ಬೆಂಗಳೂರು ನನಗೆ ತುಂಬಾ ಸ್ಪೆಷಲ್ ಎಂದ ಬಾಲಿವುಡ್ ನಟಿ ಹುಮಾ ಖುರೇಷಿ

ಅಜಿತ್ ಕುಮಾರ್ ವಲಿಮೈ ಚಿತ್ರದಲ್ಲಿ ಪೊಲೀಸ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು. ಅರ್ಜುನ್ ಎಂಬ ಹೆಸರಿನ ಪಾತ್ರವನ್ನ ಮಾಡಿದ್ದಾರೆ. ಕ್ರೈಂ ನಲ್ಲಿ ತೊಡಗಿಕೊಂಡಿರುವ ವ್ಯಕ್ತಿಗಳ ಗುಂಪುಗಳನ್ನು ಭೇದಿಸುವ ಪಾತ್ರವನ್ನ ಮಾಡಿದ್ದಾರೆ.

ಕನ್ನಡ ಚಿತ್ರರಂಗದಲ್ಲಿ ಪರಭಾಷೆಯ ಸಿನಿಮಾಗಳು ಕನ್ನಡದಲ್ಲಿ ಡಬ್ಬಿಂಗ್ ಆಗಿ, ಬಿಡುಗಡೆ ಆಗೋದು ಸಾಮಾನ್ಯವಾಗಿದೆ. ಅದರಲ್ಲಿ ಕನ್ನಡ ಸೇರಿದಂತೆ ತಮಿಳು, ತೆಲುಗು, ಹಿಂದಿ, ಮಲಯಾಳಂ ಭಾಷೆಯಲ್ಲಿ ಬೇರೆ ಭಾಷೆಯ ಸಿನಿಮಾಗಳು ವಿಶ್ವದಾದ್ಯಂತ ತೆರೆ ಕಾಣುತ್ತಿವೆ. ಇದೀಗ ತಮಿಳು ನಟ ಅಜಿತ್ ಕುಮಾರ್ ಅಭಿನಯದ ಬಹು ನಿರೀಕ್ಷಿತ ಸಿನಿಮಾ "ವಲಿಮೈ" ಚಿತ್ರ ಕನ್ನಡದಲ್ಲಿ ಡಬ್ಬಿಂಗ್ ಆಗಿದ್ದು, ಇದೇ 24ಕ್ಕೆ ರಿಲೀಸ್ ಆಗುತ್ತಿದೆ.

ಕರ್ನಾಟಕದಲ್ಲಿ ಈ ಸಿನಿಮಾದ ವಿತರಣೆ ಹಕ್ಕನ್ನು ಕಮಾರ್ ಫಿಲ್ಮ್ ಫ್ಯಾಕ್ಟರಿ ಅಡಿಯಲ್ಲಿ, ಕನ್ನಡ, ತೆಲುಗು, ತಮಿಳು ಹಾಗು ಹಿಂದಿ ಭಾಷೆಯ ವಿತರಣೆ ಹಕ್ಕನ್ನು ಪಡೆದಿದೆ. ಈ ಹಿನ್ನೆಲೆಯಲ್ಲಿ ಚಿತ್ರದ ಪ್ರಮೋಷನ್ ಕಾರ್ಯಕ್ರಮನ್ನ ನಿರ್ಮಾಪಕ ಕಮ್ ವಿತರಕ ಕಮಾರ್ ಖಾಸಗಿ ಹೊಟೇಲ್​​ನಲ್ಲಿ ಆಯೋಜಿಸಿದ್ದರು. ಈ ಕಾರ್ಯಕ್ರಮಕ್ಕೆ ವಲಿಮೈ ಚಿತ್ರದ ನಿರ್ದೇಶಕ ಹೆಚ್. ವಿನೋದ್, ಈ ಚಿತ್ರದಲ್ಲಿ ಖಳನಟನ ಪಾತ್ರ ಮಾಡಿರೋ ತೆಲುಗು ನಟ ಕಾರ್ತಿಕೇಯ ಗುಮ್ಮಾಕೊಂಡ, ಅಜಿತ್ ಜೊತೆ ಸ್ಕ್ರೀನ್ ಹಂಚಿಕೊಂಡಿರುವ ಬಾಲಿವುಡ್ ನಟಿ ಹುಮಾ ಖುರೇಷಿ ಹಾಗು ಅಜಿತ್ ತಾಯಿ ಪಾತ್ರ ಮಾಡಿರೋ ಕನ್ನಡದ ನಟಿ ಸುಮಿತ್ರಾ ಆಗಮಿಸಿ ಈ ಚಿತ್ರದ ವಿಶೇಷತೆ ಬಗ್ಗೆ ಮಾತನಾಡಿದರು.

