ಪುನೀತ್ ಮತ್ತು ದಾನಿಶ್ ಇನ್ನೊಂದು ಚಿತ್ರದಲ್ಲಿ ಜೊತೆಗೆ ಕೆಲಸ ಮಾಡುತ್ತಿದ್ದಾರೆ. ಪುನೀತ್ ತಮ್ಮ ಪಿಆರ್ಕೆ ಪ್ರೊಡಕ್ಷನ್ಸ್ನಡಿ ನಿರ್ಮಿಸುತ್ತಿರುವ 'ಒನ್ ಕಟ್ ಟೂ ಕಟ್' ಎಂಬ ಹೊಸ ಚಿತ್ರದಲ್ಲಿ ದಾನಿಶ್ ನಾಯಕನಾಗಿ ಕಾಣಿಸಿಕೊಳ್ಳುತ್ತಿರುವುದು ವಿಶೇಷ.
ಒನ್ ಕಟ್ ಟೂ ಕಟ್ ಸಿನಿಮಾ ನಾಳೆ (ಫೆ.5) ಸೆಟ್ಟೇರುತ್ತಿದೆ. ಇದೊಂದು ಪಕ್ಕಾ ಕಾಮಿಡಿ ಚಿತ್ರವಾಗಿದ್ದು, ಇಂಗ್ಲಿಷ್ ಸರಿಯಾಗಿ ಬಾರದ ಇಂಗ್ಲಿಷ್ ಮೇಷ್ಟ್ರು ಗೋಪಿಯಾಗಿ ದಾನಿಶ್ ಈ ಚಿತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಚಿತ್ರವನ್ನು ವಂಸಿಧರ್ ಭೋಗರಾಜು ಎನ್ನುವವರು ನಿರ್ದೇಶನ ಮಾಡುತ್ತಿದ್ದಾರೆ.
'ಪವರ್ ಸ್ಟಾರ್' ಪುನೀತ್ ರಾಜ್ಕುಮಾರ್ ಅವರಿಗಂತೂ ದಾನಿಶ್ ಅಂದರೆ ಬಹಳ ಇಷ್ಟ. ಈ ಹಿಂದೆ 'ಹಂಬಲ್ ಪೊಲಿಟಿಶಿಯನ್ ನೋಗರಾಜ್' ಚಿತ್ರದಲ್ಲಿ ಪುನೀತ್ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆ ನಂತರ ದಾನಿಶ್ ಅಭಿನಯದಲ್ಲಿ 'ಫ್ರೆಂಚ್ ಬಿರಿಯಾನಿ' ಚಿತ್ರವನ್ನು ಕೂಡ ಪುನೀತ್ ನಿರ್ಮಾಣ ಮಾಡಿದ್ದಾರೆ.
