ಬ್ಯಾಂಕಾಂಕ್: ಭಾರತದ ಅನುಭವಿ ಬ್ಯಾಡ್ಮಿಂಟನ್ ಆಟಗಾರ್ತಿ ಸೈನಾ ನೆಹ್ವಾಲ್ ಥಾಯ್ಲೆಂಡ್ ಮಾಸ್ಟರ್ಸ್ನಲ್ಲಿ ಮೊದಲ ಸುತ್ತಿನಲ್ಲಿ ಸೋಲು ಕಂಡಿದ್ದಾರೆ.
ಸೈನಾ ಮೊದಲ ಸುತ್ತಿನ ಪಂದ್ಯದಲ್ಲಿ ತಮಗಿಂತ ಶ್ರೇಯಾಂಕದಲ್ಲಿ ಹಿಂದಿರುವ ಡೆನ್ಮಾರ್ಕ್ ಆಟಗಾರ್ತಿ ವಿರುದ್ಧ ಸೋಲುಕಾಣುವ ಮೂಲಕ ನೀರಸ ಪ್ರದರ್ಶನ ಮುಂದುವರಿಸಿದ್ದಾರೆ. 2020ರಲ್ಲಿ ಮಲೇಷ್ಯಾ ಮಾಸ್ಟರ್ಸ್ನಲ್ಲಿ ಕ್ವಾರ್ಟರ್ ಫೈನಲ್, ಇಂಡೋನೇಷ್ಯಾ ಓಪನ್ನಲ್ಲಿ ಮೊದಲ ಸುತ್ತಿನಲ್ಲೇ ಹೊರಬಿದ್ದಿದ್ದರು. ಸೈನಾ ಬುಧವಾರ ನಡೆದ ಥಾಯ್ಲೆಂಡ್ ಮಾಸ್ಟರ್ಸ್ನಲ್ಲೂ ಡೆನ್ಮಾರ್ಕ್ನ ಲಿನೆ ಹೊಜ್ಮಾರ್ಕ್ ವಿರುದ್ಧ ಮೊದಲ ಸುತ್ತಿನಲ್ಲೇ ಸೋಲನುಭವಿಸಿದ್ದಾರೆ.
ಬಿಡಬ್ಲ್ಯೂ ಶ್ರೇಯಾಂಕದಲ್ಲಿ 18ನೇ ಸ್ಥಾನದಲ್ಲಿರುವ ಸೈನಾ 30ನೇ ಶ್ರೇಯಾಂಕದ ಡೆನ್ಮಾರ್ಕ್ ಆಟಗಾರ್ತಿ ವಿರುದ್ಧ 13-21, 21-17, 15-21 ರ ಗೇಮ್ಗಳ ಅಂತರದಲ್ಲಿ ಸೋಲುಕಂಡಿದ್ದಾರೆ. ಈ ಹಿಂದಿನ ನಾಲ್ಕು ಮುಖಾಮುಖಿಯಲ್ಲಿ ಡೆನ್ಮಾರ್ಕ್ ಆಟಗಾರ್ತಿಯ ವಿರುದ್ಧ ಪ್ರಾಬಲ್ಯ ಸಾಧಿಸಿದ್ದ ಸೈನಾ ನೆಹ್ವಾಲ್ ಇದೇ ಮೊದಲ ಬಾರಿಗೆ ಸೋಲನುಭವಿಸಿದ್ದಾರೆ.
ಸೈನಾ ಅಲ್ಲದೆ ಥಾಯ್ಲೆಂಡ್ ಮಾಸ್ಟರ್ಸ್ನಲ್ಲಿ ಭಾಗವಹಿಸಿದ್ದ ಭಾರತದ ಇತರ ಸ್ಪರ್ಧಿಗಳು ಕೂಡ ಸೋತು ಹೊರಬಿದ್ದಿದ್ದಾರೆ. ಕಿಡಂಬಿ ಶ್ರೀಕಾಂತ್, ಹೆಚ್ ಎಸ್ ಪ್ರಣಯ್, ಸಮೀರ್ ವರ್ಮಾ ಕೂಡ ಮೊದಲ ಸುತ್ತಿನಲ್ಲೇ ಸೋಲುಕಂಡಿದ್ದಾರೆ.
