ಪೋರ್ಟ್ ಎಲಿಜಬೆತ್: ದಕ್ಷಿಣ ಆಫ್ರಿಕಾ ವಿರುದ್ಧ ಮೂರನೇ ಟೆಸ್ಟ್ನಲ್ಲಿ ಇಂಗ್ಲೆಂಡ್ ತಂಡದ ನಾಯಕನ ಜೋ ರೂಟ್ ಒಂದೇ ಓವರ್ನಲ್ಲಿ 28 ರನ್ ಬಿಟ್ಟುಕೊಡುವ ಮೂಲಕ ಬೇಡದ ದಾಖಲೆಗೆ ಪಾತ್ರರಾಗಿದ್ದಾರೆ.
ಪೋರ್ಟ್ ಎಲಿಜೆಬೆತ್ನಲ್ಲಿ ಸೋಮವಾರ ಮುಕ್ತಾಯಗೊಂಡ ಟೆಸ್ಟ್ ಸರಣಿಯ ಮೂರನೇ ಪಂದ್ಯದಲ್ಲಿ ಕೊನೆಯ ಇನ್ನಿಂಗ್ಸ್ನ 82ನೇ ಓವರ್ ಎಸೆದ ರೂಟ್ ಎದುರಾಳಿ ಬ್ಯಾಟ್ಸ್ಮನ್ ಕೇಶವ್ ಮಹಾರಾಜ್ರಿಂದ ಮೊದಲ 5 ಎಸೆತಗಳಲ್ಲಿ 3 ಬೌಂಡರಿ ಹಾಗೂ 2 ಸಿಕ್ಸರ್ ಬಾರಿಸಿಕೊಂಡರು. ಕೊನೆಯ ಎಸೆತದಲ್ಲಿ ಲೆಗ್ಬೈ ಮೂಲಕ 4 ರನ್ ಕೊಡುವ ಮೂಲಕ ಟೆಸ್ಟ್ ಕ್ರಿಕೆಟ್ನ ಒಂದೇ ಓವರ್ನಲ್ಲಿ 28 ರನ್ ಬಿಟ್ಟುಕೊಟ್ಟ ಬೌಲರ್ ಎಂಬ ಕಳೆಪೆ ದಾಖಲೆಗೆ ಪಾತ್ರರಾದರು.
ರೂಟ್ಗಿಂತ ಮೊದಲು ದಕ್ಷಿಣ ಆಫ್ರಿಕಾದ ರಾಬಿನ್ ಪೀಟರ್ಸನ್ ಹಾಗೂ ಇಂಗ್ಲೆಂಡ್ನ ಜೇಮ್ಸ್ ಆ್ಯಂಡರ್ಸನ್ ಕೂಡ 28 ರನ್ ಬಿಟ್ಟುಕೊಟ್ಟಿದ್ದರು. ಪೀಟರ್ಸನ್ಗೆ ಬ್ರಿಯಾನ್ ಲಾರಾ, ಆ್ಯಂಡರ್ಸನ್ಗೆ ಬೈಲಿ 28 ರನ್ ಬಾರಿಸಿ ದಾಖಲೆ ಬರೆದಿದ್ದರು.
ದಕ್ಷಿಣ ಆಫ್ರಿಕಾ ತಂಡ ಈ ಪಂದ್ಯದಲ್ಲಿ ಇನ್ನಿಂಗ್ಸ್ ಹಾಗೂ 53 ರನ್ಗಳಿಂದ ಸೋಲು ಕಂಡಿದೆ. ಆದರೆ ಬ್ಯಾಟ್ಸ್ಮನ್ಗಳೇ ಇಂಗ್ಲೆಂಡ್ ಬೌಲರ್ಗಳ ಮುಂದೆ ನಿಲ್ಲಲಾಗದೆ ಒಂದಂಕಿ ಮೊತ್ತಕ್ಕೆ ವಿಕೆಟ್ ಒಪ್ಪಿಸಿದರೂ ಬೌಲರ್ ಆಗಿರುವ ಕೇಶವ ಮಹಾರಾಜ್ ಮಾತ್ರ ಭರ್ಜರಿ ಬ್ಯಾಟಿಂಗ್ ನಡೆಸಿ ಸೋಲುವ ಪಂದ್ಯದಲ್ಲೂ ಮಿಂಚಿದರು.
ಬೌಲಿಂಗ್ನಲ್ಲೂ 5 ವಿಕೆಟ್ ಪಡೆದು ಮಿಂಚಿದ್ದ ಮಹಾರಾಜ್ ಎರಡನೇ ಇನ್ನಿಂಗ್ಸ್ ಬ್ಯಾಟಿಂಗ್ ವೇಳೆ 106 ಎಸೆತಗಳಲ್ಲಿ 10 ಬೌಂಡರಿ, 3 ಸಿಕ್ಸರ್ ಸೇರಿದಂತೆ 71 ರನ್ ಸಿಡಿಸಿದರು. ಈ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾಪರ ಕೇಶವ್ ಮಹಾರಾಜ್ರದ್ದೇ ಗರಿಷ್ಠ ವೈಯಕ್ತಿಕ ರನ್ ಆಯಿತು.