ಕನ್ನಡದ ಹಿರಿಯ ನಟಿ ಸಮಿತ್ರಾ ಮಾತನಾಡಿ, ಅಜಿತ್ ಜೊತೆ ಈಗಾಗ್ಲೇ ಒಂದು ಸಿನಿಮಾದಲ್ಲಿ ನಟಿಸಿದ್ದೇನೆ. ಆದರೆ ಈ ಸಿನಿಮಾ ಸ್ವಲ್ಪ ಸ್ಪೆಷಲ್ ಯಾಕಂದ್ರೆ, ಅಜಿತ್ ನನ್ನ ಸ್ವತಃ ಮಗನ ಹಾಗೇ ನಟಿಸಿದ್ದಾರೆ ಅಂದರು.

ವಲಿಮೈ ಸಿನಿಮಾದಲ್ಲಿ ಖಳನಟನಾಗಿ ಕಾಣಿಸಿಕೊಂಡಿರುವ ಕಾರ್ತಿಕೇಯ ಗುಮ್ಮಾಕೊಂಡ, ಮೊದಲಿಗೆ ಕನ್ನಡದಲ್ಲಿ ಮಾತನಾಡುತ್ತಾ ಗಮನ ಸೆಳೆದರು. ಈ ಚಿತ್ರದಲ್ಲಿ ನಾನು ನೆಗೆಟಿವ್ ಶೇಡ್ ಪಾತ್ರ ಮಾಡಿದ್ದೇನೆ. ಬೆಂಗಳೂರು ಅಂದ್ರೆ ನನಗೆ ತುಂಬಾ ಇಷ್ಟ. ಯಾಕಂದ್ರೆ ನನ್ನ ಆರ್​ಎಕ್ಸ್ 100 ಸಿನಿಮಾವನ್ನ ಇಲ್ಲಿನ ಸಿನಿಮಾ ಪ್ರೇಕ್ಷಕರು ಮೆಚ್ಚಿಕೊಂಡು ಬೆನ್ನು ತಟ್ಟಿದ್ದರು. ಹೀಗಾಗಿ ಬೆಂಗಳೂರು ಸ್ಪೆಷಲ್. ಮುಂದಿನ ಸಿನಿಮಾ ಪ್ರಮೋಷನ್ ಹೊತ್ತಿಗೆ ಕನ್ನಡವನ್ನ ಕಲಿತುಕೊಂಡು ಕನ್ನಡ ಮಾತನಾಡುತ್ತೇನೆ ಎಂದು ಕಾರ್ತಿಕೇಯ ಹೇಳಿದರು.

