ಹಂಗಾಮಾ ಪ್ಲೇನಲ್ಲಿ ಪ್ರಸಾರವಾಗಲಿದೆ 'ರಾತ್ರಿಯ ಯಾತ್ರಿಕ' ಕನ್ನಡ ವೆಬ್‌ ಸರಣಿ

ರೆಡ್ ಲೈಟ್ ಏರಿಯಾಗಳಲ್ಲಿ ನಡೆಯಬಹುದಾದ 5 ವಿಭಿನ್ನ ಮತ್ತು ಚಿಂತನಶೀಲ ಕಥೆಗಳನ್ನು ಒಳಗೊಂಡ 'ರಾತ್ರಿಯ ಯಾತ್ರಿಕ' ಎಂಬ ಹೊಸ ಕನ್ನಡ ಕಾರ್ಯಕ್ರಮ ಹಂಗಮಾ ಪ್ಲೇನಲ್ಲಿ ಪ್ರಸಾರ ಆಗಲಿದೆ.

ಹಂಗಮಾ ಡಿಜಿಟಲ್ ಮೀಡಿಯಾ ಒಡೆತನದ ಪ್ರಮುಖ ವಿಡಿಯೋ ಆನ್ ಡಿಮ್ಯಾಂಡ್ ಪ್ಲಾಟ್‌ಫಾರ್ಮ್ ಆಗಿರುವ ಹಂಗಮಾ ಪ್ಲೇನಲ್ಲಿ ರೆಡ್ ಲೈಟ್ ಏರಿಯಾಗಳಲ್ಲಿ ನಡೆಯಬಹುದಾದ 5 ವಿಭಿನ್ನ ಮತ್ತು ಚಿಂತನಶೀಲ ಕಥೆಗಳನ್ನು ಒಳಗೊಂಡ 'ರಾತ್ರಿಯ ಯಾತ್ರಿಕ' ಎಂಬ ಹೊಸ ಕನ್ನಡ ಕಾರ್ಯಕ್ರಮ ಪ್ರಸಾರ ಆಗಲಿದೆ.

ಪ್ರತಿಯೊಂದು ಕಥೆಯು ಅಪೂರ್ಣ ಜೀವನದ ಮತ್ತು ಅನ್ವೇಷಣೆಯ ಪಾತ್ರಗಳನ್ನು ಒಳಗೊಂಡಿವೆ. ಪ್ರೀತಿ, ದೈಹಿಕ ಸುಖ, ನಿರಾಶ್ರಿತರ ಕಥೆಗಳನ್ನು ಒಳಗೊಂಡಿವೆ. ವೇಶ್ಯೆಯ ಮಗನೆಂದು ನಾಚಿಕೆ ಪಡುವ ವ್ಯಕ್ತಿಯೊಬ್ಬ ಆತ ಅತಿಯಾಗಿ ದ್ವೇಷಿಸುವ ಸ್ಥಳದಲ್ಲೇ ಹೇಗೆ ಅರಿವು ಪಡೆಯುತ್ತಾನೆ. 69 ವರ್ಷದ ವ್ಯಕ್ತಿಯೊಬ್ಬ ಹೇಗೆ ತನ್ನ ದೈಹಿಕ ಅಗತ್ಯತೆಗಳನ್ನು ಪೂರೈಸಿಕೊಳ್ಳಲು ಹಾತೊರೆಯುತ್ತಾನೆ ಮತ್ತು ಅದಕ್ಕಾಗಿ ಸಮಾಜದ ಬಗ್ಗೆ ಹೆದರದೆ, ನಾಚಿಕೆ ಪಡದೆ ಜೀವಿಸುತ್ತಾನೆ. ಜೈಲಿನಿಂದ ಹೊರಬಂದ ಪ್ರೇಮಿಯೊಬ್ಬ ವಾಸ್ತವಿಕತೆಯನ್ನು ಒಪ್ಪಿಕೊಂಡು ಹೇಗೆ ತನ್ನ ಹೊಸ ಬದುಕಿನ ಅಧ್ಯಾಯವನ್ನು ಪ್ರಾರಂಭಿಸುತ್ತಾನೆ. 18 ವರ್ಷ ವಯಸ್ಸಿನ ಹುಡುಗನೊಬ್ಬ ಎಲ್ಲಾ ಲೌಕಿಕ ಸುಖಗಳನ್ನು ತ್ಯಜಿಸುವ ಮೊದಲು ಏಕೆ ಒಮ್ಮೆ ದೈಹಿಕ ಸುಖ ಪಡೆಯಲು ಬಯಸುತ್ತಾನೆ. ಜನರನ್ನು ದೋಚಿ ಜೀವನ ನಡೆಸುವ ವ್ಯಕ್ತಿಯೊಬ್ಬನ ಬಳಿ ಇರುವ ಅಮೂಲ್ಯವಾದ ವಸ್ತುವೊಂದನ್ನು ಕದ್ದು ಹೋಗುವ ಸಂದರ್ಭಗಳ ರೋಚಕ ಕಥೆಗಳು ಸರಣಿಯಲ್ಲಿ ಇರಲಿವೆ.

