ್ಕರ್ ಅವರ ಬಗ್ಗೆ ಹಾಗೂ ಅವರ ಬ್ಯಾಟಿಂಗ್ ಕೌಶಲ್ಯಗಳ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ತಲೆ ತಲೆಮಾರುಗಳ ಜನರಿಗೆ ಸ್ಪೂರ್ತಿ ನೀಡಿದ ಕ್ರಿಕೆಟಿಗರ ಹೆಸರಿಸುವಾಗ ಸಚಿನ್, ಕಪಿಲ್ ದೇವ್ ನಂತರದ ಸ್ಥಾನದಲ್ಲಿ ಬರುತ್ತಾರೆ ಎಂದಿದ್ದಾರೆ.
ನಾನು ಬೆಳೆಯುವಾಗ, ಕ್ರಿಕೆಟ್ ಆಡುವಾಗ ಹಾಗೂ ಕ್ರಿಕೆಟ್ ನೋಡಲು ಶುರು ಮಾಡಿದ್ದಾಗಿನಿಂದಲೂ ಅನೇಕ ಬ್ಯಾಟ್ಸ್ಮನ್ಗಳನ್ನು ಕಂಡಿದ್ದೇನೆ, ಆದರೆ ಸಚಿನ್ರಂತೆ ಬ್ಯಾಟಿಂಗ್ ಪರಿಪೂರ್ಣತೆಗೆ ಸನಿಹದ ಮತ್ತೊಬ್ಬ ಬ್ಯಾಟ್ಸ್ಮನ್ಅನ್ನು ನಾನು ಕಂಡಿಲ್ಲ. ಬ್ಯಾಕ್ಲಿಫ್, ದಿ ಹೆಡ್, ಬ್ಯಾಲೆನ್ಸ್, ಲೆಗ್ ಸೈಡ್ ಹಾಗೂ ಸ್ಕೂಪ್ ಶಾಟ್ ಹೊಡೆಯುವುದರಲ್ಲಿ ಅವರು ಒಂದು ಅದ್ಭುತ. ಯುವ ಕ್ರಿಕೆಟಿಗರು ಅನುಸರಿಸುವ ಅಗ್ರ ಮೂರು ಕ್ರಿಕೆಟಿಗರಲ್ಲಿ ಅವರು ಖಂಡಿತವಾಗಿಯೂ ಇರುತ್ತಾರೆ ಎಂದು ಗವಾಸ್ಕರ್ ಹೇಳಿದ್ದಾರೆ.
ಕ್ರಿಕೆಟ್ ಜಗತ್ತಿನಲ್ಲಿ 10 ಸಾವಿರ ರನ್ಗಳಿಸಿದ ಮೊದಲ ಬ್ಯಾಟ್ಸ್ಮನ್ ಎನಿಸಿಕೊಂಡಿದ್ದ ಗವಾಸ್ಕರ್ ಅತಿಹೆಚ್ಚು ಶತಕ ಸಿಡಿಸಿದ್ದ ವಿಶ್ವದಾಖಲೆಯನ್ನು ತಮ್ಮ ಹೆಸರಿನಲ್ಲಿಯೇ ಬರೆದುಕೊಂಡಿದ್ದರು. ದಶಕಕ್ಕೂ ಹೆಚ್ಚು ವರ್ಷಗಳ ಕಾಲ ಇದ್ದ ಈ ದಾಖಲೆಯನ್ನು ಸಚಿನ್ ತೆಂಡೂಲ್ಕರ್ ಬ್ರೇಕ್ ಮಾಡಿದ್ದರು.
ಇದೇ ಸಂದರ್ಶನದಲ್ಲಿ ಪ್ರಸ್ತುತ ಇರುವ ಕೊಹ್ಲಿ ನೇತೃತ್ವದ ತಂಡ ಭಾರತದ ಕ್ರಿಕೆಟ್ ಇತಿಹಾಸದಲ್ಲೇ ಕಂಡಂತಹ ಅತ್ಯುತ್ತಮ ಟೆಸ್ಟ್ ತಂಡ ಎಂದು ಉಲ್ಲೇಖಿಸಿದ್ದಾರೆ. ಇಂತಹ ಬೌಲಿಂಗ್ ಪಡೆಯನ್ನು ಹಿಂದೆಂದೂ ಭಾರತ ತಂಡ ಹೊಂದಿರಲಿಲ್ಲ. ಇದು ಆಸ್ಟ್ರೇಲಿಯಾ ತಂಡಕ್ಕೆ ಸರಿಸಮನಾದ ಬೌಲಿಂಗ್ ಪಡೆ ಎಂದಿದ್ದಾರೆ.
