ಕನ್ನಡ ಚಿತ್ರ ನಿರ್ದೇಶಕ ಪವನ್ ಕುಮಾರ್ ಅವರು ಕನ್ನಡದ ಮೊದಲ ಕ್ರೌಡ್ ಫಂಡಿಂಗ್ ಸಿನಿಮಾ ‘ಲೂಸಿಯ’ ಮಾಡಿದಾಗ ಅನುಸರಿಸಿದ ಪದ್ಧತಿಯನ್ನು ಕೊರೊನಾ ವೈರಸ್ನಿಂದ ಲಾಕ್ ಡೌನ್ ಆದ ಸಂದರ್ಭದಲ್ಲಿ ಕಾರ್ಮಿಕ ಸಹಾಯ ನೀಡಲು ಪ್ರಯೋಗಿಸಿ ಯಶ ಕಂಡಿದ್ದಾರೆ.
‘ಲೂಸಿಯ’ ಚಿತ್ರ ಮಾಡಿದಾಗ 1,400ಕ್ಕೂ ಹೆಚ್ಚು ಜನರು ವಿಶ್ವದ ನಾನಾ ಕಡೆಯಿಂದ ಚಿತ್ರಕ್ಕೆ ತಮ್ಮ ಕೈಲಾದ ಧನಸಹಾಯ ನೀಡಿದ್ದರು. ಅದನ್ನು ಜೋಪಾನ ಮಾಡಿ ಒಬ್ಬ ಬುದ್ದಿವಂತ ಲೆಕ್ಕ ಪತ್ರ ಬರೆಯುವವನನ್ನು ನೇಮಿಸಿ, ಬಂದ ಹಣವನ್ನು ಅವರು ಸರಿಯಾಗಿ ವಿನಿಯೋಗಿಸಿದ್ದರು. ಚಿತ್ರ ತೆರೆ ಕಂಡು ಸೂಪರ್ ಹಿಟ್ ಆದ್ಮೇಲೆ 1,400 ಮಂದಿ ನೀಡಿದ ಹಣವನ್ನು ಅವರು ಹಿಂತಿರುಗಿಸಿದ್ದರು.
ಈಗ ಅದೇ ಬುದ್ದಿವಂತ ನಿರ್ದೇಶಕ ಮತ್ತು ನಟ ಪವನ್ ಕುಮಾರ್ ಕ್ರೌಡ್ ಫಂಡಿಂಗ್ ನೀತಿಯನ್ನು ಮತ್ತೆ ಅನುಸರಿಸಿ 8 ಲಕ್ಷದ ಒಂದು ಸಾವಿರದ 257 ರೂಪಾಯಿಗಳನ್ನು ಸಂಗ್ರಹಿಸಿದ್ದಾರೆ. ಅದನ್ನು ತಲಾ 2000 ರೂಪಾಯಿಯಂತೆ 401 ದಿನಗೂಲಿ ಕಾರ್ಮಿಕರಿಗೆ ಹಂಚಿದ್ದಾರೆ. ಈ ವಿಚಾರವನ್ನು ಅವರು ಫೇಸ್‌ಬುಕ್‌ ಮೂಲಕ ತಿಳಿಸಿದ್ದಾರೆ.
ಪವನ್ ಕುಮಾರ್ ಈ ವಿಚಾರದಲ್ಲಿ ಮೊದಲು ಗಮನ ಹಾರಿಸಿದಾಗ ಇವರಿಗೆ 1,000 ಕಾರ್ಮಿಕರಿಗೆ ಸಹಾಯ ಮಾಡಬೇಕು ಎಂದೆನಿಸಿತ್ತಂತೆ. ಇವರ ಜೊತೆ ಸಹಾಯಕ್ಕೆ ಚೇತನ್ ಅಹಿಂಸಾ, ಪುರುಷೋತ್ತಮ್, ರಜತ್ ಮಹೇಶ್, ಲಕ್ಷ್ಮಿ ಕ್ಷತ್ರಿಯ ಹಾಗೂ ಕೃಷ್ಣ ಹೆಬ್ಬಾಲೆ ಕೈಜೋಡಿಸಿದ್ದರು.
ಈ ವಿಚಾರದಲ್ಲಿ ಮೇಕಪ್ ಉಮೇಶ್ ಅವರ ಜವಾಬ್ದಾರಿ ಸಹ ದೊಡ್ಡದು. ಯಾಕೆಂದರೆ ಅವರು ಸರಿಯಾದ ಜನರಿಗೆ ಹಣ ಸಂದಾಯ ಆಗುತ್ತಾ, ಇದೆಯಾ ಎಂದು ನೋಡಿಕೊಂಡಿದ್ದರು. ಇದೇ ವೇಳೆ ಎಸ್‌ಬಿಐ ಬ್ಯಾಂಕಿನ ಸಂತೋಷ್ ಒಂದೇ ದಿವಸ 369 ಜನರ ಹೆಸರು ಹಾಗೂ ಎಕೌಂಟ್ ನಂಬರ್ ನೀಡಿ ಸಹಕರಿಸಿದರು ಎಂದು ಪವನ್ ಜ್ಞಾಪಿಸಿಕೊಂಡಿದ್ದಾರೆ.
ಸದ್ಯ ಈ ಕೆಲಸವನ್ನು ಪವನ್ ಕುಮಾರ್ ನಿಲ್ಲಿಸಿದ್ದಾರೆ. ಬೇರೆ ಯಾರು ಬೇಕಾದರೂ ಈ ರೀತಿಯಲ್ಲಿ ಅವಶ್ಯಕತೆ ಇರುವವರಿಗೆ ಸಹಾಯ ಮಾಡಬಹುದು ಅನ್ನೋದು ಅವರ ಸಲಹೆ.