ಇಲ್ಲಿ ಬರುವ ಪ್ರತಿಯೊಂದು ಪಾತ್ರಗಳು ತಮ್ಮ ಜೀವನದಲ್ಲಿ ಮೊದಲ ಬಾರಿಗೆ 'ರೆಡ್ ಲೈಟ್' ಏರಿಯಾಗೆ ಭೇಟಿ ನೀಡುತ್ತವೆ ಮತ್ತು ಅಂತಿಮವಾಗಿ ಇಲ್ಲಿ ಸಾಂತ್ವನ ಮತ್ತು ಪರಿಹಾರವನ್ನು ಕಂಡುಕೊಳ್ಳುತ್ತವೆ. ಅವರ ಅನುಭವಗಳು ಕೆಲವೊಮ್ಮೆ ಪ್ರಚೋದನಕಾರಿಯೇ ಇರಬಹುದು. ಆದರೆ ಅದನ್ನು ಲೆಕ್ಕಿಸದೆ, ಒಂದೇ ರಾತ್ರಿಯಲ್ಲಿ ಅವರ ದೃಷ್ಟಿಕೋನ ಶಾಶ್ವತವಾಗಿ ಬದಲಾಗುತ್ತದೆ.

ಕಾರ್ಯಕ್ರಮದ ಕುರಿತು ಮಾತನಾಡಿದ ಹಂಗಮಾ ಡಿಜಿಟಲ್ ಮೀಡಿಯಾದ ಸಿಒಒ ಸಿದ್ಧಾರ್ಥ ರಾಯ್, ಕಳೆದ ಕೆಲವು ವರ್ಷಗಳಲ್ಲಿ, ಸ್ಥಳೀಯ ಭಾಷೆಗಳಲ್ಲಿ ಮನರಂಜನೆ, ಕಾರ್ಯಕ್ರಮ ಮತ್ತು ಕತೆಗಳ ನಿರೂಪಣೆಗೆ ಹೆಚ್ಚಿನ ಬೇಡಿಕೆ ಕಂಡುಬಂದಿದೆ. 'ರಾತ್ರಿಯ ಯಾತ್ರಿಕ' ಮನುಷ್ಯನ ಭಾವನೆಗಳನ್ನು ಬಿಂಬಿಸುವ ವಿಶಿಷ್ಟವಾದ ಐದು ಕಥೆಗಳನ್ನು ಒಳಗೊಂಡಿದೆ. ಇದನ್ನು ವಿಶ್ವಾದ್ಯಂತ ಇರುವ ಕನ್ನಡ ಮಾತನಾಡುವ ಪ್ರೇಕ್ಷಕರು ಮೆಚ್ಚುತ್ತಾರೆ ಎಂಬ ಭರವಸೆ ಇದೆ. ಈ ವರ್ಷ ಕನ್ನಡದಲ್ಲಿ ಹೆಚ್ಚಿನ ಶೋ, ಚಲನಚಿತ್ರ ಹಾಗೂ ಕಿರುಚಿತ್ರ ಸೇರಿದಂತೆ ಸಣ್ಣ ವಿಡಿಯೋಗಳನ್ನು ಬಿಡುಗಡೆ ಮಾಡುವ ಉದ್ದೇಶ ಹಾಕಿಕೊಂಡಿದ್ದು, ನಮ್ಮ ಬಳಕೆದಾರರ ಸಂಖ್ಯೆಯನ್ನು ಎರಡು ಪಟ್ಟು ಹೆಚ್ಚಿಸುವ ಗುರಿ ಹೊಂದಿದ್ದೇವೆ ಎಂದರು.

ಪ್ರೊಡಕ್ಷನ್​ನ ಸಂಸ್ಥಾಪಕ ಅನಿಲ್ ವಿ. ಕುಮಾರ್, ಈ ಸರಣಿಯಲ್ಲಿ ಈವರೆಗೆ ಎಲ್ಲೂ ಕಾಣಿಸದ ವಿಭಿನ್ನ ಪರಿಕಲ್ಪನೆಯಿದೆ. ಗಟ್ಟಿಯಾದ ಮತ್ತು ಸೂಕ್ಷ್ಮ ಪಾತ್ರಗಳ ಮೂಲಕ ರೆಡ್ ಲೈಟ್ ಏರಿಯಾಗಳ ಜನರ ಭಾವನೆ ಮತ್ತು ಬುದ್ಧಿವಂತಿಕೆಯನ್ನು ಎತ್ತಿ ತೋರಿಸುತ್ತದೆ. ಅಲ್ಪಾವಧಿಯಲ್ಲಿಯೇ ಒಂದಾಗಿ ಆಯಾ ಪಾತ್ರಗಳಿಗೆ ಜೀವ ತುಂಬಿದ ನಟರು ಮತ್ತು ಸಿಬ್ಬಂದಿ ಜೊತೆ ಕೆಲಸ ಮಾಡಿದ್ದಕ್ಕೆ ನನಗೆ ಸಂತೋಷವಾಗಿದೆ. ಪ್ರೇಕ್ಷಕರಿಂದ ಬರಲಿರುವ ಪ್ರತಿಕ್ರಿಯೆಗಳನ್ನು ನಾನು ಎದುರು ನೋಡುತ್ತಿದ್ದೇನೆ ಎಂದರು.

ಹಂಗಮಾ ಡಿಜಿಟಲ್ ಮೀಡಿಯಾ ಸಹಯೋಗದೊಂದಿಗೆ ಅನಿಲ್ ವಿ. ಕುಮಾರ್ ಪ್ರೊಡಕ್ಷನ್ಸ್ ನಿರ್ಮಿಸಿದ ಈ ಕಾರ್ಯಕ್ರಮದ ಎಲ್ಲಾ ಸಂಚಿಕೆಗಳನ್ನು ಅನಿಲ್ ವಿ. ಕುಮಾರ್ ನಿರ್ದೇಶಿಸಿದ್ದಾರೆ.