ಪಕ್ಕದ ಮನೆ ವ್ಯಕ್ತಿ, ಮಗನ ಮೇಲೆ ಹಲ್ಲೆ: ಮಾಜಿ ಕ್ರಿಕೆಟಿಗ ಪ್ರವೀಣ್​ ಕುಮಾರ್​ ಮೇಲೆ ಗಂಭೀರ ಆರೋಪ

ಟೀಂ ಇಂಡಿಯಾದ ಮಾಜಿ ಕ್ರಿಕೆಟಿಗ ಪ್ರವೀಣ್​ ಕುಮಾರ್​ ಪಕ್ಕದ ಮನೆ ವ್ಯಕ್ತಿ ಹಾಗೂ ಆತನ ಮಗನ ಮೇಲೆ ಹಲ್ಲೆ ನಡೆಸಿರುವ ಆರೋಪ ಎದುರಿಸುತ್ತಿದ್ದಾರೆ.

ಮೀರತ್(ಉತ್ತರ ಪ್ರದೇಶ): ಭಾರತದ ಮಾಜಿ ಕ್ರಿಕೆಟಿಗ ಪ್ರವೀಣ್​ ಕುಮಾರ್ ವಿರುದ್ದ ಪಕ್ಕದ ಮನೆಯ ವ್ಯಕ್ತಿ ಹಾಗು ಅವರ 7 ವರ್ಷದ ಮಗನ ಮೇಲೆ ಹಲ್ಲೆ ನಡೆಸಿರುವ ಗಂಭೀರ ಆರೋಪ ಕೇಳಿಬಂದಿದೆ.

ದೀಪಕ್​ ಶರ್ಮಾ ಎಂಬುವರು ಕ್ರಿಕೆಟಿಗ ಪ್ರವೀಣ್​ ಕುಮಾರ್ ಮೇಲೆ ಹಲ್ಲೆ ಆರೋಪ ಮಾಡಿದ್ದು, ಮಧ್ಯಾಹ್ನ 3 ಗಂಟೆಯ ವೇಳೆ ತನ್ನ ಮಗನೊಂದಿಗೆ ಬಸ್​ ನಿಲ್ದಾಣದಲ್ಲಿ ನಿಂತಿದ್ದಾಗ ಘಟನೆ ನಡೆದಿದೆ ಎಂದು ತಿಳಿಸಿದ್ದಾರೆ. ಮದ್ಯದ ಅಮಲಿನಲ್ಲಿದ್ದ ಪ್ರವೀಣ್ ಕುಮಾರ್, ನನಗೆ ಹಾಗೂ ನನ್ನ 7 ವರ್ಷದ ಮಗುವಿನ ಹಲ್ಲೆ ಮಾಡಿದ್ದಾರೆಂದು ಅವರು ಆರೋಪಿಸಿದ್ದಾರೆ.

ಪ್ರವೀಣ್​ ಕುಮಾರ್​ ಹಲ್ಲೆ ನಡೆಸಿ ನನ್ನ ಕೈ ಮುರಿದಿದ್ದಾರೆ. ನನ್ನ ಮಗನನ್ನೂ ತಳ್ಳಿದ್ದರಿಂದ ಆತನ ಬೆನ್ನಿಗೂ ಗಾಯವಾಗಿದೆ. ಈ ಘಟನೆ ನಡೆದ ನಂತರ ನನಗೆ ಜೀವ ಬೆದರಿಕೆ ಕರೆಗಳು ಬರ್ತಿವೆ ಎಂದು ಅವರು ದೂರಿದ್ದಾರೆ.