ಜಾಗತಿಕ ಮಟ್ಟದಲ್ಲಿ ತನ್ನದೇ ಛಾಪು ಮೂಡಿಸಿರುವ ಬಾಲಿವುಡ್ - ಹಾಲಿವುಡ್ ನಟಿ ಪ್ರಿಯಾಂಕಾ ಚೋಪ್ರಾ ಇದೀಗ ತನ್ನ ಹೆಸರಿನ ಬದಲು 'ನಿಕ್ ಜೋನಾಸ್ ಪತ್ನಿ' ಎಂದು ಉಲ್ಲೇಖಿಸಿದ ಸುದ್ದಿ ವರದಿಯೊಂದರ ವಿರುದ್ಧ ಕಿಡಿಕಾರಿದ್ದಾರೆ.
ಪ್ರಿಯಾಂಕಾ ಚೋಪ್ರಾ ಕೇವಲ ನಟಿ ಮಾತ್ರವಲ್ಲ. ಅವರು ಮಾಜಿ ವಿಶ್ವ ಸುಂದರಿ, ನಿರ್ಮಾಪಕಿ, ಗಾಯಕಿ, ಲೇಖಕಿ ಹಾಗೂ ಯೂನಿಸೆಫ್ ಗುಡ್‌ವಿಲ್ ರಾಯಭಾರಿಯಾಗಿದ್ದಾರೆ. ಅಷ್ಟೇ ಅಲ್ಲ ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತೆ ಹಾಗೂ ತಮ್ಮ ಅದ್ಭುತ ನಟನೆಗೆ ಎರಡು ರಾಷ್ಟ್ರಪ್ರಶಸ್ತಿ ಸೇರಿದಂತೆ ಅನೇಕ ಪ್ರಶಸ್ತಿಗಳನ್ನು ಪಡೆದಿದ್ದಾರೆ. 2018ರಲ್ಲಿ ಅಮೆರಿಕದ ಗಾಯಕ ನಿಕ್ ಜೋನಾಸ್ರನ್ನು ವಿವಾಹವಾಗುವ ಮೊದಲೇ ಇಷ್ಟೊಂದು ಖ್ಯಾತಿ ಗಳಿಸಿರುವ ಇವರನ್ನು ಜೋನಾಸ್ರ ಪತ್ನಿ ಎಂದು ಮಾತ್ರ ಉಲ್ಲೇಖಿಸಿರುವುದು ಪ್ರಿಯಾಂಕಾರ ಆಕ್ರೋಶಕ್ಕೆ ಕಾರಣವಾಗಿದೆ.
ಸುದ್ದಿ ವರದಿಯ ಪೋಸ್ಟ್ ಶೇರ್ ಮಾಡಿ ಈ ವಿಚಾರವನ್ನು ತಮ್ಮ ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಖಂಡಿಸಿರುವ ಪ್ರಿಯಾಂಕಾ, "ನಾನು ಸಾರ್ವಕಾಲಿಕ ಅಪ್ರತಿಮ ಚಲನಚಿತ್ರ ಫ್ರಾಂಚೈಸಿಗಳಲ್ಲಿ ಒಂದನ್ನು ಪ್ರಚಾರ ಮಾಡುತ್ತಿದ್ದು, ನನ್ನನ್ನು 'ನಿಕ್ ಜೋನಾಸ್ ಪತ್ನಿ' ಎಂದು ಬರೆಯಲಾಗಿದೆ. ಮಹಿಳೆಯರ ವಿಚಾರದಲ್ಲಿ ಇನ್ನೂ ಹೇಗೆ ಈ ರೀತಿಯಾಗುತ್ತಿದೆ? ಎಂಬುದನ್ನು ದಯವಿಟ್ಟು ವಿವರಿಸಿ. ನಾನು ನನ್ನ IMDB ಲಿಂಕ್ ಅನ್ನು ನನ್ನ ಬಯೋಗೆ ಸೇರಿಸಬೇಕೇ?" ಎಂದು ಪ್ರಶ್ನಿಸಿದ್ದಾರೆ.
ಸದ್ಯ ಪ್ರಿಯಾಂಕಾ ತಮ್ಮ ಹಾಲಿವುಡ್ ಸಿನಿಮಾ 'ದಿ ಮ್ಯಾಟ್ರಿಕ್ಸ್ ರಿಸರ್ರೆಕ್ಷನ್ಸ್' ಬಿಡುಗಡೆಗೆ ಕಾಯುತ್ತಿದ್ದಾರೆ. ಇದೇ ಡಿಸೆಂಬರ್ 22 ರಂದು ಚಿತ್ರ ತೆರೆ ಮೇಲೆ ಬರಲಿದೆ.
