ಕನ್ನಡ ಚಿತ್ರರಂಗದಲ್ಲಿ ಸಾಕಷ್ಟು ನಿರ್ಮಾಪಕರ ಅಕೌಂಟ್ ಆಡಿಟ್ ಮಾಡುವ ಶ್ರೀನಿವಾಸ್, ಗಾಂಧಿನಗರದಲ್ಲಿಆಡಿಟರ್ ಶ್ರೀನಿವಾಸ್ ಎಂದೇ ಫೇಮಸ್. ಆದರೆ ಈಗ ಶ್ರೀನಿವಾಸ್ ಆಡಿಟ್ ಕೆಲಸದ ಜೊತೆಗೆ ಸ್ನೇಹಿತ ಸೂಗೂರ್ ಕುಮಾರ್ ಜೊತೆ ಸೇರಿ ಸಿನಿಮಾವೊಂದನ್ನು ನಿರ್ಮಿಸುವುದರ ಜೊತೆಗೆ ನಟನೆ ಕೂಡಾ ಮಾಡುತ್ತಿದ್ದಾರೆ.
ಆಡಿಟರ್ ಶ್ರೀನಿವಾಸ್ ' ಸಿಲ್ವರ್ ಫಿಷ್' ಎಂಬ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಅಲ್ಲದೆ ಅವರೇ ವಿಲನ್ ಪಾತ್ರದಲ್ಲಿ ನಟಿಸಿದ್ದಾರೆ. ಈಗಾಗಲೇ ಚಿತ್ರದ ಶೂಟಿಂಗ್ ಮುಗಿದಿದ್ದು, ಸೆನ್ಸಾರ್ ಅಂಗಳದಲ್ಲಿದೆ. ಜನವರಿ ಕೊನೆ ವಾರದಲ್ಲಿ ಚಿತ್ರವನ್ನು ಬಿಡುಗಡೆ ಮಾಡುವುದಾಗಿ ಚಿತ್ರತಂಡ ಹೇಳಿದೆ. ಈ ಸಂಬಂಧ ಇಂದು ಚಿತ್ರತಂಡ ಸುದ್ದಿಗೋಷ್ಠಿ ನಡೆಸಿ ತಮ್ಮ ಚಿತ್ರದ ಬಗ್ಗೆ ಮಾಹಿತಿ ನೀಡಿತು. ಚಿತ್ರಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ಶ್ರೀನಿವಾಸ್ ಕೌಶಿಕ್ ನಿರ್ದೇಶನ ಮಾಡಿದ್ದಾರೆ.
'ಸಿಲ್ವರ್ ಫಿಶ್' ಮರ್ಡರ್ ಮಿಸ್ಟ್ರಿ, ಹಾರರ್ , ಸಸ್ಪೆನ್ಸ್ ಚಿತ್ರವಾಗಿದ್ದು, ಚಿತ್ರದಲ್ಲಿ ನಾಯಕನಾಗಿ 'ಸೈಕೋ' ಖ್ಯಾತಿಯ ಪ್ರಣವ್ ನಟಿಸಿದ್ದಾರೆ. ನಾಯಕಿಯಾಗಿ ಮಂಗಳೂರು ಹುಡುಗಿ ರಶ್ಮಿಕಾ ಚಂಗಪ್ಪ ಕಾಣಿಸಿಕೊಂಡಿದ್ದಾರೆ. ಚಿತ್ರಕ್ಕೆ ಮಾರುತಿ ಮೀರಜ್ಕರ್ ಸಂಗೀತವಿದ್ದು ಕೌರವ ವೆಂಕಟೇಶ್ ಸಾಹಸ ಸಂಯೋಜನೆ ಮಾಡಿದ್ದಾರೆ. ಸೆನ್ಸಾರ್ ಅನುಮತಿ ನೀಡಿದ ಕೂಡಲೇ ಚಿತ್ರವನ್ನು ಬಿಡುಗಡೆ ಮಾಡಲು ಚಿತ್ರತಂಡ ಪ್ಲ್ಯಾನ್ ಮಾಡಿದೆ. ಇನ್ನು ಚಿತ್ರದ ಟ್ರೇಲರನ್ನು ಸೆಂಚುರಿ ಸ್ಟಾರ್ ಶಿವರಾಜ್ಕುಮಾರ್ ಬಿಡುಗಡೆ ಮಾಡಿದ್ದು ಚಿತ್ರಕ್ಕೆ ಆನೆಬಲ ಬಂದಂತಾಗಿದೆ.
