ಲಂಡನ್: ಇಂಗ್ಲೆಂಡ್ನಲ್ಲಿ ನಡೆಯುತ್ತಿರುವ ಟಿ 20 ಬ್ಲಾಸ್ಟ್ ಟೂರ್ನಮೆಂಟ್ನಲ್ಲಿ ಪಾಕಿಸ್ತಾನದ ಬ್ಯಾಟ್ಸ್‌ಮನ್ ಬಾಬರ್ ಅಜಮ್ ಸಮರ್ಸೆಟ್ ಪರ ಆಡಲಿದ್ದಾರೆ ಎಂದು ಕ್ಲಬ್ ಶನಿವಾರ ಖಚಿತಪಡಿಸಿದೆ.
ಪಾಕ್ ತಂಡದ ಸೀಮಿತ ಓವರ್ಗಳ ನಾಯಕ ಕ್ಲಬ್ ಪರ ಕೊನೆಯ ಏಳು ಗುಂಪು ಮತ್ತು ನಾಕೌಟ್ ಹಂತದ ಪಂದ್ಯಗಳಿಗೆ ಲಭ್ಯವಿರುತ್ತಾರೆ ಎಂದು ತಿಳಿದುಬಂದಿದೆ. 25 ವರ್ಷದ ಆಟಗಾರ ಪ್ರಸ್ತುತ ಇಂಗ್ಲೆಂಡ್ನಲ್ಲಿ ನಡೆಯುತ್ತಿರುವ 3 ಪಂದ್ಯಗಳ ಟಿ20 ಸರಣಿಯಲ್ಲಿ ಪಾಕ್ ತಂಡವನ್ನು ಮುನ್ನಡೆಸುತ್ತಿದ್ದಾರೆ. ಶುಕ್ರವಾರ ನಡೆದ ಮೊದಲ ಪಂದ್ಯ ಮಳೆಯಿಂದ ರದ್ದುಗೊಂಡಿತ್ತು.
ಬಾಬರ್ ಕಳೆದ ಆವೃತ್ತಿಯಲ್ಲಿ 578 ರನ್ ಸಿಡಿಸುವ ಮೂಲಕ ಸಮರ್ಸೆಟ್ ಪರ ಅಮೋಘ ಪ್ರದರ್ಶನ ನೀಡಿದ್ದರು. ಇದೀಗ ಟಿ20 ಸರಣಿ ಮುಗಿಯುತ್ತಿದ್ದಂತೆ ಸೆಪ್ಟೆಂಬರ್ 2 ರಿಂದ ಅಕ್ಟೋಬರ್ 4ವರೆಗೆ ಇಂಗ್ಲೆಂಡ್ನಲ್ಲೇ ಉಳಿದು ಟಿ20 ಬ್ಲಾಸ್ಟ್ನಲ್ಲಿ ಮುಂದುವರಿಯಲಿದ್ದಾರೆ ಎಂದು ತಿಳಿದುಬಂದಿದೆ.
ಸಮರ್ಸೆಟ್ಗೆ ಮರಳಿದ ನಂತರ ಮಾತನಾಡಿರುವ ಬಾಬರ್ ಅಜಮ್, ನಾನು ಕಳೆದ ವರ್ಷ ಸಮರ್ಸೆಟ್ ತಂಡದ ಪರ ಆಡುವುದನ್ನು ಆನಂದಿಸಿದ್ದೇನೆ. ಮತ್ತು ಈ ವರ್ಷವೂ ತಂಡದ ಪರ ಆಡುವ ಅವಕಾಶ ಸಿಕ್ಕಿರುವುದಕ್ಕೆ ಸಂತೋಷವಾಗುತ್ತಿದೆ. ಪ್ರಪಂಚದಾದ್ಯಂತ ಕೋವಿಡ್ 19 ಇರುವುದರ ಹೊರೆತಾಗಿಯತೂ ನಡೆಯುತ್ತಿರುವ ಈ ಟೂರ್ನಿ ಬಹಳ ಭಿನ್ನವಾಗಿದ್ದು, ಆ ಸವಾಲುಗಳನ್ನು ಯಶಸ್ವಿಯಾಗಿ ಎದುರಿಸುತ್ತಿರುವುದಕ್ಕೆ ಇಗ್ಲೆಂಡ್ ಕ್ರಿಕೆಟ್ ಮಂಡಳಿಯನ್ನು ಪ್ರಶಂಸಿಸುತ್ತೇನೆ ಎಂದು ತಿಳಿಸಿದ್ದಾರೆ.
