ನವದೆಹಲಿ : ಕೊರೊನಾದಿಂದಾಗಿ ಅಮಾನತುಗೊಂಡಿರುವ ಐಪಿಎಲ್ ಟೂರ್ನಿ ಯುಎಇಯಲ್ಲಿ ನಡೆಸಲು ತೀರ್ಮಾನಿಸಲಾಗಿದ್ದು, ನಾಳೆಯ ಸಭೆಯಲ್ಲಿ ಅಂತಿಮಗೊಳ್ಳುವ ಸಾಧ್ಯತೆ ಇದೆ.
ಸೆಪ್ಟೆಂಬರ್ 15 ಮತ್ತು ಅಕ್ಟೋಬರ್ 15ರ ನಡುವೆ ಮೂರು ವಾರಗಳ ನಡುವೆ ಟೂರ್ನಿ ನಡೆಸಲು ಈಗಾಗಲೇ ನಿರ್ಧರಿಸಲಾಗಿದ್ದು, ನಾಳೆ ಅಧಿಕೃತವಾಗಿ ಘೋಷಣೆಯಾಗಲಿದೆ.
ಇದೇ ವೇಳೆ ಟಿ-20 ವಿಶ್ವಕಪ್ ಕುರಿತು ಸಹ ಚರ್ಚೆಯಾಗುವ ಸಾಧ್ಯತೆ ಇದ್ದು, ಐಪಿಎಲ್ ಮರು ಆಯೋಜನೆ ಬಗ್ಗೆ ನಾಳೆ ನಡೆಯಲಿರುವ ಬಿಸಿಸಿಐ ವಿಶೇಷ ಸಾಮಾನ್ಯ ಸಭೆಗೆ ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಅಧ್ಯಕ್ಷತೆ ವಹಿಸಲಿದ್ದಾರೆ.
ಈಗಾಗಲೇ ಭಾರತದಲ್ಲಿ ಅರ್ಧ ಟೂರ್ನಿ ಮುಗಿದಿದ್ದು, ಇನ್ನೂ 31 ಪಂದ್ಯಗಳು ಬಾಕಿ ಉಳಿದಿವೆ. 3 ವಾರಗಳ ಕಾಲ ನಡೆಯಲಿರುವ ಈ ಆವೃತ್ತಿಯ ದ್ವಿತೀಯಾರ್ಧದಲ್ಲಿ, 10 ಡಬಲ್ ಹೆಡರ್ ಪಂದ್ಯಗಳು ಹಾಗೂ 7 ಸಿಂಗಲ್ ಹೆಡರ್ ಪಂದ್ಯ ನಡೆಸಲು ಬಿಸಿಸಿಐ ಚಿಂತನೆ ನಡೆಸಿದೆ.
ಬಿಸಿಸಿಐ ಭಾರತದಲ್ಲಿ ಟಿ-20 ವಿಶ್ವಕಪ್ ಅನ್ನು ಆಯೋಜಿಸಲು ಬಯಸಿದೆ ಮತ್ತು ಜೂನ್ 1ರ ಐಸಿಸಿ ಮಂಡಳಿಯ ಸಭೆಯಲ್ಲಿ, ಯಾವುದೇ ನಿರ್ಣಯಕ್ಕೆ ಬರುವ ಮೊದಲು ಇಲ್ಲಿನ ಕೋವಿಡ್ ಪರಿಸ್ಥಿತಿ ಅವಲೋಕಿಸಲು ಐಸಿಸಿಗೆ ಸೂಚಿಸಲಿದೆ.
ನಿಸ್ಸಂಶಯವಾಗಿ ಈ ಸಭೆಯ ಮುಖ್ಯ ವಿಷಯವೆಂದರೆ ಐಪಿಎಲ್ ವೇಳಾಪಟ್ಟಿ. ಫೈನಲ್ ಸೇರಿದಂತೆ ನಾಲ್ಕು ಪ್ಲೇ-ಆಫ್ ಆಟಗಳನ್ನು (2 ಕ್ವಾಲಿಫೈಯರ್ಗಳು, ಒಂದು ಎಲಿಮಿನೇಟರ್) ಹೊರತುಪಡಿಸಿ 10 ಡಬಲ್-ಹೆಡರ್ ಮತ್ತು 7 ಸಿಂಗಲ್ ಹೆಡರ್ ಪಂದ್ಯಗಳ ನಾವು ನಿರೀಕ್ಷಿಸುತ್ತಿದ್ದೇವೆ.
