ಇತ್ತೀಚೆಗೆ ಬಹುತೇಕ ಸಿನಿಮಾಗಳು ಒಟಿಟಿ ಪ್ಲಾಟ್ಫಾರ್ಮ್ನಲ್ಲಿ ಬಿಡುಗಡೆಯಾಗುತ್ತಿವೆ. ಈ ಕೊರೊನಾ ಲಾಕ್ಡೌನ್ನಿಂದ ಥಿಯೇಟರ್ಗಳು ಬಂದ್ ಆಗಿರುವುದು ಒಟಿಟಿಗೆ ಬಹಳ ಲಾಭವಾಗಿದೆ ಎನ್ನಬಹುದು. ಇತ್ತೀಚೆಗೆ ಕನ್ನಡದ 'ಲಾ' ಸಿನಿಮಾ ಕೂಡಾ ಒಟಿಟಿಯಲ್ಲಿ ಬಿಡುಗಡೆಯಾಗಿತ್ತು.
ಒಟಿಟಿ ಪ್ಲಾಟ್ಫಾರ್ಮ್ ನಡುವೆ ಇದೀಗ ಇಎಟಿಟಿ ಹೊಸದಾಗಿ ಸೇರ್ಪಡೆಗೊಂಡಿದೆ. ಅಮೃತ ಫಿಲಂ ಸೆಂಟರ್ ಮತ್ತು ಕೆ.ಕೆ ಕಂಬೈನ್ಸ್ ಜಂಟಿಯಾಗಿ ನಿರ್ಮಾಣ ಮಾಡಿರುವ 'ದಿ ಪೇಂಟರ್' ಸಿನಿಮಾ ಇಎಟಿಟಿಯಲ್ಲಿ ಬಿಡುಗಡೆ ಆಗಲಿದೆ. ವೆಂಕಟ್ ಭಾರದ್ವಾಜ್ ನಟಿಸಿ ನಿರ್ದೇಶಿಸಿರುವ 'ದಿ ಪೇಂಟರ್' ಚಿತ್ರ ಇಎಟಿಟಿ ಮೂಲಕ ವಿಶ್ವಾದ್ಯಂತ ಏಕ ಕಾಲಕ್ಕೆ ಕನ್ನಡ ಮತ್ತು ಹಿಂದಿ ಭಾಷೆಯಲ್ಲಿ ಬಿಡುಗಡೆಯಾಗುತ್ತಿದೆ. ಶ್ರೇಯಸ್ ಎಂಟರ್ಟೈನ್ಮೆಂಟ್ ಈ ಚಿತ್ರವನ್ನು ಬಿಡುಗಡೆ ಮಾಡುತ್ತಿದೆ. ಇನ್ನೂ ಥಿಯೇಟರ್ಗಳು ತೆರೆಯದ ಕಾರಣ ವೆಂಕಟ್ ಈ ಚಿತ್ರವನ್ನು ಇಎಟಿಟಿ ಮೂಲಕ ಬಿಡುಗಡೆ ಮಾಡಲು ನಿರ್ಧರಿಸಿದ್ದಾರೆ. ಇಂದಿನ ಕೊರೊನಾ ಪರಿಸ್ಥಿತಿಯನ್ನು ಕೆಲವರು ಹೇಗೆ ಒಳ್ಳೆಯದಕ್ಕೆ ಮತ್ತೆ ಕೆಲವರು ಹೇಗೆ ಲಾಭ ಮಾಡಿಕೊಳ್ಳಲು ಬಳಸಿಕೊಳ್ಳುತ್ತಾರೆ ಎಂಬುದನ್ನು ಈ ಚಿತ್ರದಲ್ಲಿ ಹೇಳಲಾಗಿದೆ.
ಥ್ರಿಲ್ಲರ್ ಮತ್ತು ಸಸ್ಪೆನ್ಸ್ ಕಥಾ ವಸ್ತು ಹೊಂದಿರುವ ಸಿನಿಮಾಗೆ 13 ದಿನಗಳ ಶೂಟಿಂಗ್ ಮಾಡಲಾಗಿದೆ. ಚಿತ್ರ 90 ನಿಮಿಷ ಅವಧಿಯಿದ್ದು 5 ಲೊಕೇಶನ್, 5 ಕ್ಯಾಮರಾಮೆನ್, 20 ನಟರು ಹಾಗೂ ತಂತ್ರಜ್ಞರು ಚಿತ್ರದಲ್ಲಿ ಭಾಗಿಯಾಗಿದ್ದಾರೆ. ಈ ಚಿತ್ರವನ್ನು ನೈಜವಾಗಿ ಚಿತ್ರಿಸಲಾಗಿದೆ. ಒಂದು ಮಧ್ಯಮ ವರ್ಗದ ಕುಟುಂಬ ಕಷ್ಟಕರ ಸನ್ನಿವೇಶಗಳಲ್ಲಿ ಹೇಗೆ ಬದುಕು ಸಾಗಿಸುತ್ತದೆ ಎಂಬುದನ್ನು ಚಿತ್ರದಲ್ಲಿ ಬಹಳ ನೈಜವಾಗಿ ತೋರಿಸಲಾಗಿದೆ ಎನ್ನುತ್ತಾರೆ ವೆಂಕಟ್.
ಹಬ್ ಅ್ಯಂಡ್ ಸ್ಪೋಕ್ ಮಾಡೆಲ್ ವ್ಯವಸ್ಥೆಯಲ್ಲಿ ಚಿತ್ರೀಕರಣ ಮಾಡಿರುವ ಮೊದಲ ಭಾರತೀಯ ಸಿನಿಮಾ ಇದು. ಕನ್ನಡ ಪ್ರೇಕ್ಷಕರು 50 ರೂಪಾಯಿ ಕೊಟ್ಟು ಮನೆಯಲ್ಲೇ ಈ ಸಿನಿಮಾ ನೋಡಬಹುದು. ಪ್ರೇಕ್ಷಕರು ನೀಡುವ ದುಡ್ಡಿನಲ್ಲಿ ಶೇಕಡಾ 20 ರಷ್ಟನ್ನು ಸಂಕಷ್ಟದಲ್ಲಿರುವ ಸಿನಿಕಾರ್ಮಿಕರಿಗೆ ನೀಡುವ ಯೋಜನೆ ಇದೆ. ಶೀಘ್ರದಲ್ಲಿ ಚಿತ್ರದ ಟ್ರೇಲರ್ ಮತ್ತು ಲಿರಿಕಲ್ ವಿಡಿಯೋ ಬಿಡುಗಡೆಗೊಳ್ಳಲಿದೆ ಎಂದು ಚಿತ್ರತಂಡ ಹೇಳಿದೆ.
ಈ ಚಿತ್ರದಲ್ಲಿ ವೆಂಕಟ್ ಭರದ್ವಾಜ್ ಪೇಂಟರ್ ಆಗಿ ಪಾತ್ರ ಮಾಡಿದ್ದಾರೆ. ರಾಜ್ಕಮಲ್ , ಭಾಷಾ , ಶಿನವ್ ಕಬೀರ್ ಸೋಮಯಾಜಿ , ಶಮೀಕ್ , ಉಮಾ , ಮಧುರ , ಅಜಯ್ ಲಾರೆನ್ಸ್ ಶಮಾ , ವೈಷ್ಣವಿ , ವೆಂಕಟ್ ಶಾಸ್ತ್ರಿ, ಮನೋಜ್ , ಕಿರಣ್ , ಮಿಥುನ್ ಮತ್ತು ಸಂಜಯ್ ಚಿತ್ರದಲ್ಲಿ ನಟಿಸಿದ್ದಾರೆ.