ವಲಿಮೈ ಚಿತ್ರದಲ್ಲಿ ಪೊಲೀಸ್ ಕಾಪ್ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಬಾಲಿವುಡ್ ನಟಿ ಹುಮಾ ಖುರೇಷಿ ಮೊದಲು, ಬೆಂಗಳೂರಿನ ಜೊತೆಗೆ ಇರುವ ನಂಟಿನ ಕುರಿತು ತಮ್ಮ ಅನುಭವ ಹಂಚಿಕೊಂಡರು. ಬೆಂಗಳೂರಿನಲ್ಲಿ ನನ್ನ ತಂದೆಯ ಸಂಬಂಧಿಕರು ಇದ್ದಾರೆ. ನಾನು ಆಗಾಗ್ಗೆ ಬೆಂಗಳೂರಿಗೆ ಬರ್ತಾ ಇರುತ್ತೇನೆ. ಇಲ್ಲಿನ ವೆದರ್ ಹಾಗು ಊಟ ಮತ್ತು ಶಾಪಿಂಗ್ ಮಾಲ್​​ಗಳು ನನಗೆ ತುಂಬಾ ಇಷ್ಟ ಎಂದು ಬೆಂಗಳೂರಿನ ಬಾಂಧವ್ಯದ ಬಗ್ಗೆ ಖುಷಿ ಹಂಚಿಕೊಂಡರು.

ವಲಿಮೈ ಚಿತ್ರದ ಬಗ್ಗೆ ಮಾತನಾಡಿದ ಹುಮಾ ಖುರೇಷಿ, ಫಸ್ಟ್ ಟೈಮ್ ನಾನು ಅಜಿತ್ ಸಾರ್ ಜೊತೆ ಅಭಿನಯಿಸಿದ್ದು, ತುಂಬಾ ಖುಷಿ ಆಯಿತು. ಕಾರ್ತೀಕೆಯ ಬಗ್ಗೆ ಮಾತನಾಡಿದ ಅವರು, ನೋಡೋದಕ್ಕೆ ಮೃದ ಸ್ವಭಾವದವರು ಕಾರ್ತೀಕೆಯ, ಆದರೆ ಸಿನಿಮಾದಲ್ಲಿ ಟೆರರ್ ಪಾತ್ರ ಮಾಡಿದ್ದಾರೆ ಎಂದು ಹಾಸ್ಯ ಮಾಡಿದರು.

ಕೊನೆಯಲ್ಲಿ ವಲಿಮೈ ಚಿತ್ರವನ್ನ ಕರ್ನಾಟಕದಲ್ಲಿ ವಿತರಣೆ ಮಾಡುತ್ತಿರುವ ನಿರ್ಮಾಪಕ ಹಾಗು ವಿತರಕ ಕಮಾರ್ ಮಾತನಾಡಿ, ಈ ಚಿತ್ರವನ್ನ ಕನ್ನಡ ಸೇರಿದಂತೆ ತೆಲುಗು, ತಮಿಳು ಭಾಷೆ ಸೇರಿ 150ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಮಾಡುವುದಾಗಿ ಹೇಳಿದರು.

ಅಜಿತ್ ಕುಮಾರ್ ವಲಿಮೈ ಚಿತ್ರದಲ್ಲಿ ಪೊಲೀಸ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು. ಅರ್ಜುನ್ ಎಂಬ ಹೆಸರಿನ ಪಾತ್ರವನ್ನ ಮಾಡಿದ್ದಾರೆ, ಕ್ರೈಂ ನಲ್ಲಿ ತೊಡಗಿಕೊಂಡಿರುವ ವ್ಯಕ್ತಿಗಳ ಗುಂಪುಗಳನ್ನು ಭೇದಿಸುವ ಪಾತ್ರವನ್ನ ಮಾಡಿದ್ದಾರೆ. ವಲಿಮೈಗೆ ಬಾಲಿವುಡ್‌ ನಿರ್ಮಾಪಕ ಬೋನಿ ಕಪೂರ್ ಬಂಡವಾಳ ಹೂಡಿದ್ದಾರೆ. ಆ್ಯಕ್ಷನ್ ಥ್ರಿಲ್ಲರ್ ಕಹಾನಿಯಾಗಿರೋ ವಲಿಮೈ ಸಿನಿಮಾ, ಇದೇ ಫೆಬ್ರವರಿ 24ರಂದು ವಿಶ್ವದಾದ್ಯಂತ ಬಿಡುಗಡೆ ಆಗುತ್ತಿದೆ.