ಇನ್ನು, ವಾರಾಂತ್ಯದಲ್ಲಿ ಫೈನಲ್ ಪಂದ್ಯಗಳು ನಡೆಯಲಿವೆ ಎಂದು ಬಿಸಿಸಿಐನ ಹಿರಿಯ ಅಧಿಕಾರಿಯೊಬ್ಬರು ಸಭೆಯ ಹಿಂದಿನ ದಿನವೇ ತಿಳಿಸಿದ್ದಾರೆ.
ಇಂಗ್ಲೆಂಡ್ ಆಟಗಾರರು ಗೈರು.. ಇತ್ತ ಉಳಿದ ಐಪಿಎಲ್ ಪಂದ್ಯಾವಳಿಗೆ ಇಂಗ್ಲೆಂಡ್ ಆಟಗಾರರು ಲಭ್ಯವಿರುವುದಿಲ್ಲ ಎಂದು ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ ಈಗಾಗಲೇ ಸ್ಪಷ್ಟಪಡಿಸಿದೆ.
ವಿಶ್ವ ಟಿ-20 ಸರಣಿ ಹಾಗೂ ಉಳಿದ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಇಂಗ್ಲೆಂಡ್ ತೊಡಗುವುದರಿಂದ ಐಪಿಎಲ್ನಲ್ಲಿ ಆಟಗಾರರು ಭಾಗಿಯಾಗುವುದಿಲ್ಲ ಎಂದು ಕ್ರಿಕೆಟ್ ಮಂಡಳಿಯ ನಿರ್ದೇಶಕ ಆಶ್ಲೇ ಗೈಲ್ಸ್ ತಿಳಿಸಿದ್ದಾರೆ.
ಜೋಸ್ ಬಟ್ಲರ್, ಬೆನ್ ಸ್ಟೋಕ್ಸ್ (ಫಿಟ್ ಆಗಿದ್ದರೆ), ಜೋಫ್ರಾ ಆರ್ಚರ್ (ಫಿಟ್ ಆಗಿದ್ದರೆ), ಜಾನಿ ಬೈರ್‌ಸ್ಟೋವ್, ಸ್ಯಾಮ್ ಕರ್ರನ್, ಇಯೊನ್ ಮೋರ್ಗಾನ್, ಮೊಯೀನ್ ಅಲಿ ಮೊದಲಾದವರು ಐಪಿಎಲ್ ಟೂರ್ನಿಯಲ್ಲಿ ಗೈರಾಗಲಿದ್ದಾರೆ.
ರಣಜಿ ಟ್ರೋಫಿ ಪರಿಹಾರ.. ದೇಶೀಯ ಕ್ರಿಕೆಟಿಗರು ಪರಿಹಾರದ ಬಗ್ಗೆಯೂ ಸಭೆಯಲ್ಲಿ ಚರ್ಚೆಯಾಗುವ ಸಾಧ್ಯತೆ ಇದೆ. ಕೊರೊನಾದಿಂದಾಗಿ ಈ ಬಾರಿಯ ರಣಜಿ ಟ್ರೋಫಿ ರದ್ದಾಗಿದೆ.
ಸುಮಾರು 700 ದೇಶೀಯ ಕ್ರಿಕೆಟಿಗರು ಮೈದಾನಕ್ಕಿಳಿಯದೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಈ ಹಿನ್ನೆಲೆ ಆಟಗಾರರಿಗೆ ಪರಿಹಾರ ನೀಡುವ ಕುರಿತಂತೆ ಸಭೆಯಲ್ಲಿ ಚರ್ಚೆಯಾಗುವ ಸಾಧ್ಯತೆ ತಳ್ಳಿಹಾಕುವಂತಿಲ್ಲ.
