ಲೀಡ್ಸ್: ಟೀಮ್ ಇಂಡಿಯಾದ ಮಾಜಿ ನಾಯಕ ಧೋನಿ ಇನ್ನು ಒಂದೆರಡು ವರ್ಷ ಕ್ರಿಕೆಟ್ ಆಡಿಬೇಕು. ಅವರ ಅನುಭವ ಭವಿಷ್ಯದ ಯುವ ಆಟಗಾರರಿಗೆ ತುಂಬ ಅನುಕೂಲವಾಗಲಿದ ಎಂದು ಯಾರ್ಕರ್ ಕಿಂಗ್ ಮಲಿಂಗಾ ಅಭಿಪ್ರಾಯ ಪಟ್ಟಿದ್ದಾರೆ.
ಭಾರತದ ಅತ್ಯುತ್ತಮ ಫಿನಿಶರ್ ಎಂದು ಕರೆಯಲ್ಪಡುವ ಧೋನಿ ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ನಿಧಾನಗತಿ ಬ್ಯಾಟಿಂಗ್ ಪ್ರದರ್ಶಸಿ ಟೀಕೆಗೆ ಗುರಿಯಾಗಿದ್ದರು. ಆದರೆ ಮಲಿಂಗಾ ಮಾತ್ರ ಧೋನಿ ಪರ ನಿಂತಿದ್ದು ಧೋನಿಯನ್ನು ಯಾರಿಂದಲೂ ಸೋಲಿಸಲು ಆಗುವುದಿಲ್ಲ ಎಂದು ತಿಳಿಸಿದ್ದಾರೆ.
"ನನ್ನ ಪ್ರಕಾರ ಧೋನಿ ಇನ್ನೊಂದರೆಡು ವರ್ಷ ಕ್ರಿಕೆಟ್ನಲ್ಲಿರಬೇಕು. ಅವರು ಕಳೆದ 10 ವರ್ಷಗಳಿಂದ ಅತ್ಯುತ್ತಮ ಫಿನಿಶರ್ ಆಗಿದ್ದಾರೆ. ಭವಿಷ್ಯದಲ್ಲೂ ಧೋನಿಯನ್ನು ಹಿಂದಿಕ್ಕುವ ವಿಕೆಟ್ ಕೀಪರ್ ಬರಲಾರರು. ಧೋನಿಯ ಅನುಭವ ಯುವಕರಿಗೆ ಎಲ್ಲಾ ರೀತಿಯ ಸನ್ನಿವೇಶಗಳನ್ನು ಹೇಗೆ ಎದುರಿಸಬೇಕು ಎಂಬುದನ್ನು ತಿಳಿಸಿಕೊಡಲಿದೆ. ಧೋನಿಯಿಂದ ಭಾರತ ತಂಡ ಎಲ್ಲಾ ಮಾದರಿಯಲ್ಲೂ ಯಶಸ್ವಿ ತಂಡವಾಗಿದೆ. ನನಗನಿಸಿದ ಮಟ್ಟಿಗೆ ಟೀಮ್ ಇಂಡಿಯಾ ಯಾವ ತಂಡವನ್ನಾದರೂ ಮಣಿಸುವ ತಾಕತ್ತನ್ನು ಹೊಂದಿದೆ" ಎಂದು ಎಎನ್ಐಗೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ.
ಭಾರತ ತಂಡದ ಹೊಂದಾಣಿಕೆ ಅದ್ಭುತವಾಗಿದೆ. ಚಾಣಾಕ್ಷ ಸ್ಪಿನ್ನರ್ಸ್, ನಂಬರ್ ಒನ್ ವೇಗಿ ಜಸ್ಪ್ರೀತ್ ಬುಮ್ರಾ ಹಾಗೂ ಶಮಿ ಎಲ್ಲರು ತಂಡಕ್ಕೆ ಗೆಲುವು ತಂದುಕೊಡುವ ಬೌಲರ್ಗಳೆಂದು ಮಲಿಂಗಾ ಭಾರತ ತಂಡವನ್ನು ಕೊಂಡಾಡಿದ್ದಾರೆ.
ಇನ್ನು ತಮ್ಮ ನಿವೃತ್ತಿ ನಿರ್ಧಾರದ ಬಗ್ಗೆಯೂ ಮಾತನಾಡಿದ್ದು, ವಿಶ್ವಕಪ್ ಮುಗಿದ ಮೇಲೆ ಶ್ರೀಲಂಕಾ ಕ್ರಿಕೆಟ್ ಬೋರ್ಡ್ ಅಧಿಕಾರಿಗಳೊಂದಿಗೆ ಮಾತನಾಡಿ, ನನ್ನಿಂದ ಏನನ್ನು ನಿರೀಕ್ಷೆ ಮಾಡುತ್ತಿದ್ದಾರೆ ಎಂದು ತಿಳಿದುಕೊಳ್ಳುತ್ತೇನೆ. ಒಂದು ತಿಂಗಳು ಅಥವಾ ಒಂದು ವರ್ಷವಾಗಲಿ ನನ್ನ ಸೇವೆ ಬೇಕೆಂದರೆ, ನಂತರ ನಾನು ನನ್ನ ನಿರ್ಧಾರವನ್ನು ತಿಳಿಸುವೆ ಎಂದಿದ್ದಾರೆ.
ಶ್ರೀಲಂಕಾ ತಂಡ ತನ್ನ ಕೊನೆಯ ಪಂದ್ಯವನ್ನು ಜುಲೈ 6 ರಂದು ಭಾರತ ತಂಡವನ್ನು ಎದುರಿಸಲಿದೆ.
