ಕೆಜಿಎಫ್ 2 ನಂತರ ನಟ ಯಶ್ ಅಭಿನಯದ ಹೊಸ ಚಿತ್ರ ಯಾವುದು? ಚಿತ್ರವನ್ನು ಯಾರು ನಿರ್ಮಿಸಲಿದ್ದಾರೆ? ಹೀಗೆ ಹಲವು ಪ್ರಶ್ನೆ ಇದ್ದೇ ಇದೆ. ಸೂಕ್ತ ಉತ್ತರ ಸಿಗದೆ ಯಶ್ ಅಭಿಮಾನಿಗಳು ಸ್ಪಷ್ಟ ಮಾಹಿತಿಗಾಗಿ ಕಾಯುತ್ತಿದ್ದಾರೆ.
ಕೆಜಿಎಫ್ 2 ಚಿತ್ರೀಕರಣ ಮುಗಿದು ಬಿಡುಗಡೆಯ ದಿನಾಂಕ ಘೋಷಣೆಯಾದರೂ ಯಶ್ ಅಭಿನಯದ ಮುಂದಿನ ಚಿತ್ರದ ಬಗ್ಗೆ ಹೆಚ್ಚು ಸ್ಪಷ್ಟತೆ ಇಲ್ಲ. ಮಫ್ತಿ ನಿರ್ದೇಶಿಸಿದ್ದ ನರ್ತನ್ ಈ ಚಿತ್ರವನ್ನು ನಿರ್ದೇಶಿಸುತ್ತಾರೆ ಎಂಬ ವಿಷಯ ಬಿಟ್ಟರೆ ಈ ಚಿತ್ರವನ್ನು ಯಾರು ನಿರ್ಮಿಸುತ್ತಾರೆ, ಯಾವಾಗ ಪ್ರಾರಂಭವಾಗುತ್ತದೆ ಎಂಬುದರ ಬಗ್ಗೆ ಯಾವುದೇ ಮಾಹಿತಿ ಯಾರಿಗೂ ಇರಲಿಲ್ಲ.
ಇದೀಗ ಹೊಸ ಸುದ್ದಿಯ ಪ್ರಕಾರ, ಯಶ್ ಅಭಿನಯದ ಹೊಸ ಚಿತ್ರವನ್ನು ಜೀ ಸಿನಿಮಾಸ್ ಸಂಸ್ಥೆಯು ನಿರ್ಮಿಸುತ್ತಿದೆಯಂತೆ. ಈ ಸುದ್ದಿಗೆ ಜೀ ಸಿನಿಮಾಸ್ ಮತ್ತು ಯಶ್ ಕಡೆಯಿಂದ ಯಾವುದೇ ಅಧಿಕೃತ ಮಾಹಿತಿ ಬರದಿದ್ದರೂ ಸುದ್ದಿಯಂತೂ ಸಿಕ್ಕಾಪಟ್ಟೆ ಚಾಲ್ತಿಯಲ್ಲಿದೆ.
