1971 ರಲ್ಲಿ ಆರಂಭ ಆದ ಬೆಂಗಳೂರಿನ ಸುಚಿತ್ರ ಫಿಲ್ಮ್ ಸೊಸೈಟಿ ಈಗ ಅರ್ಧ ಶತಕ ಪೂರೈಸಿದೆ. ಸಿನಿಮಾ, ಸಾಹಿತ್ಯ, ರಂಗಭೂಮಿ ಚಟುವಟಿಕೆಗಳ ತಾಣ ಆದ ಸುಚಿತ್ರ ಫಿಲ್ಮ್ ಸೊಸೈಟಿ ಈಗ ಸುವರ್ಣ ಮಹೋತ್ಸವ ಆಚರಿಸಿಕೊಳ್ಳುತ್ತಿದೆ.
ಸುವರ್ಣ ಮಹೋತ್ಸವದ ಆಹ್ವಾನ ಪತ್ರಿಕೆ 1970 ಕನ್ನಡ ಸಿನಿಮಾ ಲೋಕದಲ್ಲಿ ಸುವರ್ಣ ಸಮಯ ಎನ್ನಬಹುದು. 'ಸಂಸ್ಕಾರ'ದಂತ ಪಾತ್ ಬ್ರೇಕಿಂಗ್ ಸಿನಿಮಾ ಬಿಡುಗಡೆಯಾದ ಬೆನ್ನಲ್ಲೇ ಆ ಸಮಯಲ್ಲಿ ಸ್ಯಾಂಡಲ್ವುಡ್ ಮೊದಲ ಫಿಲ್ಮ್ ಸೊಸೈಟಿ ಆಗಿ ಸುಚಿತ್ರ ಹೊರ ಬಂತು. 1980ರಲ್ಲಿ ಸುಚಿತ್ರ ಸಿನಿಮಾ ಕಲ್ಚರಲ್ ಆಕಾಡೆಮಿ ಕೂಡಾ ಸ್ಥಾಪನೆಯಾಯ್ತು. ಈಗ ಈ ಫಿಲ್ಮ್ ಸೊಸೈಟಿ ಖಾಸಗಿ ಪ್ರಾಯೋಗಿತ್ವದಲ್ಲಿ ಪೂರ್ವಂಕರ ಸುಚಿತ್ರ ಸಿನಿಮಾ ಹಾಗೂ ಕಲ್ಚರಲ್ ಅಕಾಡೆಮಿ ಆಗಿದೆ.
ಭಾರತೀಯ ಚಿತ್ರರಂಗದ ಖ್ಯಾತ ನಿರ್ದೇಶಕ, ಬರಹಗಾರ, ಆಸ್ಕರ್ ಪ್ರಶಸ್ತಿ ವಿಜೇತ ಸತ್ಯಜಿತ್ ರೇ, 1980ರಲ್ಲಿ ಸುಚಿತ್ರ ಕಲ್ಚರಲ್ ಅಕಾಡೆಮಿಯನ್ನು ಉದ್ಘಾಟಿಸಿ ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ಈಗ ಸುಚಿತ್ರ ಫಿಲ್ಮ್ ಸೊಸೈಟಿ 50 ರ ಹೊಸ್ತಿಲಲ್ಲಿ ನಿಂತಿದೆ. ಇದೇ ಶುಕ್ರವಾರ, ಅಂದರೆ ಆಗಸ್ಟ್ 28 ರಂದು ಸುವರ್ಣ ಮಹೋತ್ಸವ ಕಾರ್ಯಕ್ರಮ ನಡೆಯಲಿದೆ. ಆದರೆ ಈ ಕಾರ್ಯಕ್ರಮವನ್ನು ಆಸಕ್ತರು ಫೇಸ್ಬುಕ್ ಲೈವ್ನಲ್ಲಿ ನೋಡಬಹುದಾಗಿದೆ.
ಆಗಸ್ಟ್ 28 ಸಂಜೆ 6ಕ್ಕೆ ಹೆಚ್.ಎನ್.ನರಹರಿ ರಾವ್ ನಿರ್ದೇಶನದ ಸುಚಿತ್ರ -50 ಸಾಕ್ಷ್ಯಚಿತ್ರ ಪ್ರದರ್ಶನ ಆಗಲಿದೆ. ಈ ಸಮಯದಲ್ಲಿ ಆರಂಭದಿಂದಲೂ ಸುಚಿತ್ರ ಫಿಲ್ಮ್ ಸೊಸೈಟಿ ಜೊತೆ ಬಾಂಧವ್ಯ ಹೊಂದಿರುವ ಹೆಚ್.ಎನ್ ನರಹರಿ ರಾವ್, ಪದ್ಮಶ್ರೀ ಡಾ. ಗಿರೀಶ್ ಕಾಸರವಳ್ಳಿ, ಮನು ಚಕ್ರವರ್ತಿ, ಎನ್.ವಿದ್ಯಾಶಂಕರ್, ಕೆ.ವಿ. ಆರ್. ಠಾಗೋರ್ ಹಾಗೂ ಇನ್ನಿತರ ಗಣ್ಯರು ಉಪಸ್ಥಿತರಿರಲಿದ್ದಾರೆ.